24 tamyzdan bastap Qazaqstanda «Negizgi Zań aptasy» jobasy ótedi
«Konstıtýtsııanyń tarıhyna, 25 jyl ishindegi adamnyń konstıtýtsııalyq quqyqtarynyń damýyna arnalǵan derekti fılmder daıyndaldy. Barlyq óńirlerde konferentsııalar, dóńgelek ústelder, dárister, ashyq sabaqtar jáne basqa da is-sharalar ótýde. Olarǵa eńbek ujymdary, JOO, kolledj jáne mektep oqýshylary tartyldy. Konstıtýtsııalyq Keńes BǴM-men birlese otyryp, joǵary oqý oryndarynyń zań fakýltetteriniń stýdentteri arasynda konstıtýtsııalyq damý máselelerine arnalǵan úzdik jumysqa konkýrs ótkizdi», - dedi QR Konstıtýtsııalyq Keńesiniń múshesi Únzıla Shapaq.
Óz kezeginde QR Konstıtýtsııalyq Keńesi apparatynyń basshysy Baqyt Nurmuhanov Konstıtýtsııalyq Keńes Negizgi Zańnyń 25 jyldyǵynyń biryńǵaı logotıpin ázirlegenin atap ótti. Respýblıka Konstıtýtsııasynyń 25 jyldyǵyn ótkizý jónindegi ulttyq is-sharalar josparyna sáıkes bıyldyń basynan beri josparly jumys atqarylyp jatyr.
Onyń sózine qaraǵanda, Konstıtýtsııalyq Keńes bıylǵy 24 tamyzdan bastap «Negizgi Zań aptasy» jobasyn ótkizedi. Jobanyń maqsaty – qoǵam men memleketti jańǵyrtýdaǵy Konstıtýtsııanyń rólin tereń uǵyný, halyqtyń konstıtýtsııalyq mádenıetin arttyrý.
Osy joba aıasynda búkil el boıynsha onlaın konferentsııalar, tegin zań konsýltatsııalary, vebınarlar, qaıyrymdylyq aktsııalary, jańa obektilerdi paıdalanýǵa berý, páterlerdiń kiltterin, kýálikterdi tabys etý, demeýshilik kómek kórsetý jáne basqa da is-sharalar uıymdastyrylatyn bolady. Eldegi epıdemıologııalyq jaǵdaıǵa qaraı barlyq sharalar onlaın rejımde ótedi.
Baǵdarlamada Negizgi Zańnyń mereıtoıyna arnap shyǵarylǵan kitaptardyń tanystyrylymyn ótkizý kózdelgen. Ulttyq bank 25 tamyzdan bastap nomınaldyq quny 100 jáne 200 teńge bolatyn jańa mereıtoılyq monetalardy aınalymǵa shyǵarýdy josparlap otyr.
«Qazposhta» AQ «Estelik jáne mereıtoılyq datalar» serııasy boıynsha poshta markasyn aınalymǵa engizedi.
Bıylǵy 27 tamyzynda Konstıtýtsııa Kúnine arnalǵan negizgi shara retinde «HHІ ǵasyrdyń Konstıtýtsııasy – quqyq ústemdigi, adam qundylyǵy jáne memleket tıimdiligi» taqyrybynda halyqaralyq konferentsııa ótkizý kózdelgen.
Konferentsııa aıasynda Azııalyq konstıtýtsııalyq sottar qaýymdastyǵynyń (18 el) 4-shi Kongresi ótedi. Konferentsııa jumysyna Konstıtýtsııalyq baqylaý organdary Eýrazııalyq qaýymdastyǵynyń (9 el) músheleri de qatysady dep kútilýde. Qazirgi ýaqytta Konstıtýtsııalyq Keńes 2 mlrd-tan astam halqy bar, 20-dan astam eldi qamtıtyn osy qaýymdastyqtarǵa tóraǵalyq etedi.
Negizinen álemniń barlyq kontınentteriniń jetekshi zańgerleri odan ári konstıtýtsııalyq-quqyqtyq damýdyń ózekti máselelerin, onyń ishinde koronavırýs pandemııasyna baılanysty máselelerdi talqylaıtyn bolady.
Sonymen qatar, QR Prezıdentiniń Arhıvi «Qazaqstan Respýblıkasynyń Konstıtýtsııasy – memlekettiń turaqtylyǵy men órkendeýiniń negizi» atty tarıhı-qujattyq kórmeni uıymdastyrady.
Mádenıet jáne sport mınıstrligi Respýblıka Konstıtýtsııasynyń 25 jyldyǵyna arnalǵan onlaın kontsert daıyndaýda. Ol memlekettik mereke qarsańynda telearnalar arqyly kórsetiletin bolady.