255 myń emes, 1 mln teńge: Mobıldi aýdarym shegi ózgeredi

ASTANA. KAZINFORM – Qarjy mınıstrligi men Ulttyq bank mobıldi aýdarymdardyń shegin ózgertý máselesin pysyqtap jatyr. Bul týraly mınıstrlik taratqan aqparatta aıtylǵan.

Buryn qalaı edi?

Byltyr qarashadan bastap mobıldi aýdarymdardyń bir aıdaǵy sany ǵana emes, jalpy somasy da esepke alynýy múmkin degen málimetter shyǵa bastady. 

Bir jeke tulǵa banktegi shotyna úsh aı boıy ár túrli nómirden aı saıyn 100 jáne odan da kóp aýdarym qabyldasa, ol aýdarymdardyń jalpy somasy 3 eń tómengi jalaqydan assa, kásipkerlikpen aınalysyp júrgen adam bolýy múmkin degen paıymmen salyq organdarynyń nazaryna iligýi múmkin edi. 2025 jyly eń tómengi jalaqynyń mólsheri 85 myń teńge dep kórsetilgen. Al 3 eń tómengi jalaqy degen - 255 myń teńge.

Endi ne ózgeredi?

Qarjy mınıstrligi osy «3 eń tómengi jalaqy» degen sózdi «12 eń tómengi jalaqy» degen sózben almastyrýdy usynyp otyr. Demek, qatarynan úsh aı boıy qabyldaǵan aýdarymdar sany aı saıyn 100-den jáne úsh aıdaǵy jalpy somasy 1 mln 20 myń teńgeden assa ǵana salyq organdarynyń nazaryna iligedi degen sóz.

- Qarjy mınıstrligi Ulttyq bankpen jáne banktermen osy máseleni pysyqtaı kelip, atalǵan ólshemshartty qatarynan 3 aıda 12 eń tómengi jalaqydan (1 mln 20 myń teńgeden) astam mobıldi aýdarym qabyldaý krıterııimen tolyqtyrý týraly sheshim qabyldady. Jyldyq kirisi 12 eń tómengi jalaqydan joǵary bolsa, jeke kásipker retinde tirkelý mindeti bar. Bul buıryqty qazir Ulttyq bank qarap jatyr, - dep jazylǵan málimette.

Salyq organdary ol málimetterdi qaıdan kóredi?

- 2022 jyldan bastap ekinshi deńgeıdegi bankter kásipkerlikten tabys alý belgileri bar operatsııalardy Qarjy mınıstrligi belgilegen krıterııler boıynsha aıqyndaýǵa mindettelgen.

Tarqatyp aıtsaq, bir jeke tulǵanyń qatarynan kúntizbelik 3 aıdyń ár aıynda kásipkerlikke arnalmaǵan bank shotyna 100 jáne odan da kóp ár túrli tulǵadan aqsha qabyldasa, kásipkerlikten tabys tabý bolyp belgilengen.

Ekinshi deńgeıli bankter osyndaı tulǵalar týraly málimetterdi Memlekettik kirister organdaryna berýge mindetti, - deıdi mınıstrliktegiler.