«26 sáýirden 10 mamyrǵa deıin ınternet óshiriledi» - feık

ASTANA. QazAqparat – WhatsApp-ta 26 sáýirden 10 mamyrǵa deıin qazaqstandyqtar ınternetke kire almaıtyny týraly habarlama tarap jatyr. Stopfake.kz-tiń anyqtaýynsha, bul aqparat – jalǵan, dep habarlaıdy QazAqparat.

Málim bolǵandaı, ınternet óshiriletini týraly habar Pavlodar oblysynda shyqqan. Keıin búkil óńirge taraǵan. Pavlodar oblysynyń Tsıfrlandyrý basqarmasy bul aqparatty joqqa shyǵardy.
«Bul aqparat shyndyqqa janaspaıdy. 2023 jylǵy 24 sáýirdegi jaǵdaı boıynsha barlyq baılanys operatorlarynyń aqparattyq-telekommýnıkatsııalyq ınfraqurylymy shtattyq rejımde jumys istep tur. Sizderdi senimdi derekkózderden alynǵan aqparatqa senýge jáne feık aqparattar taratpaýǵa shaqyramyz», – delingen habarlamada.
Demek, taralǵan habarlamaǵa senbegen jón. Qazaqstanda 26 sáýirden 10 mamyrǵa deıin ınternetti óshirý josparlanyp otyrǵan joq.