24 aqpan. Jylnama
Kazinform oqyrman nazaryna 24 aqpanǵa arnalǵan ataýly kúnder men este qalar oqıǵalar kúntizbesin usynady.
ESTE QALAR OQIǴALAR
1917 jyly Torǵaı dalasynda ataqty Doǵal shaıqasy boldy. Bul Amangeldi Imanov bastaǵan ult-azattyq qozǵalysyndaǵy eń iri shaıqas sanalady. Shaıqasta Amangeldimen qatar, onyń jaýynger serikteri Ybyraı Atambekov, Keıki Kókimov erekshe erlik kórsetti.
1992 jyly Qazaqstan Respýblıkasy Mınıstrler kabıneti Qazaq memlekettik balalar jáne jasóspirimder teatryna Qazaqstannyń halyq jazýshysy, Qazaqstan Ǵylym akademııasynyń akademıgi Ǵabıt Músirepovtiń esimin berý týraly sheshim qabyldady.
1992 jyly «Qazaqkıno» memlekettik kontserni quryldy. Oraz Rymjanov kontsernniń basqarma tóraǵasy bolyp saılandy.
2011 jyly Qazaqstannyń Eýropadaǵy qaýipsizdik jáne yntymaqtastyq uıymyna tóraǵalyǵynyń qorytyndysyna arnalǵan baıandama jarııalandy. Onda amerıkalyq ǵalymdardyń pikiri jazyldy.
2012 jyly Astanada Qazaqstannyń qysqy arnaıy olımpıadasy (Special Olympics) bastaldy. Oǵan Qazaqstan, Avstrııa, Reseı jáne Ózbekstannyń 320 múmkindigi shekteýli sportshysy qatysty. Ashylý saltanaty «Alaý» muz aıdyny saraıynda ótti.
2014 jyly TMD-ǵa qatysýshy memleketterdiń parlamentaralyq assambleıasy jarııalaǵan Týrızm jyly aıasynda dostastyq elderiniń eń kórikti jerleriniń tizimi jaryq kórdi. «Dostastyq injýleri» tizimine Astanadaǵy Dóńgelek alań (Qazaqstan), Bakýdegi teńiz jaǵalaýy jelegi (Ázerbaıjan), Hor Vırap monastri (Armenııa), Brest qorǵany (Belarýs), Ystyqkól kóli (Qyrǵyzstan), Eski Orheı qoryǵy (Moldova), Petergof saraı-saıabaq ansambli men Sochı qalasy (Reseı), Fan taýlary (Tájikstan), Ashhabad (Túrkimenstan) jáne Samarqandaǵy Gýr-Ámir (Ózbekstan) kirgen.
2016 jyly BBC-2 telearnasynyń Top Gear Mett tanymal baǵdarlamasynyń jańa júrgizýshileri Leblan men Krıs Evans Qazaqstandy avtoáýesqoılar úshin baǵdarlama epızody túsiretin oryndar tizimine qosty.
2017 jyly álemdegi eń ınnovatsııalyq qalalar («Innovation Cities») tiziminde Almaty «Emergina Markets» (damýshy naryqtar) atalymy boıynsha reıtıngte 15-orynnan kórindi.
2019 jyly Almatylyq baǵdarlamashy Elnur Seıitjanov eńbek naryǵyna jas mamandardy daıarlaıtyn «Decode» alǵashqy IT-mektebin ashty. «Decode» baǵdarlamalaý kýrstarynyń negizgi baǵyty – React, Redux, NodeJS, Python jáne bazalyq qajetti HTML, CSS sekildi jańa jáne suranysqa ıe tehnologııalar men tilderde Web-ázirleýshilerdi daıarlaý.
2020 jyly Qazaqstannyń birinshi raketkasy 20 jasar Elena Rybakına Áıelder tennısi qaýymdastyǵynyń (WTA) reıtınginde Qazaqstannyń jańa rekordyn resmı túrde ornatty.
2022 jyly Grýzııanyń Borjomı qalasynda Samtshe-Djavahetı jáne Imeretı konsýldyq okrýgterin qamtıtyn Qazaqstan Respýblıkasynyń Qurmetti konsýly keńsesiniń ashylý rásimi ótti. Grýzııanyń ekonomıkalyq, mádenı, týrıstik ereksheligimen áıgili aımaqtarynyń birinde Qazaqstannyń Qurmetti konsýldyǵynyń ashylýy eki eldiń dástúrli dostyq pen ózara senim rýhyndaǵy yntymaqtastyǵynyń damýyn aıǵaqtaıdy. Táýelsizdik jyldary ishinde eki memleket qarym-qatynastardyń qalyptasý kezeńin sátti eńserip, ýaǵdalastyqtardy praktıkalyq mazmunmen jáne ózara is-qımyldyń jańa baǵyttaryn izdestirýmen tolyqtyra otyryp, jańa sapaly deńgeıge shyqty.
2022 jyly Qaraǵandy tehnıkalyq ýnıversıtetiniń magıstranty Marǵulan Nurtaı medıtsına qyzmetkerleri úshin arnaıy baǵdarlama jasady. Bul ókpeniń rentgenin avtomatty túrde taldaýǵa jáne suryptaýǵa múmkindik beredi. «Ońtaılandyrý jáne gradıentti túsirý ádisi (qateni keri taratý) arqyly men neırondyq jelige sýretterdi taldaýdy úırettim. Nátıjesinde meniń jikteýishimdi belgili aýrýlardyń tórt klasyna beıimdeýge múmkindik týdy», deıdi magıstrant. Ázirlemeni engizý dárigerlerge júktemeni aıtarlyqtaı tómendetýge múmkindik beredi. Bul dárigerlerge egjeı-tegjeıli zertteýdi qajet etetin patsıentterdiń sýretterin jiberýge kómektesedi. Deni saý adamdardyń sýretterin dárigerlerdiń qatysýynsyz avtomatty túrde óńdeýge bolady.
2023 jyly Astanada Sultan Beıbarys kóshesiniń saltanatty ashylýy boldy. Osydan 800 jyl buryn, HІІІ ǵasyrda Beıbarys tutqynǵa túsip, Ejelgi Mysyr jerine jer aýdarylǵan, onda ol eldi buryn-sońdy bolmaǵan órkendeýge jetkize aldy.
Beıbarys Sultan – qazaq halqynyń uly tulǵasy. Qazaq dalasynyń týmasy ózge memlekettiń gúldenýine úles qosyp, týǵan jerine oraldy.
