24 saǵatty 28 saǵatqa qalaı aınaldyrýǵa bolady — Sarapshylar keńesi

ASTANA. KAZINFORM — Bir kúnge 28 saǵatty syıdyrýǵa bolady. «Búgin LIVE» jobasynyń kezekti sanyna qonaq bolǵan sarapshylar dál osylaı deıdi.

Taım-menedjment jáne josparlaý boıynsha maman Áıkerim Ońdasova ýaqytyn basqara almaıtyn adam ómirin de basqara almaıtynyn aıtady.

— Ýaqyt — bizdegi eń qymbat emes, baǵasyz resýrs. Sondyqtan óz ýaqytyńyzdy durystap josparlap, ómirińizdi rahattanyp ótkizý úshin taım-menedjment — eń qajetti qural. Eń birinshi — ózińizdi jaqsy bilýińiz kerek. Siz ýaqyttan ne suraısyz? Ómirińizdi qalaı ótkizgińiz keledi? Ár adam taım-menedjmentti ózine yńǵaılap jasaıdy. Negizinen álemde 60% adam uıqyny jaqsy kóredi. Jetistikke jetken adamdardyń kóbi kesh turatyn adamdar. Biraq ózi kesh tursa da, sony jaqsy ádetter arqyly tıimdi qoldana biletinder bar. Mysaly, kúndizgi 1-2-ge deıin uıyqtaıtyn adamdar bar. Olar uıqysynan turǵan ýaqyttan bastap ne isteıtinin aldyn ala josparlaý kerek. Uıqydan turǵan kezde-aq ne isteıtinińizdi bilseńiz, kúnińiz óte jemisti ótedi, — deıdi maman.

Áıkerim Ońdasova 24 saǵatty qalaı 28 saǵatqa aınaldyrýǵa bolatynyn jetkizdi.

— 24 saǵatty qalaı 28 saǵat jasaý kerek? Energııańyzdy bosqa qurtpańyz. «Meniń energııam qaıda ketip jatyr?» degen suraq qoıyńyz. Mysaly, múmkin bir agressııalarǵa, bos sózderge, ýaıymǵa qurtyp jatqan shyǵarsyz. Onyń bári — energııa. Ózińdi bireýmen salystyrý da — energııa. Sondyqtan sol energııalardyń bárin jınap alyp, jaqsy baǵytta jumsasańyzdar, sizderdiń saǵattaryńyz ózinen ózi kóbeıe beredi, — deıdi ol.

Al Google kompanııasynyń agenti Nurjol Tabıǵat taım-menedjmentte eń basty másele — resýrsty durys jumsaý degen pikir bildirdi.

— Aldymen kóp ýaqyt almaıtyn jáne jyldam oryndalatyn tapsyrmalardy oryndaý kerek. Odan keıin tapsyrmalardy prıorıtettep, aldymen mańyzdylaryn jasaý qajet. Keıde kóp aýyr tapsyrmalardy úıip almaı, kezekpen kúnine 2 úlken tapsyrma oryndaý jetkilikti. Al bul tapsyrmalardy oryndaýdyń alǵysharty — ol, árıne, durys maqsat qoıý. Jáne ol maqsatqa jetý úshin durys resýrstarmen ózińdi qamtamasyz etý. Bul — eń birinshi másele. Sebebi qanshalyqty durys maqsat qoıyp, qanshalyqty ýaqytty josparlaǵanmen, resýrs sáıkes kelmese, ol jumys uzaqqa sozylyp ketedi. Sol sebepti, resýrsty durys josparlaý óte mańyzdy, — deıdi Google kompanııasynyń agenti.

Nurjol Tabıǵat kúnine nebári 3-4 saǵat jumys isteıdi. Bul onyń materıaldyq qajettilikterin tolyqtaı óteýge jetkilikti eken.

— Eń birinshi — durys maqsat qoıý kerek. Ol maqsatqa jetý úshin durys resýrspen ózińizdi qamtamasyz etseńiz, asa bir kóp ýaqyt jumys isteýdiń qajeti joq. Kóp jumys isteseńiz, ózińizdi qınap alýyńyz múmkin. Motıvatsııa joǵalýy múmkin. Keıin adamnyń túısigi sol jumysqa degen negatıvti kózqaras qalyptastyrady, — deıdi Nurjol.

Stýdııa qonaǵy taım-menedjment ár ulttyń mentalıtetine de saı kelýi kerektigin aıtady.

— Batys pen Shyǵys elderiniń mentalıtetteri ártúrli bolǵandyqtan, bizdiń kitapta oqıtyn barlyq metodıka bizge sáıkes kele bermeıdi. Sondyqtan bizdiń ádet-ǵuryptarymyzdy da eskerý qajet. Men «Gıps refleksııasy» degen metodıkany kóp qoldanamyn. Ol — Gıps degen brıtandyq ǵalym. Ol kisiniń alǵa tartqan basty máselesi — problemanyń saldarymen emes, sebebimen jumys isteý. Ol qaıtalanbaý úshin. Sol máselege men kóbirek kóńil bólemin. Maǵan unamaǵan nárselerdiń tizimin anyqtap, onyń sebebi nede, ne úshin ondaı jaǵdaı boldy — sony anyqtap, kelesi joly qaıtalanbaý úshin máseleniń aldyn alamyn, — deıdi maman.

Bloger Jazıra Omarova da 5 balamen qosa ózge sharýalaryna úlgerý úshin taım-menedjment tehnıkalaryn qoldanady eken.

— Tórtinshi balamdy dúnıege ákelgen soń, jumystarymdy bitirýge ýaqytym jetpeı bastady. Sol kezden bastap men ýaqytty qalaı únemdeý keregin izdene bastadym. Túrli sıstemalardy ózimnen ótkizdim. Arasynda eń unaǵany — kóp adam kózge ile bermeıtin áıelderge arnalǵan taım-menedjment taqyryby. Ol — «Flaı Ledı» degen júıe. Avtory — amerıkalyq Marla Sıllı. Sol júıe maǵan óte kómektesip, men óz ómirimdi aıtarlyqtaı júıege keltirdim. Taım-menedjmentke arnalǵan kóp kitap kóbine jumys isteıtin er adamdarǵa arnalǵan sııaqty bolyp kórindi. Al áıel adamnyń bala tárbıesi, úı sharýasy — onyń bárin birge alyp júrý ońaı emes. «Flaı Ledı» júıesi ár áıel adamnyń sharýasyna egjeı-tegjeıli toqtalady. Ol arqyly siz barlyq ádetterińizdi ózgertesiz, — deıdi bloger.

Kóp balaly ana óziniń ýaqytyn qalaı únemdeıtinin aıtyp berdi.

— Mysaly, tańerteń turǵanda biz mán bermesek te, avtomatty túrde tisimizdi tazalaımyz. Sol sııaqty úı sharýasyn da avtomatty túrge aýystyrýǵa bolady. Mysaly, jýynyp turyp qol jýǵyshty súrtip jiberýge nemese keshke sháınekti sýǵa toltyryp qoıýǵa bolady. Ol kóp ýaqytty almaıdy. Biraq tańerteń oıanǵanda kelip, túımesin basa salasyń. Esesine, tańerteń turǵanda as úıińiz tap-taza turady. Kóńil kúıińiz de ózgeredi. Negizi bul sıstemanyń eń birinshi aıtary — ol úı sharýasyna degen kózqarasyńdy ózgertý. Biz úı sharýasy bitpeıdi dep oılap úırenip qalǵanbyz ǵoı. Sol úshin jumysty bastamaı jatyp kóńil kúıimiz túsip turady. Al bul tásilmen ár istegen isińdi úlken yjdahattylyqpen isteısiń. Maǵan qatty unaıtyn tásildiń biri — úı tirligin bastamas buryn aıaǵyńa baýly aıaq kıim kııý. Bul seni fokýsta ustap turady, jınaqylyqqa úıretedi. ıAǵnı aıaq kıim kıip júrip, jumysty tastap jata qalmaısyń, otyra salmaısyń. Ol — seniń esińe únemi jumysyń bar ekenin, aldyńa qoıǵan maqsatyńnyń baryn salyp turady. Solaı ýaqytty únemdi paıdalaný kerek, — deıdi Jazıra Omarova.

Eske sala keteıik, ótken joly «Búgin LIVE» baǵdarlamasynyń qonaqtary áke bolýdyń laıfhaktarymen bólisken edi.

Odan bólek, mamandar daryndy balany qalaı tárbıeleý kerektigin de aıtty.