250-den astam volontery bar ShQO-daǵy uıym nemen aınalysady
«Volonterlikke alǵashqy qadamym EKSPO-2017 kórmesinen bastaldy. Elimizdiń bas qalasyna Semeı medıtsınalyq ýnıversıtetinen attanǵan 37 stýdenttiń biri boldym. Biz Ázerbaıjan eliniń pavılonynda jumys istedik. Volonter bolýdyń maǵan qatty unaǵany sonsha, óz erkimmen eki aýysymǵa da shyǵyp otyrdym. Sebebi adamǵa paıdam tıip, onyń júzinen qýanysh lebi eskenin kórgenimde keýdemdi erekshe bir sezim kernedi. Eriktiler ózderiniń shýaqty energııasyn aınalasyndaǵylarǵa shashýy kerek dep esepteımin. Kórme barysynda kelýshilerge qolymnan kelgenshe kómektesip, qoıǵan suraqtaryna iltıpatpen jaýap berip, ózimdi jaqsy qyrynan kórsettim. Osynyń nátıjesinde meni arnaıy semınar-trenıngke shaqyrdy. Sóıtip Qazaqstandaǵy 100 volonter-ambassadordyń qataryna qosyldym», - deıdi Gúlfaırýz Týkınova.
Onyń sózinshe, sol jyly atalmysh joǵary oqý ornynda eriktiler korpýsy qurylǵan. Olar mektepterdi aralap, volonterlik jaıly túsindirý jumystaryn júrgizgen. Keıinnen balalar úıine baryp, merekelik sharalar ótkize bastaǵan.
«Jańa jyl kezinde balaqaılarǵa arnap táttiler salynǵan 83 dorba daıyndadyq. Garrı Potter fılmindegi keıipkerlerdiń kıimin kıip, merekelik qoıylym ázirledik. Bári tamasha ótti. Sol kún máńgi esimde qalatyn shyǵar. Balalar shattyqqa kenelip, eki ezýleri eki qulaqtaryna jetip, erekshe áser aldy. Olardyń jaıdary júzderin kórip biz de sharshaǵanymyzdy umyttyq», - deıdi volonter.
Osylaısha, Semeı medıtsınalyq ýnıversıtetiniń stýdentteri áleýmettik volonterlik jobalarmen aınalysýdy qolǵa alǵan. Qarttar úılerine baryp, ár túrli sharalar ótkizgen. Eko-chellendjderge qatysyp, senbilikterge shyqqan.
«2018 jyly meni Ázerbaıjanda ótken TMD elderindegi volonterler jıynyna shaqyrdy. Sol jerde kóp nárseni sanaǵa túıdim. Reseıdiń dáriger volonterlerimen tanysyp, biraz áńgimelestik. Oılana kele, bizge de osy saladaǵy volonterlikti qolǵa alý kerektigi jaıly bel baıladym. Elge oralǵanda ýnıversıtet rektory Ersin Tursynhanulyna óz usynysymdy aıtyp edim, ol birden qoldaý tanytty. Sóıtip, hospıstegi naýqastarǵa kómektesýdi oılastyra bastadyq», - deıdi Gúlfaırýz.
Onyń aıtýynsha, áýel basta ondaǵy aq halattylar «senderge tym aýyr bolady. Tájirıbeleriń joq» degen. Alaıda, eriktiler alǵash ret baryp sondaǵy syrqat jandarǵa jemis-jıdek taratqan kezde, árkez qabaqtary qars jabylǵan naýqastardyń júzine qýanyshtyń sáýlesi túsken. Muny kórgen dárigerler «bul olarǵa jaqsy áser etedi eken. Jıi kelip tursańdar bolady» dep ruqsattaryn bergen. Ýaqyt óte kele arnaıy sertıfıkattary bar eriktiler medbıkelerge kómektese bastaıdy.
«Qazir ýnıversıtetimizdegi volonterler sany 250-den asady. Onyń ishinde Semeıge oqýǵa kelgen Úndistan azamattary da bar. Bárimiz bir otbasynyń balalaryndaımyz. Judyryqtaı jumyla jumys istep, kez kelgen bastamada uıymshyldyq tanytamyz. Bir baǵytta qala bermeı ózimizdi shyńdaǵymyz keledi. 2019 jyly bizdiń stýdentter Pákistan elindegi volonterlik taqyrybyndaǵy konferentsııaǵa qatysyp keldi. Bıylǵa da jospar kóp. Sonyń bárin iske asyrýǵa shama-sharqymyz jetkenshe tyrysamyz», - deıdi «QazMedVolunteers» eriktiler qozǵalysynyń tóraǵasy.
