210 myń talapker UBT tapsyrdy
ASTANA. KAZINFORM – 210 myńnan astam talapker 2025 jylǵy negizgi Ulttyq biryńǵaı testileýdi tapsyrdy. Onyń ishinde 76,5%-ǵa jýyǵy qazaq tilinde, 23,5%-y orys tilinde, 149 adam aǵylshyn tilinde testileýden ótti.
Ǵylym jáne joǵary bilim mınıstrliginiń málimetinshe, talapkerlerge negizgi UBT-ny eki ret tapsyryp, eń úzdik nátıjemen grant konkýrsyna qatysý múmkindigi usynylǵan. Osylaısha, 210 myń talapker UBT-ny 381 myń ret tapsyrdy.
Testileý qorytyndysy boıynsha 161 myńǵa jýyq talapker shekti ball jınady, bul qatysýshylardyń jalpy sanynyń 76%-yn quraıdy. Bes pán boıynsha UBT-nyń ortasha baly 69 baldy qurady. Eń joǵary 140 baldy UBT-ny ótkizýdiń birinshi aptasynda Túrkistan oblysynyń túlegi Ábilhan Jánibek jınady. 598 adam 130 baldan joǵary nátıjege qol jetkizdi.
Erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda UBT-ǵa 681 talapker qatysqanyn aıta ketken jón.
Elektrondy formatta ótetin UBT-da apellıatsııaǵa berý ońaı, ári yńǵaıly. Testileý qorytyndylarymen kelispegen jaǵdaıda talapker birden apellıatsııaǵa elektrondyq formatta ótinish beredi. Bıyl apellıatsııaǵa 92 myńnan astam ótinish qabyldanyp, olardyń ishinde 104 biregeı test tapsyrmasyna qatysty ótinishter qanaǵattandyryldy. Respýblıkalyq komıssııa jumysyn aıaqtady, talapkerlerdiń sertıfıkattary jeke kabınette qoljetimdi.
– UBT ótkizý kezeńinde 711 ereje buzýshylyq tirkeldi. Tyıym salynǵan qurylǵylardy – smartfondar, smart-saǵattar, mıkroqulaqqaptar men shpargalkalar alyp ótýge tyrysý jaǵdaılary jıi boldy. Osy sebepterge baılanysty 326 talapker testileýden óte almady. Testileý barysynda aýdıtorııalardan 380 qatysýshy shyǵarylyp, olardyń nátıjeleri de joıyldy. Beınejazbalardy qaraý nátıjesinde qosymsha taǵy 5 adamnyń nátıjeleri joıyldy, - delingen mınıstrlik habarlamasynda.
Beınejazbalarǵa taldaý júrgizý osy jyldyń 31 qazanyna deıin jalǵasady. Bul barlyq qatysýshy úshin nátıjelerdiń adaldyǵy men obektıvtiligin qamtamasyz etýge múmkindik beredi.
Eske sala keteıik, buǵan deıin UBT tapsyrýǵa qosymsha ótinish qabyldaý protsesi bastalǵanyn jazǵan edik.