26 shilde. Týǵan kún ıeleri

ASTANA. QazAqparat – Búgin, 26 shilde tulǵalardan kimder dúnıege kelgen? QazAqparat oqyrmandaryna esimder kúntizbesin usynady.

ESІMDER

87 jyl buryn (1936-2021) tanymal ǵalym, eńbek sińirgen oftalmolog dáriger, Qazaqstan oftalmologııa mektebiniń negizin salýshylardyń biri Janar Ǵabıdenqyzy MUSTAFINA dúnıege keldi.

Novosıbırsk qalasynda týǵan. Ol – áıgili qazaq jáne keńes jazýshysy Ǵabıden Mustafınniń qyzy. 1960 jyly Almaty medıtsına ınstıtýtyn bitirgen. 1960 jyldan Qazaq kóz aýrýlary ǵylymı-zertteý ınstıtýtynda kishi, keıin aǵa ǵylymı qyzmetker, dırektordyń ǵylym jónindegi orynbasary qyzmetterin atqardy. Samarqanda kandıdattyq dıssertatsııasyn qorǵady. 1987-2001 jyldary Kóz aýrýlary ǵylymı-zertteý ınstıtýtynyń dırektory jáne Almaty memlekettik medıtsına ınstıtýtynyń kóz aýrýlary kafedrasynyń meńgerýshisi boldy. TMD-daǵy tuńǵysh «Oftalmologııa» oqý-ádistemelik, ǵylymı-óndiristik birlestigine jetekshilik etti. 2003 jyldan bastap QazUMÝ-da tárbıe jumysy bóliminiń meńgerýshisi qyzmetin atqardy.

Janar Ǵabıdenqyzy Qazaqstan Respýblıkasynyń sheginen tysqary jerlerge tanymal qazaq oftalmologııalyq mektebiniń negizin salýshylardyń biri boldy. Elimizde jáne odan tys jerlerde laıyqty bedel men qurmetke ıe boldy. «Parasat», «Qurmet belgisi», «Qazaqstan Respýblıkasynyń eńbek sińirgen dárigeri» jáne basqa da kóptegen ordendermen marapattalǵan. «Ulttyq medıtsına birlestigi» respýblıkalyq qoǵamdyq birlestiginiń joǵary nagradasy – «Altyn dáriger» tósbelgisi, «Ave Vitae» ordeniniń ıegeri. 300-den astam ǵylymı maqalalardyń, onyń ishinde alty monografııanyń, ádistemelik nusqaýlardyń, oqý-ádistemelik quraldardyń, sózdikterdiń, Qazaqstan Respýblıkasy men Reseı Federatsııasynyń 50-den astam ónertabystary men patentteriniń avtory.

38 jyl buryn (1985) Taraz qalasynyń prokýrory Jambyl Syrlybekuly SMATOV dúnıege keldi.

Eńbek joly: Jambyl oblysy Jambyl aýdany men Taraz qalasy prokýrorlarynyń kómekshisi, Bas prokýratýranyń áleýmettik-ekonomıkalyq saladaǵy zańdylyqty qadaǵalaý departamentiniń bólim prokýrory, Bas Prokýror apparatyn Bas Prokýrordyń aǵa kómekshisi, Aqmola oblysynyń Tselınograd aýdanynyń prokýrory, Nur-Sultan qalasy «Saryarqa» aýdanynyń prokýrory (2017-2019) laýazymdaryn atqarǵan. Qazirgi qyzmetinde 2019 jyldyń qyrkúıeginen bastap.