25 sáýir. Tulǵalar týǵan kún
Búgin, 25 sáýir kúni tulǵalardan kimder dúnıege kelgen? Kazinform oqyrmandaryna esimder kúntizbesin usynady.
ESІMDER
52 jyl buryn (1973) QR Ulttyq ekonomıka birinshi vıtse-mınıstri Azamat Kemeńgeruly AMRIN dúnıege keldi.
Soltústik Qazaqstan oblysynda týǵan. 1996 jyly Aqmola aýylsharýashylyq ınstıtýtyn bitirgen.Eńbek joly: 19891990 jyldary Korneev keńsharynda jumysshy, kombaınshynyń kómekshisi. 1996-1997 jyldary «Saryarqa» agroónerkásiptik keshenniń ekonomıst-menedjeri.1997-1999 jyldary SQO boıynsha (Petropavl qalasy) Salyq basqarmasynyń aǵa salyq ınspektory. 1999-2000 jyldary SQO boıynsha (Petropavl qalasy) Salyq komıteti salyqtardy májbúrlep óndirip alý basqarmasynyń bólim basshysy. 2000-2002 jyldary SQO Mamlıýt aýdanynyń Salyq komıteti basshysynyń orynbasary. 2002-2004 jyldary SQO Shal aqyn aýdany boıynsha Salyq komıtetiniń tóraǵasy. 2004-2008 jyldary QR Qarjy mınıstrligi Salyq komıteti SQO boıynsha (Petropal qalasy) Salyq komıteti tóraǵasynyń orynbasary. 2008-2011 jyldary SQO Shal aqyn aýdanynyń ákimi. 2011-2012 jyldary SQO Qarjy basqarmasynyń basshysy. 2013-2014 jyldary QR Ekonomıka jáne bıýdjettik josparlaý mınıstrligi Salyq jáne keden saıasaty departamenti dırektorynyń orynbasary. 2015-2020 jyldary QR Ulttyq ekonomıka mınıstrliginiń Salyq jáne keden saıasaty departamentiniń dırektory.
2025 jyldyń aqpan aıynan bastap qazirgi qyzmetinde.
III dárejeli «Eýrazııalyq ekonomıkalyq odaqty qurýǵa qosqan úlesi úshin», «Eýrazııalyq ekonomıkalyq odaqty damytýǵa qosqan úlesi úshin» medaldarymen marapattalǵan.
52 jyl buryn (1973) qazirgi bessaıys boıynsha Qazaqstannyń eńbek sińirgen sport sheberi, 1996 jylǵy Olımpıada chempıony Aleksandr Vladımırovıch PARYGIN dúnıege keldi.
Almaty qalasynda dúnıege kelgen. Qazaq memlekettik dene shynyqtyrý ınstıtýtyn bitirgen (1998), jattyqtyrýshy.
Eńbek joly: DShNK sport nusqaýshysy (1990-1997).
Qazaqstan Respýblıkasynyń birneshe dúrkin chempıony; Azııa chempıonatynyń kúmis júldegeri (Beıjiń, 1993); XII Azııa oıyndarynyń jeńimpazy (Hırosıma, 1994); Álem chempıonatynyń kúmis júldegeri (Italııa, 1994); Qazirgi bessaıys boıynsha Olımpıada chempıony (Atlanta, 1996 j.).
1997 jyldan beri Avstralııada turady. 2004 jyly Afınada ótken Olımpıadada Aýstralııa quramasy úshin baq synady (27 oryn).
50 jyl buryn (1975) Qazaqstan Respýblıkasy Indýstrııa jáne qurylys mınıstrligi Geologııa komıtetiniń tóraǵasy Erlan Esenáliuly AKBAROV dúnıege keldi.
Ońtústik Qazaqstan oblysynda týǵan.
V. I. Lenın atyndaǵy Qazaq polıtehnıkalyq ýnıversıtetin, M. H. Dýlatı atyndaǵy Taraz memlekettik ýnıversıtetin, Qaraǵandy tehnıkalyq ýnıversıtetin bitirgen.
Eńbek joly: 1998 jyly Jańaózen qalasyndaǵy «ÓzenMunaıgaz» AQ operatory, 2002-2005 jyldary Taraz qalasyndaǵy «Qazbýrgaz» AQ ınjener-geology, 2018-2019 jyldary Almaty qalasy boıynsha «Qazaqstan Respýblıkasy Investıtsııalar jáne damý mınıstrligi Geologııa jáne jer qoınaýyn paıdalaný komıtetiniń «Ońtústik Qazaqstan» óńiraralyq geologııa departamenti» RMK bastyǵynyń orynbasary, Almaty qalasy boıynsha «Qazaqstan Respýblıkasy Investıtsııalar jáne damý mınıstrligi Geologııa jáne jer qoınaýyn paıdalaný komıtetiniń «Ońtústik Qazaqstan» óńiraralyq geologııa departamenti» RMM basshysy, 2020-2021 jyldary «Qazgeologııa» ulttyq geologııalyq barlaý kompanııasy» AQ basqarma tóraǵasynyń orynbasary, 2022-2023 jyldary QR Ekologııa, geologııa jáne tabıǵı resýrstar mınıstrligi Geologııa komıtetiniń tóraǵasy boldy.
132 jyl buryn (1893-1968) akter, ulttyq kásibı teatr óneriniń negizin salýshylardyń biri, qoǵam qaıratkeri, Qazaq KSR-niń jáne KSRO-nyń halyq ártisi, KSRO Memlekettik syılyǵynyń laýreaty Qalybek (Qalıbek) QÝANYShBAEV dúnıege keldi.
Qazirgi Qaraǵandy oblysynyń Qarqaraly aýdanynda týǵan.
Jasynan án-kúı men oıyn-saýyqqa, toı-tamashaǵa jany qumar, dýmanshyl bolǵan. Ol jalǵyz ózi birneshe adamnyń keıpine túsip, bir otyrysta-aq «ekeýdiń talasyn, úsheýdiń kerisin, beseýdiń janjalyn» oryndap, tyńdaýshy kópshilikke kúlkige keneltetin daryndy ónerpaz retinde tanyldy. Halyq ónerpazdary Muhametáli, Maýqaı men Abaqty ustaz tutyp, olardan óner syryn úırengen.
1916 jyldyń 25 maýsymyndaǵy patsha jarlyǵyna sáıkes Qýanyshbaev ta qara jumysqa alynǵan. 1917 jyly Omby qalasyna baryp, bylǵary zaýytynda at aıdaýshy-kóshir bolǵan. Munda ataqty balýan Qajymuqanmen tanysqan. Týǵan jerinde aýyldyq keńesti basqaryp, qoǵamdyq jumystarda júrse de ónerden bir sát qol úzbegen. «Qyz uzatý», «Qoı kúzetý» jáne «Ógiz satý» sekildi qyzyq, kúldirgi áńgimeler shyǵaryp, ony toı-jıyndarda oryndap júrgen. Jatyp isher jalqaýlardy, keıbir kerenaý, teris pıǵyldy jandardy ótkir synǵa alyp ájýalaǵan. 1922-1924 jyldary Qoıandy jármeńkesinde Ǵ.Aıtbaev, I.Baızaqov, Q.Muńaıtpasov, M.Shamsýtdınova sııaqty ónerpazdar uıymdastyrǵan oıyn-saýyqqa qatysyp, óner kórsetken. 1926 jyly Qyzylorda qalasynda irge kótergen Qazaq memlekettik drama teatryn uıymdastyrýǵa belsene qatysqan. Akter Qazaqtyń memlekettik akademııalyq drama teatrynda ár jyldary qoıylǵan M.Áýezovtiń «Eńlik — Kebek» tragedııasyndaǵy Qaramende bıdiń beınesinen bastap, osy spektakldegi basty keıipkerlerdi (Kóbeı bı, Kebek, Nysan Abyz) túgel derlik oryndap shyqqan. Buǵan qosa 20 ǵasyrdyń 30-shy jyldarynyń basynda Aıatbaı (І.Jansúgirov, «Kek»), Bekbolat (B.Maılın, «Maıdan»), Beıbit (Q.Baıseıitov, Á.Shanın, «Tartys») rólderin oryndaǵan. 1936 jyly Máskeý qalasynda ótken qazaq ádebıeti men óneriniń onkúndiginde E.Brýsılovskııdiń «Qyz Jibek» mýzykalyq dramasynan Bazarbaıdyń róli men óziniń «Qyz uzatýyn» oryndap, kórermen kóńilinen shyqqan. N.Gogoldiń «Revızoryndaǵy» Dýanbasy, M.Áýezov pen L. S. Sobolevtiń «Abaı» tragedııasyndaǵy Abaı, M.Áýezov pen Á.Ábishevtiń «Namys gvardııasyndaǵy» general Panfılov, Ǵ.Músirepovtiń «Amangeldisindegi» Ábdiǵappar bolys, Ý.Shekspırdiń «Asaýǵa tusaýynda» momaqan Baptısta — akter oıynynda kórkemdik sheshimin tapqan som tulǵalar. Árbir róldiń ózine tán qaıtalanbas qımyl-qozǵalysyn, minezi men ishki-syrtqy jan qubylystaryn dál taýyp, oınaý — Qýanyshbaev shyǵarmalarynyń bir ereksheligi. Onyń radıo, estrada úshin jazǵan shaǵyn kúldirgi áńgime-pesalar men óleń-syqaqtary, taqpaq-qaǵytpalary «Túıregish» jáne «Shansharlar» degen atpen jaryq kórgen.
1937 jyldan kórkem fılmderge túsip, qazaqtyń ulttyq kıno ónerin damytýǵa mol úles qosqan.