22 shilde. Jylnama
Kazinform oqyrman nazaryna 22 shildege arnalǵan ataýly kúnder men este qalar oqıǵalar kúntizbesin usynady.
ATAÝLY KÚNDER
Búkilálemdik mı kúni
Bul kúndi Dúnıejúzilik nevrologtar federatsııasy bekitti. Alǵash ret 2014 jyly 22 shildede ótkizildi.
ESTE QALAR OQIǴALAR
1939 jyly Atyraý oblystyq ólketaný murajaıy ashyldy. Onyń qorynda ólke, tabıǵat, mádenıet pen óner jádigerleriniń 50 myńnan astam túri bar.
1992 jyly Qazaqstan men Ýkraına arasynda dıplomatııalyq qarym-qatynas ornady.
1993 jyly Qazaqstan Respýblıkasy jáne burynǵy odaqtas respýblıkalardyń sharýashylyq sýbektileriniń arasyndaǵy esepterdi rettestirý maqsatynda QR Mınıstrler Kabıneti jáne QR Ulttyq banki Qazaqstandaǵy sharýashylyq sýbektilerine shart jasasyp, saýda mámilelerin iske asyrý kezinde buryn SSSR quramyna kirgen ár respýblıkada óz qolma-qol aqshasyz rýbliniń jáne ulttyq valıýtasynyń aınalymda bolǵanyn, sondaı-aq olardyń qolma-qol aqshasyz «Qazaqstan rýbline» aınaldyrylatyn baǵamyn eskerýdi mindettedi. «Qazaqstan rýbliniń» baǵamyn Ulttyq bank resmı baǵam retinde belgilep otyrdy.
2009 jyly Atyraýda Jaıyq ózeniniń ústimen ótetin jańa eki kópirdi paıdalanýǵa berý saltanatty rásimi ótti. Jalpy uzyndyǵy 800 metr bolatyn bir kópir «Prıvokzalnyı» shaǵyn aýdanyn áýejaımen jalǵastyrdy. Kópirdegi qozǵalys tórt jolaqty, onyń táýligine 5 myń avtomobıldi ótkizý múmkindigi bar. Jolaýshylar úshin eni 2,5 metrlik aıaqjoldar kózdelgen. Ekinshi kópir «Jılgorodok» shaǵyn aýdanynda qalanyń eýropalyq jáne azııalyq bólikterin qosty. Onyń jalpy uzyndyǵy - 693 metr. Ol da táýligine kemine 5 myń avtomobıldi ótkizýge eseptelgen.
2010 jyly Eńbekshiqazaq aýdanynyń Aqshı aýylynda temirshi Dárkembaı Shoqparulynyń atyndaǵy Qoldanbaly óner mýzeıi ashyldy. Biregeı mýzeıdiń bir bóliminde belgili temirshi D.Shoqparulynyń óz qolymen jasaǵan buıymdary, jınaǵan zattary, onyń ómiri men shyǵarmashylyǵyna arnalǵan kitaptar, gazet-jýrnal maqalalary, vıdeofılm dıskileri bar. D. Shoqparuly – qoldanbaly ónerdiń tanymal sheberi, etnograf ǵalym, QR Sýretshileri jáne dızaınerleri odaǵynyń múshesi, Qazaqstannyń Lenın komsomoly syılyǵynyń laýreaty.
2013 jyly Oralhan Bókeıdiń 70 jyldyǵyna arnap, jazýshynyń eksklıýzıvti tańdamaly shyǵarmalar jınaǵyn shyǵardy. Onyń shyǵarmalary orys, aǵylshyn, frantsýz, nemis, japon, arab, qytaı jáne basqa da shetel tilderine aýdaryldy.
2014 jyly Qazaqstannyń 8 nysany - Almaty oblysyndaǵy Qaıalyq, Qaramergen, Talǵar jáne Jambyl oblysyndaǵy Aqtóbe, Stepnınskoe, Aqyrtas, Qulan, Qostóbe, Órnek ıÝNESKO-nyń álemdik muralar tizimine engizildi.
2014 jyly Astana qalasynyń ákimi Imanǵalı Tasmaǵambetovke Qazaqstan men ıÝNESKO arasyndaǵy qarym-qatynastyń nyǵaıýyna qosqan úlesi úshin ıÝNESKO-nyń «Uly Jibek joly» kúmis medali tabys etildi. I. Tasmaǵambetov 18 jyl boıy ıÝNESKO Ulttyq komıssııasyn basqarǵan, al «Uly Jibek joly» medali sońǵy 20 jyl boıy eshkimge tabystalmaǵan.
2015 jyly Almatynyń 1000 jyldyǵy ıÝNESKO-nyń mereıtoılyq datalar tizimine engizildi.
2017 jyly «Eýrazııa» HІІІ Halyqaralyq kınofestıvaliniń uıymdastyrý komıteti «Kınematograf ónerine qosqan úlesi úshin» syılyǵyn bekitti. Osynaý joǵary nagrada qazaq óneriniń aty ańyzǵa aınalǵan juldyzy, halyq ártisi Bıbigúl Tólegenovaǵa tabystaldy.
2017 jyly Túrkııanyń Qara teńiz jaǵasyndaǵy Samsýn qalasynda álemniń 97 elinen jınalǵan 3105 sportshy arasyndaǵy HІІІ Sýrdlımpıada oıyndary bastaldy. Qazaqstan atynan jarysqa qostanaılyqtar – múkis sportshylar arasyndaǵy 2016 jylǵy álem chempıonatynyń kúmis júldegerleri Danııar Eskendirov pen Qanat Qońqabaev qatysyp, qola medaldy ıelendi.
2018 jyly qazaqtyń tanymal aqyny, ánshisi ári kompozıtory Estaı Berkimbaevtyń urpaqtary Ekibastuzdaǵy mýzeıge onyń jeke zattaryn tabystady. 1939 jyly Estaı Almatyda Jazýshylar odaǵynyń otyrysyna qatysqan kezde eki chemodan satyp alǵan. Sonyń birin nemeresi Zeken apaıǵa, ekinshisin nemere aǵasy Qyzdarbek ataǵa syılaǵan. Qyzdarbek atanyń nemereleri chemodandy mýzeıge ákeldi. Estaı Berkimbaev (1874-1946) - qazaqtyń tanymal aqyny, ánshisi ári kompozıtory, Qazaqstan Kompozıtorlar odaǵynyń alǵashqy músheleriniń biri (1939), Qazaq SSR eńbek sińirgen óner qaıratkeri (1939).
2019 jyly Nur-Sultan qalasynda Qazaqstan Respýblıkasy Prezıdenti janyndaǵy Ortalyq kommýnıkatsııalar qyzmeti – memlekettik aqparattyq kommýnıkatsııalyq alań quryldy. Onyń maqsaty – memlekettik bılik organdary men qoǵamnyń ózara is-qımylynyń tıimdi tetigin qurý, sondaı-aq memlekettik organdar men buqaralyq aqparat quraldarynyń ózara qarym-qatynasyn qamtamasyz etý.
2021 jyly Dımash Qudaıbergen «Jańa tolqyn-2021» halyqaralyq jas oryndaýshylar baıqaýynyń qazylar alqasyna qosyldy. Baıqaý fınalyna Avstralııa, Armenııa, Belarýs, Bolgarııa, Grýzııa, Ispanııa, Italııa, Qazaqstan, Nıderlandy jáne Reseı oryndaýshylary kirdi. «Jańa tolqyn-2021» baıqaýynda elimizdiń atynan Qazaqstandaǵy klassıkalyq jáne tanymal mýzyka elementteriniń sıntezi bolyp tabylatyn klassıkalyq krossover – mýzykalyq stıl baǵytynda jumys isteıtin birinshi vokaldyq top – Mezzo toby qatysty.
2023 jyly Chhanvon qalasynda (Ońtústik Koreıa) ótken oq atýdan jasóspirimder arasyndaǵy álem chempıonatynda Qazaqstan quramasynyń qorjyny 4 medalmen tolyqty. Olardyń arasynda qyzdardyń komandalyq jarysta alǵan eń joǵary standartty medali erekshe qundy boldy. Pnevmatıkalyq myltyqpen 10 metr qashyqtyqtan qozǵalatyn nysanaǵa atý boıynsha Qazaqstan qyzdar quramasyna teń keler eshkim bolmady, fınalda Ýkraına ókilderin utty. Álem chempıony ataǵyn apaly-sińlili Zýhra men Fatıma Irnazarovalar, sondaı-aq el namysyn qorǵaǵan Aleksandra Sádýaqasova ıelendi. Qazaqstandyq atqyshtar trıosy bul jattyǵýda eresekter arasynda álemdik rekord ornatty (1686 upaı).
