21–27 shilde kúnderi Qazaqstan sportshylary qandaı iri jarystarǵa qatysady
ASTANA. KAZINFORM — Apta ishinde qazaqstandyq sportshylar toǵyzqumalaq, semserlesý, taekvondo, esý, belbeý kúresi, dzıýdo jáne fıdjıtal sport túrlerinen halyqaralyq jáne ulttyq deńgeıdegi jarystarǵa qatysady. Mádenıet jáne sport mınıstrligi aldaǵy aptadaǵy jarys kestesin nazarlaryńyzǵa usynady.
21–30 shilde – Toǵyzqumalaqtan Álem kýbogi
Chehııanyń Pardýbıtse qalasynda ótetin jarysqa Qazaqstanmen qatar, Chehııa, Rýmynııa, Túrkııa, Qyrǵyzstan, Majarstan, Polsha, Aýstrııa, Slovakııa, Moldova, Bolgarııa jáne Serbııadan 50-ge jýyq sportshy qatysady.
22–30 shilde – Semserlesýden eresekter arasyndaǵy álem chempıonaty
Grýzııanyń Tbılısı qalasynda ótetin álem birinshiliginde Qazaqstan quramasynan 24 sportshy óner kórsetedi.
22–29 shilde – Taekvondodan kadetter men jasóspirimder arasyndaǵy Azııa chempıonaty
Malaızııanyń Kýchıng qalasynda ótetin jarysta elimizdiń namysyn 14 sportshy qorǵaıdy.
23–27 shilde – Baıdarka men kanoe esýden jastar jáne U23 arasyndaǵy álem chempıonaty
Portýgalııanyń Montemor-ý-Velıý qalasyndaǵy jarysqa Qazaqstannan 18 sportshy qatysady.
24–27 shilde – Belbeý kúresinen erler men áıelder arasyndaǵy Qazaqstan kýbogi
Aqtaýda ótetin ulttyq dodada elimizdiń 16 óńirinen 250-ge jýyq sportshy baq synaıdy.
25–27 shilde – Dzıýdodan Grand Slam halyqaralyq týrnıri
Mońǵolııanyń Ulan-Batyr qalasyndaǵy baıraqty básekede Qazaqstannan 7 dzıýdoshy tatamıge shyǵady.
21–26 shilde – Phygital Games 2025 irikteý týrnıri
Astanadaǵy J.Úshkempirov atyndaǵy jekpe-jek saraıynda ótetin respýblıkalyq týrnırge elimizdiń 6 óńirinen 16 komanda qatysady. Jarys fıdjıtal-fýtbol jáne fıdjıtal-basketbol baǵytynda ótedi.
Aıta keteıik, Vengrııadaǵy týrnırde grek-rım kúresinen Qazaqstan quramasy ekinshi oryn aldy.