21 jasynda «tissiz qalǵan» klıent: «Otbasy bank» BJZQ aqshasyna tis emdetýge nege tyıym salynǵanyn túsindirdi
ASTANA. KAZINFORM – Otbasyn bank Densaýlyq saqtaý mınıstrliginiń BJZQ jınaǵyndaǵy shekti mólsherden artylǵan somany tis emine jumsaýǵa nege tyıym salǵaly otyrǵanyn túsindirdi.
Densaýmınniń biryńǵaı jınaqtyq zeınetaqy qorynyń salymshylaryna shotyndaǵy shekti mólsherden artylǵan somany tis emdeý shyǵyndaryna jumsaýǵa tyıym salatyn qujat jobasyn qoǵamdyq talqylaýǵa shyǵarǵanyn jazǵanbyz. «Otbasy bank» osy sharanyń ne úshin qajet ekenin túsindirdi.
«23 shildedegi jaǵdaı boıynsha "Otbasy bank" arqyly emdelýge 435,1 mlrd teńge kóleminde birjolǵy zeınetaqy tólemderi paıdalanyldy. Bul somanyń shamamen 98%-y stomatologııalyq qyzmetterge tıesili - tis protezdeý jáne ımplantatsııa. Alaıda halyqtyń emdelýge jumsaǵan birjolǵy zeınetaqy tólemderin tekserý kezinde maqsatsyz paıdalaný jaǵdaılary anyqtaldy. Bank birqatar kúdikti shemalardyń belgilerin anyqtap, olar boıynsha ishki tekserýler júrgizdi. Іstiń qolda bar materıaldarymen bank kúdikti adamdardy anyqtaý jáne olardy jaýapqa tartý úshin quqyq qorǵaý organdaryna júgindi.
Osylaısha, kórsetilgen qyzmetterge aqy tóleý túrinde keıbir stomatologııalyq klınıkalar azamattarǵa qolma-qol aqsha alýǵa kómektesken. Bul zeınetaqy tólemderin maqsatsyz paıdalaný», - dep jazylǵan «Otbasy bank» túsindirmesinde.
Bank málimetine súıensek, keıbir stomatologııalyq klınıkalar kúnine 70-ten astam klıent qabyldaǵan. Alaıda bul medıtsınalyq mekemelerdiń munsha emdelýshini qabyldap, tıisti qyzmet kórsetetindeı áleýeti bolmasa kerek.
«Otbasy bank» saraptamasy jeke klınıkalardyń qyzmet kórsetý zańdylyǵyna kúmán keltiretin birneshe faktini anyqtaǵan. Olar:
- stomatologııalyq klınıkalardyń ornalasqan mekenjaıy klıentterdiń turǵylyqty mekenjaıy men medıtsınalyq tirkeýine sáıkes kelmegen;
- qyzmet kórsetilgeni týraly qujattardaǵy málimetterdiń rastalmaýy;
- keıbir klıentter zeınetaqy tólemderin eshqandaı stomatologııalyq qyzmet almaı, deldaldar arqyly jáne aqshalaı syıaqy tólep alǵandaryn moıyndaǵan.
«21 jastaǵy qazaqstandyqqa «tolyq adentııa», ıaǵnı tisterdiń tolyq bolmaýy dıagnozy qoıylǵany anyqtaldy. Sonymen qatar, dárigerlik komıssııanyń qorytyndysynda oǵan emdeýdiń kelesi túrleri usynyldy – tisterdi tazartý, breket ornatý.
Biryńǵaı zeınetaqy tólemderin paıdalaný kezinde zańǵa qarsy is-áreketterdiń jáne jappaı maqsatsyz paıdalaný faktileriniń bolýyn eskere otyryp, Otbasy bank mundaı faktilerdiń jolyn qııý úshin qajetti sharalardy qolǵa alý týraly usynys bildirdi», - delingen resmı málimette.
«Otbasy banktiń» basqarma tóraǵasy Lázzat Ibragımova qazaqstandyqtar arasynda BJZQ aqshasy týraly jańsaq túsinik bar ekenin aıtady.
«Biz 2021-2024 jyldar aralyǵynda BJZQ qarajatyna eń kóp qyzmet kórsetken 25 stomatologııalyq klınıkanyń memleketke 63 mln teńge ǵana salyq tólegenin anyqtadyq. Al BJZQ qarajaty esebinen kórsetilgen qyzmetter kólemi shamamen 91 mlrd teńge bolǵan. ıAǵnı, salyq júktemesi nebári 0,07% ǵana. Bizdiń oıymyzsha, bul stomatologııalyq klınıkalar tarapynan kórsetiletin qyzmetterdiń, ásirese, protezdeý jáne ımplantatsııalaý sııaqty kúrdeli protsedýralardyń shynaıylyǵyna kúmándanýǵa sebep bolady», - deıdi Lázzat Ibragımova.
Osyny alǵa tartqan Densaýlyq saqtaý mınıstrligi 2024 jyldyń 10 tamyzynan 2025 jyldyń 1 aqpanyna deıin protezdeý jáne tis ımplantatsııalaý qyzmetterine bólingen qarajatty paıdalanýdy ýaqytsha toqtatýdy josparlap otyr.
«Osy ýaqyt ishinde bank birjolǵy zeınetaqy tólemderiniń ýákiletti operatory retinde BZT qarajatyn maqsatsyz paıdalanýdyń aldyn alý jáne stomatologııalyq qyzmet kórsetýdiń ashyqtyǵyn qamtamasyz etý boıynsha tıisti jumystardy júrgizýdi kózdep otyr», - delingen «Otbasy bank» túsindirmesinde.
