25 iske qatysy bar: Almatyda alaıaq «arzanǵa jer satqan»

ALMATY. QazAqparat – Almatyda arzan baǵaǵa jer satyp alýdy usynǵan áıel jurtty 22 mln teńgege aldaǵan. Qazirgi tańda onyń 25 qylmysqa qatysy bary anyqtaldy, dep habarlaıdy QazAqparat tilshisi.

Almaty qalalyq Polıtsııa departamentiniń málimetinshe, asa iri kólemde alaıaqtyq jasady degen kúdikpen Batys Qazaqstan oblysynyń týmasy, 53 jastaǵy R. esimdi áıel ustaldy
«25 jábirlenýshige keltirilgen jalpy materıaldyq shyǵyn 22 mln teńgeden asady. Kúdikti QR Qylmystyq-protsestik kodeksiniń 128-babyna sáıkes, ýaqytsha ustaý ızolıatoryna qamaldy. Tergeýdiń osy kezeńinde kúdikti áıel azamattardyń senimine kirip, olarǵa jer telimderin naryqtan tómen baǵaǵa satyp alýdy usynǵany anyqtaldy. Ol «áleýetti klıentterden» bastapqy jarnany alyp otyrǵan, onyń somasy jer teliminiń ornalasqan jerine baılanysty edi. Áıel aqshany alǵannan keıin habarsyz ketken. Qazirgi tańda 25 qylmystyq epızod anyqtaldy», – dedi Alataý aýdandyq polıtsııa basqarmasynyń bastyǵy Talǵat Berkinbaev.
Polıtsııa qyzmetkerleri kúdikti áıeldiń qalanyń basqa da jerlerinde osyǵan uqsas qylmysqa qatysy bar ekenin joqqa shyǵarmaıdy. Osyǵan baılanysty myna telefon nómirlerine habarlasýdy suraıdy: 8-702-448-63-37 jáne 227-55-02.