25 jastaǵy altaılyq qandasymyz Sanmao proza syılyǵyn aldy — sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Tashkentte Túrki álemi áıel sýretshileriniń shyǵarmashylyǵyna arnalǵan kórme ashyldy — ÓzA
Tashkent qalasyndaǵy Ózbekstan beıneleý óneri galereıasynda Halyqaralyq Túrki mádenıeti uıymy (TÚRKSOI) men Ózbekstan Kórkemsýret akademııasynyń birlese uıymdastyrýymen «Túrki álemi áıel qolónershileri» atty halyqaralyq kórme ótip jatyr.
Bul týraly osy aptada «ÓzA» aqparat agettigi habarlady.
Ózbekstandyq BAQ-tyń dereginshe, atalǵan kórmeniń ıdeıasy 2023 jyldyń sáýir aıynda Tashkentte ótken TÚRKSOI-ǵa múshe memleketterdiń sýretshileri kórmesi barysynda, bolashaqqa arnalǵan josparlar men jobalar talqylanǵan sátte týyndaǵan.
Joba kóshpeli kórme túrinde uıymdastyrylǵan, onyń alǵashqy tusaýkeseri 2024 jyly Bishkektegi G. Aıtıev atyndaǵy Ulttyq óner mýzeıinde sátti ótken.
Bul halyqaralyq is-sharanyń negizgi maqsaty kórme arqyly túrki álemi áıelderiniń shyǵarmashylyǵyna tán zamanaýı beıneleý ónerimen tanysýǵa ǵana emes, sonymen qatar mádenıet pen ónerdiń damýyna qajet dástúrli jáne rýhanı birlikti sezinýge de múmkindik jasalǵan.
Aıta keteıik, ekspozıtsııalar qatarynda Ázerbaıjan, Qazaqstan, Qyrǵyzstan, Túrkimenstan, Túrkııa jáne Ózbekstannan kelgen sýretshi áıelderdiń týyndylary bar.
Sondaı-aq osy aptada «ÓzA»-da «Boks: Rýslan Abdýllaev Kalıfornııada jekpe-jek ótkizedi» degen taqyryptaǵy aqparat jarııalandy.
Habarlamada aıtylǵandaı, AQSh-tyń Kalıfornııa shtatyndaǵy Oýshensaıd qalasynda 20 sáýir kúni kásibı boks týrnıri ótti. Bul dodada ózbekstandyq qandasymyz daryndy boksshylardyń biri Rýslan Abdýllaev rıngke kóterildi.
Aıta keteıik, bul kezdesýde tóreshilerdiń biraýyzdan shyǵarǵan sheshimimen Rýslan Abdýllaev jeńiske jetip, kásipqoı bokstaǵy ekinshi jekpe-jeginde WBA Continental beldigin jeńip alǵan bolatyn.
«ÓzA» aqparat agenttiginiń málimetinshe, «Frontwave Arena» sport kesheni ıelik etetin bul boks keshin ataqty burynǵy kásibı boksshy Oskar De La Hoııaǵa tıesili «Golden Boy Promotions» promoýterlik kompanııasy uıymdastyryp otyr. Osy kompanııamen kelisimshartqa otyrǵan Rýslan Abdýllaev sýperjeńil salmaq dárejesinde kásibı rıngtegi ekinshi jekpe-jegin fılıppındik Jıno Rodrıgoǵa qarsy ótkizdi.
Aıta ketý kerek, Rýslannyń aldaǵy qarsylasy sporttyq mansabynda 19 jekpe-jek ótkizip, 13 jeńis, 4 jeńilis jáne 2 teń nátıjege qol jetkizgen. Al Rýslan bıyl 7 naýryz kúni AQSh-tyń Indıo qalasynda ótken týrnırde meksıkalyq Hose Valensýela Alvaradony ekinshi raýndta nokaýtpen jeńgen bolatyn.
Sonymen qatar «ÓzA»-da «Namanganda jibek qurtyn ósirý bastaldy» degen aqparat jarııalandy.
Atalǵan basylymnyń dereginshe, bıylǵy maýsymda aýdan boıynsha 3970 qorap jibek qurty ósirilip otyr. Qazirgi ýaqytta olardy azyqtandyrý isine erekshe kóńil bólinýde. Bul rette sıretip baǵý, úı ishindegi temperatýrany belgilengen normada ustaý, qosymsha japyraq daıyndap otyrý mańyzdy sanalady.
Aıta ketý kerek, aýdanda 2025 jylǵy jibek ónimin óndirý úshin 134 fermerlik sharýashylyqpen kelisimshart jasalyp, 3970 qorap jibek qurty tuqymy ósirilip jatyr.
Altaılyq 25 jastaǵy jazýshy Sanmao proza syılyǵyn aldy — Altaı aqparat ortalyǵy
25 jastaǵy jazýshy Baıan Tasqynuly 20 sáýir kúni Chjetszıan ólkesi Joýshan qalasyna ótken memlekettik V kezekti Sanmao (shalqyma) proza festıvaliniń jastar nomınatsııasy boıynsha júldeli orynǵa ıe boldy, dep habarlaıdy Qytaıdyń Altaı aqparat ortalyǵy.
Atalǵan BAQ-tyń dereginshe, bıyl 5 qańtar kúni 5-shi kezekti Sanmao proza syılyǵyna ıe bolǵan týyndylardyń tizimi jarııalandy. Altaılyq qandasymyz Baıan Tasqynuly «Qyran jaǵasynda» atty shalqymasymen V kezekti Sanmao syılyǵynyń jeke túri boıynsha, ıaǵnı jastar syılyǵyna ıe bolǵan.
Altaı jas jazýshy Baıannyń shyǵarmashylyǵynda negizgi taqyryp bolyp keledi eken. Óıtkeni bul jer onyń týǵan jeri ǵana emes, onyń ádebı jasampazdyǵynyń sarqylmas qazynasy. Onyń týyndylarynyń tili qarapaıym, shynaıy, súıispenshilikke toly bolyp, ózindik erekshelikke ıe stıilin qalyptastyrǵan.
1999 jyly Shyńjańnyń Altaı qalasynda dúnıege kelgen Baıan Tasqynuly Gýanjoý ýnıversıtetiniń qytaı til-ádebıeti mamandyǵyn oqyǵan. Lýshýn ádebıet ınstıtýtynyń Shyńjańdy mádenıetpen qamtý jazýshylaryn tárbıeleý kýrsynyń kýrsanty. Ol Gýanjoý qalalyq jas jazýshylar qoǵamynyń jáne Shyńjań jazýshylar qoǵamynyń múshesi.
Jas jazýshy 3 jyldan beri Altaıdyń kórkem kórinisterin, adamdardy, jergilikti salt-dástúrdi, ómirdiń ózgerisin jazdy. Onyń Altaı taqyrybyndaǵy jeliles shyǵarmalary «Ulttar ádebıeti jınaǵy», «Batys bólik» jáne «Shalqymalar jınaǵynyń shetelge arnalǵan basylymy» sııaqty ádebı jýrnaldarda art-artynan tanystyrylǵan. Baıan Tasqynulynyń «Ómir bazarynan qııanǵa kóz jiberý» atty jınaǵy 2023 jylǵy avtonomııaly ólkelik ádebıet jáne kórkem týyndylardy damytý jobasyna engizilgen. «Qyran jaǵasynda» 2023 jylǵy Qytaıdyń «Ulttar ádebıeti» jyldyq marapatyna ıe bolsa, «Taý qalasyndaǵy estelikter» V Gýanjoý jastar ádebıeti boıynsha syılyq alǵan.
Osy jolǵy Sanmao (shalqyma) proza syılyǵyna ıe bolǵan «Qyran jaǵasynda» Baıan Tasqynuly ýnıversıtetti bitirip aýylyna qaıtyp kelgennen keıin jazǵan derekti shyǵarmasy. Altaı qalasy Lasty aýyly Noǵaıty qystaǵyn negizgi taqyryp etip, óziniń balalyq shaǵynan erjetkenge deıin qyran ózeni jaǵasynda ata-ájesimen birge ómir keshirmeleri jazylyp, eseıip-erjetý barysy arqyly oqyrmandaryna óziniń tabıǵat jónindegi túsinigin bólisken.
— «Qyran jaǵasynda» atty shyǵarmam meniń 2022-jyly jarııalaǵan «Altaı jeliles shalqymalar» atty jınaǵymnan alynǵan. Shyǵarmamda Altaıdyń baıtaq dalasyn jazýmen birge, ózimniń jan dúnıemdi de beıneleýge tyrystym. Osy shyǵarmam arqyly kóptegen adamnyń Altaıdy tanýyna, Altaıdy túsinýine, Altaıǵa kelýine múmkindik jasasam deımin, — dedi Baıan Tasqynuly.
Qazaqstandyq ónimder alǵash ret Qytaıdyń Halyqaralyq tutyný taýarlary kórmesinde boı kórsetti — «Halyq gazeti»
Qytaıdyń Haınan ólkesiniń Haıkoý qalasynda ótip jatqan Qytaıdyń 5-inshi Halyqaralyq tutyný taýarlary kórmesinde Qazaqstanda óndirilgen joǵary sapaly taýarlardyń alýan túri alǵash ret boı kórsetip, kóptegen qytaılyq jáne sheteldik qonaqtyń nazaryn aýdardy, dep jazady «Halyq gazeti».
Qytaılyq BAQ-tyń málimetinshe, bul EKSPO — bıyl Qytaıda ótken tutyný taýarlarynyń alǵashqy aýqymdy halyqaralyq kórmesi. Kórmeniń jalpy aýdany 160 000 sharshy metrden asady, kórmege qatysý úshin 71 el men aımaqtan 4000-nan astam brend qatysty. Qazaqstandyq kórme aýmaǵynda negizinen otandyq óndirilgen kámpıtter, gazdalǵan sýsyndar, ósimdik maılary, sút ónimderi, onyń ishinde túıe súti men jylqy sútiniń untaǵy jáne basqa da arnaıy ónimder kórsetildi.
Sondaı-aq bul jolǵy kórmeniń taǵy bir ereksheligi — kórmedegi mańyzdy eksponattarynyń biri tutyný taýarlary salasyndaǵy qazirgi ǵylymı-tehnıkalyq damý tendentsııasyn kórsetetin ushqyshsyz ushý apparattary, robottar, elektromobılder jáne basqa da kóptegen ınnovatsııalyq jetistikter sııaqty joǵary tehnologııalyq ónimder boldy.
Sonymen qatar osy aptada «Halyq gazeti» basylymynda «Almatyda «Qytaıda oqý» kórmesi ashyldy» degen aqparat jaryq kórdi.
Atalǵan BAQ-tyń dereginshe, 20 sáýirde Almatyda Qazaqstandaǵy ekinshi HSK «Qytaıda oqý» kórmesi ótti. Kórmede Qytaıdyń 34 joǵary oqý orny stendterin qoıyp, qazaqstandyq stýdentter men ata-analarǵa Qytaıda oqý máseleleri týraly aqparat berdi.
Bul jolǵy is-sharany Qytaı Bilim mınıstrliginiń Qytaı jáne shetel tili almasý jáne yntymaqtastyq ortalyǵy Hankaý halyqaralyq ýnıversıteti men Ál-Farabı atyndaǵy Qazaq ulttyq ýnıversıtetiniń Konfýtsıı ınstıtýty uıymdastyrdy. Statıstıkaǵa sáıkes, sol kúni kórmege 3000-ǵa jýyq oqýshy men ata-ana qatysqan.
Bir mıllıon stýdentke jasandy ıntellekt úıretý bastalady — Parstoday
Iran Islam Respýblıkasy vıtse-prezıdentiniń ǵylym jónindegi kómekshisi bir mıllıon ırandyq oqýshyǵa jasandy ıntellekt úıretý jobasynyń resmı bastalǵanyn habarlady, dep jazdy Parstoday aqparat agenttigi.
Atalǵan aqparat agenttiginiń málimetinshe, Iran Islam Respýblıkasy vıtse-prezıdentiniń ǵylym, tehnologııa jáne bilimge negizdelgen ekonomıka boıynsha kómekshisi Modjtaba Alızade tehnologııanyń osy salasyna qyzyǵýshylyq tanytqandardyń barlyǵyna jasandy ıntellektti úıretý úderisiniń bastalýyna toqtalǵan.
Onyń aıtýynsha, qoǵamnyń barlyq toptary, ásirese stýdentter men basqa da múddeli tulǵalar osy bilim berý platformasynyń múmkindikterin tegin paıdalanyp, jasandy ıntellekt tehnologııasyna qatysty mańyzdy taqyryptardy meńgere alady.
ParsToday aqparat agenttiginiń habarlaýy boıynsha, Alızade jasandy ıntellekt salasyndaǵy qoǵamnyń habardarlyǵy men qoǵam múmkindikteriniń deńgeıin arttyrý osy baǵdarlamany júzege asyrýdyń eń mańyzdy maqsaty ekenin aıtqan. Sondaı-aq, bul baǵdarlamanyń birinshi qadamyn qazir Iran prezıdenttiginiń ǵylym, tehnologııa jáne bilimge negizdelgen ekonomıka vıtse-prezıdenti Irannyń Bilim mınıstrligimen yntymaqtastyǵy aıasynda bastalǵanyn tilge tıek etken.
Alızadeniń aıtýynsha, bul baǵdarlamaǵa 7 men 15 jas aralyǵyndaǵy bir mıllıon oqýshynyń teorııalyq jáne praktıkalyq bilim alýy úshin ıntellektýaldy jáne tartymdy túrde ázirlengen jáne josparlanǵan.
Halyqaralyq kóshi-qon uıymy: «Qorshaýdaǵy Gazada úılerdiń 90% qıraǵan nemese búlingen» — TRT
Halyqaralyq kóshi-qon uıymy qonys aýdarǵan palestınalyqtarǵa baspana kómeginiń daıyn ekenin málimdep, Izraılden shekara ótkelderin ashýdy talap etti. Birikken Ulttar Uıymynyń Gýmanıtarlyq isterdi úılestirý keńsesiniń derekterine silteme jasaǵan Halyqaralyq kóshi-qon uıymy Gazadaǵy úılerdiń 90 paıyzdan astamynyń qıraǵanyn nemese zaqymdanǵanyn habarlady. Izraıl shabýyldary palestınalyqtardy gýmanıtarlyq apatqa ushyratýda, dep jazady Túrkııa Radıo Televızııa portaly.
Atalǵan BAQ-tyń keltirgen málimetterine súıensek, «Qaýipsiz jer bolmaǵandyqtan, otbasylar qaýipti úıindilerdi panalaýǵa májbúr», — dep jazǵan uıym «X» platformasyndaǵy jazbasynda.
— Halyqaralyq kóshi-qon uıymy baspanaǵa kómek kórsetýge daıyn, shekara ótkelderi QAZІR ashylýy kerek, — dep úndeý jasaǵan.
Túrkııalyq BAQ-tyń dereginshe, Izraıl osy ýaqytqa deıin 51 300-den astam palestınalyqty óltirdi. Olardyń kópshiligi áıelder men balalar. Keıin bul kórsetkish 62 myńǵa shyqty. Sonymen qatar Tel-Avıv blokadadaǵy aımaqtyń búkil halqyn yǵystyryp, aımaqtyń kóp bóligin qırandyǵa aınaldyrdy.