23 jastaǵy qyzylordalyq dúnıege úshem ákeldi
QYZYLORDA. KAZINFORM – Kópbeıindi Qyzylorda oblystyq aýrýhanasynda Hadııa, Hafız, Hamza esimdi úshem dúnıege keldi. Bul týraly aýrýhananyń baspasóz qyzmeti habarlady.
Qyzylorda qalasynyń turǵyny Ásel Sabyrbaeva 23 jasynda osylaısha alǵashqy sábıin dúnıege ákeldi. Jas anany akýsherlik bólim meńgerýshisi Arman Erjanova men akýsher-gınekolog Fatıma Qosnazarova bosandyrdy. Nárestelerdiń arasynan qyz balanyń salmaǵy 1 996, er balaniki 1938, úshinshi er balaniki 1918 gramm boldy.
- Júktiliktiń 35 aptasynda, ıaǵnı merziminen buryn bosandy. Nárestelerdiń jaǵdaıy aýyr boldy. Jansaqtaý bóliminde 2 kún apparatta jatty. Olardyń ókpesin damytý úshin dári berildi, - dedi aýrýhananyń jańa týǵan nárestelerdiń reanımatsııa jáne patologııa bólimshesiniń meńgerýshisi Indıra Bekjanova.
Aýrýhananyń baspasóz qyzmeti habarlaǵandaı, úshemniń densaýlyǵyn jaqsartý úshin mamandar joǵary sapaly medıtsınalyq kómek kórsetti. Qazir nárestelerdiń jaǵdaılary turaqty. Anasymen birge palatada ana sútimen qorektenip jatyr.
Aıta ketý kerek, aýrýhananyń akýsherlik bóliminde jyl basynan beri 1343 náreste dúnıege kelgen. Sonyń 537-si osy bólimshede qosymsha em alǵan.
Buǵan deıin Túrkistan oblysynyń Saýran aýdanyna qarasty Oranǵaı aýylyndaǵy Israılovtar otbasynda úshem – bir ul jáne eki qyz dúnıege keldi.