21 qyrkúıek. Jylnama
Kazinform oqyrman nazaryna 21 qyrkúıekke arnalǵan ataýly kúnder men este qalar oqıǵalar kúntizbesin usynady.
Qazaqstanda analar kúni
Bul mereke 2012 jyly resmı túrde qazaqstandyq analardy qurmetteý kúni retinde bekitilip, otbasy oshaqtarynyń saqshysy retinde áıelderdiń rólin atap ótti. Kóp uzamaı Úkimet qaýlysymen «Qazaqstan Respýblıkasyndaǵy kásiptik jáne ózge de merekeler týraly» Qazaqstan Respýblıkasy Prezıdentiniń 1998 jylǵy 20 qańtardaǵy № 3827 Jarlyǵyna ózgerister men tolyqtyrýlar engizilip, elimizde jańa mereke — Analar kúni belgilenip, ony toılaý kúni qyrkúıek aıynyń úshinshi jeksenbisi bolyp belgilendi.
Halyqaralyq beıbitshilik kúni
2002 jyldan bastap 21 qyrkúıekte merekelenedi. BUU Bas Assambleıasynyń 36-sessııasynda bekitildi. Bul kúndi merekeleý týraly sheshim BUU Bas Assambleıasynyń 55-shi sessııasynda qabyldandy. Halyqaralyq beıbitshilik kúni búkil álemde zorlyq-zombylyqsyz jáne atysty toqtatý kúni bolyp jarııalandy. Barlyq elder bul kúni áskerı áreketterden bas tartýǵa shaqyrylady.
Halyqaralyq Altsgeımer aýrýy týraly aqparat taratý kúni
Bul ataýly kún — aýrýdy zertteýmen jáne onyń damýyn báseńdetý joldaryn izdeýmen aınalysatyn uıymdardyń bastamasymen qurylǵan.
ESTE QALAR OQIǴALAR
1989 jyly 11-shi shaqyrylǵan Qazaq SSR Joǵarǵy Keńesiniń XIV sessııasy bolyp, onda «Respýblıkadaǵy saıası reformany odan ári júzege asyrý sharalary týraly» qaýly, «QazSSR Konstıtýtsııasyna (Negizgi Zańyna) ózgerister men tolyqtyrýlar engizý týraly», «QazSSR-degi tilder týraly» «QazSSR depýtattarynyń saılaýy týraly», «QazSSR halyq depýtattarynyń jergilikti keńesteriniń depýtattaryn saılaý týraly» zańdar qabyldandy (8 depýtat konstıtýtsııalyq ózgertýlerge qarsy, 26 depýtat tilder týraly zańǵa qarsy daýys berdi)7 Depýtattardy saılaý jáne qaıta shaqyrý úshin Ortalyq saılaý komıssııasy quryldy.
1993 jyly Qazaqstan Respýblıkasy men Albanııa Respýblıkasy arasyndaǵy dıplomatııalyq qarym-qatynastardy ornatý týraly nota almasý ótti.
2011 jyly Nıý-Iorkte Birikken Ulttar Uıymy Bas Assambleıasynyń 66-sessııasy óz jumysyn bastady.
2012 jyly Madrıdte «Qazaqstan jáne kıno: 1970-2011» tsıkly ashyldy, onyń aıasynda qazaqstandyq rejısserlerdiń jumysy kórsetildi. Tsıklge «Qyzǵaldaq», «Qyz Jibek», «Kóshpendiler», «Mustafa Shoqaı», «Qosh bol, Gúlsary» jáne t. b. kirdi.
2014 jyly Batys Qazaqstan oblysy Terekti aýdany aýmaǵyndaǵy Taqsaı qorǵanynan 2012 jyly aqsúıek áıeldiń qabiri tabylǵan bolatyn. Onyń beınesi qalpyna keltirilip, «Altyn hanshaıym» dep atalǵan kórme Batys Qazaqstan oblystyq tarıhı-ólketaný mýzeıine qoıyldy. Sonymen qatar kórmeden bizdiń dáýirimizge deıingi VI–V ǵasyrlarǵa jatatyn aqsúıek áıeldiń asa qundy áshekeıleri jáne turmystyq buıymdary da oryn tapty.
2016 jyly Pavlodarda oblysy ákimdigi Pavlodar memlekettik pedagogıkalyq ınstıtýtyna bergen eski ǵımaratta arheologııalyq ortalyq ashyldy. Oǵan belgili arheolog, álemge áıgili tarıhshy Álkeı Marǵulannyń esimi berildi.
2017 jyly Qaraǵandydaǵy Juldyzdar alleıasy Qazaqstannyń eńbek sińirgen qaıratkeri, Halyqaralyq Túrki mádenıeti uıymynyń (TÚRKSOI) Bas hatshysy Dúısen Qaseıinov atyndaǵy juldyzben tolyqty. Alleıada ashylǵan segizinshi ataýly belginiń aty qurmetti kitapqa engizilgen.
2017 jyly Qazaqstan Halyqaralyq zeınetaqy jáne áleýmettik qorlar qaýymdastyǵyna tóraǵalyq etti. «Qazaqstan osy jyly TMD elderiniń áleýmettik saqtandyrý qorlaryn biriktiretin bizdiń seriktestik uıymymyz — HZÁQQ-ny laıyqty túrde basqardy. Qazaqstannyń eńbek jáne áleýmettik qorǵaý mınıstrligi basshylyǵynyń áleýmettik júıeni damytý strategııasyn qalyptastyrý kezinde basqa elderdiń tájirıbesin eskerýge tyrysatyny qýantady. Bul qoldaý qajet progressıvti jáne zamanaýı tásil, óıtkeni áleýmettik qorǵaý — bul qazirgi jaǵdaıda ıkemdilikti talap etetin eń kúrdeli mehanızm», — dep atap ótti halyqaralyq áleýmettik saqtandyrý qaýymdastyǵynyń Bas hatshysy Hans-Horst Konkolevskı.
2018 jyly Almatyda «Qazaq mýzykasynyń antologııasy» tanystyryldy. «Qazaq mýzykasynyń antologııasy» — bul Qazaqstanda alǵash ret klassıkadan qazirgi zamanǵy kompozıtsııalarǵa deıin 4K túsirilimin qoldana otyryp jasalǵan 30 aspaptyq shyǵarmanyń kásibı beıne jazbalary.
2018 jyly Qazaqstanda tuńǵysh «Anaǵa taǵzym» rýhanı-ónegelik tárbıeleý ortalyǵy ashyldy. «Týǵan jerge taǵzym» aktsııasy aıasynda demeýshiler men oblys turǵyndary esebinen 350 mıllıon teńgelik biregeı joba júzege asyryldy.
2020 jyly túrik oqyrmandaryna qazaq ádebıetiniń kórnekti ókili Maǵjan Jumabaevtyń «Pedagogıka» kitaby usynyldy, onda qazaq mádenıeti men dástúrine sáıkes pedagogıkalyq tárbıe týraly jazylǵan. Kitapty Ystanbul ýnıversıtetiniń Túrik tili jáne ádebıeti kafedrasynyń oqytýshysy, doktor Ýgýr Gýrsý túrik tiline aýdaryp, basyp shyǵardy.
2021 jyly Maskat qalasynyń Water Front kesheninde Qazaq mádenıetiniń kúni ótti. Іs-sharada Qazaqstan Respýblıkasynyń Prezıdenti Qasym-Jomart Toqaevtyń Qazaqstan halqyna Joldaýynda aıqyndaǵan elimizdiń jetistikteri men negizgi áleýmettik-ekonomıkalyq reformalar atap ótildi.
Mádenı kesh aıasynda aqyn Jambyl Jabaevtiń týǵanyna 175 jyl tolýyna oraı onyń shyǵarmashylyǵy men ómirbaıanynan syr shertetin kórkem fılm kórsetildi. Shyǵarmashylyǵy qarapaıym halyq ómirimen sabaqtas, poezııasy tereń maǵynaly, batyldyqpen órbigen uly aqynnyń tulǵasyna erekshe nazar aýdaryldy.
2021 jyly Pavlodar mýzyka kolledjinde Qazaq KSR halyq ártisi, kúıshi-dombyrashy Rústembek Beısenuly Omarovtyń shyǵarmashylyq murasynyń kabıneti ashyldy. Jobanyń maqsaty — R.Omarov qaldyrǵan mádenı-rýhanı murany keńinen nasıhattaý, tarıhı derekterdiń saqtalýyn qamtamasyz etý jáne ártistiń mýzykalyq shyǵarmalaryn tıimdi paıdalaný.
2021 jyly Lıssabonda (Portýgalııa) Qazaqstan Respýblıkasy Táýelsizdiginiń 30 jyldyǵyna oraı «Qazaqstan — táýelsizdikke 30 jyl, tarıhqa 556 jyl» kórmesi ashyldy. Kórme qonaqtary onda Qazaqstan tabıǵattyń ásemdigi, sheksiz keńistigi, qoryqtary men tarıhymen, astanasy — Nur-Sultan qalasy, túrki áleminiń tarıhı mádenı ortalyǵy — Túrkistan qalasy jáne Qoja Ahmet Iassaýı kesenesi, sondaı-aq Qazaqstan jaıly jazylǵan kóptegen kitaptarmen tanysý múmkindigin aldy. Qazaqstandyq ekspozıtsııa eki el halyqtary arasyndaǵy ózara bilim men mádenı almasýdyń ıgi dástúrlerin jalǵastyryp, kelýshilerge Uly Dala Eli ashatyn jańa kókjıekterdi kórýge múmkindik berdi.
2022 jylǵy 20 qyrkúıekte Qasym-Jomart Toqaev Qazaqstan Respýblıkasy Prezıdentiniń kezekten tys saılaýyn 2022 jylǵy 20 qarashaǵa belgileý týraly jarlyqqa qol qoıdy.
2022 jyly «Qazaqfılm» AQ eki kartınasy Gatchınada ótken «Ádebıet jáne kıno» halyqaralyq kınofestıvalinde júldeli oryndarǵa ıe boldy. «Muqaǵalı» fılmi (rejısseri Bolat Qalymbetov) qoıýshy-sýretshi Ermek Ótegenovtyń úzdik jumysy úshin halyqaralyq qazylar alqasynyń arnaıy dıplomyna ıe boldy. «Aqyn» fılmi (rejısseri Dárejan Ómirbaev) úzdik stsenarıı úshin syılyq aldy.
2024 jyly «Taza Qazaqstan. Astana — tazalyq pen tártip úlgisi» ekologııalyq aktsııasy men Dúnıejúzilik tazalyq kúni (World Cleanup Day) aıasynda elordada aýqymdy jalpyqalalyq senbilik bastaldy. Ekologııalyq naýqan aıasynda astanalyqtar qalany, nóser jáne sýarý júıelerin, kóshelerdi, trotýarlardy, irgeles aýmaqtardy, qoǵamdyq oryndardy, aýlalardy tazartý jáne basqa da sharalardy júrgizdi. Ekologııalyq naýqan barysynda bes aýdanda 2 myńnan astam jasyl jelek otyrǵyzyldy.