26 qańtarda joldaǵy ahýal qandaı
ALMATY. KAZINFORM – «QazAvtoJol» ulttyq kompanııasy eldegi joldardyń qazirgi ahýaly týraly habarlady.
2026 jylǵy 26 qańtar kúni saǵat 08:00-degi jaǵdaı boıynsha Qostanaı oblysynda aýa raıynyń qolaısyzdyǵyna baılanysty dızel otynymen júretin jáne qoǵamdyq kólikter úshin «Qostanaı – Áýlıekól – Surǵan» avtojolynyń 8-218-shaqyrym aralyǵy (Tobyl qalasynan Oktıabrskoe aýylyna deıin) ýaqytsha jabyldy.
Sondaı-aq Pavlodar oblysynda «Astana – Shiderti – Pavlodar – Ýspenka – RF shekarasy» avtojolyndaǵy kópir ótkeliniń shetki arqalyqtary zaqymdanýyna baılanysty «Qalqaman» jol aıryǵy ýchaskesi – Qalqaman aýylyna kireberis jáne Astana baǵytyna shyǵatyn jol jabyldy.
Eske salaıyq, «Qazgıdromet» RMK 2026 jylǵy 26 qańtarda elimizdiń birneshe óńirinde qolaısyz aýa raıyna baılanysty eskertý jasady.
Keı aımaqta qar jaýyp, jaıaý burqasyn, kóktaıǵaq bolyp, tuman basady. Sonymen qatar jeldiń jyldamdyǵy sekýndyna 20 metrge deıin jetýi múmkin.