21 qarashada elimizdegi qaı joldarda qozǵalys shekteldi
ALMATY. KAZINFORM – «QazAvtoJol» ulttyq kompanııasy eldegi joldardyń qazirgi jaǵdaıy týraly málimet usyndy.
Ulttyq kompanııanyń málimetinshe, 2025 jylǵy 21 qarasha saǵat 07:00-de respýblıkalyq mańyzy bar «RF shekarasy – Mártók – Aqtóbe – Qarabutaq – Qyzylorda – Shymkent – Taraz – Qordaı – Almaty – Qorǵas – QHR shekarasy» 1680-1912-shaqyrym aralyǵyndaǵy (Úshinshi Internatsıonal aýyly – Báıgequm aýyly) ýchaskesinde barlyq kólik túri úshin qozǵalys ashylady.
Alaıda keıbir óńirlerde shekteýler bar.
21 qarasha saǵat 08:30-da Aqmola oblysynda kúnniń buzylýyna (temperatýranyń tómendeýi, kóktaıǵaq) baılanysty respýblıkalyq mańyzy bar KAZ02 «Astana – Kókshetaý (aınalma jol) – Petropavl – RF shekarasy (Jańa Jol ótkizý pýnkti) 19-231 ( Astana q. – Şýchınsk q.) ýchaskesinde barlyq kólik túri úshin jyldamdyq 140 shaq/saǵ-tan 110 shaq/saǵ-qa deıin tómendetildi.
Soltústik Qazaqstan oblysyndaǵy jolda jóndeý-qalpyna keltirý jumystary júrgizilýine baılanysty barlyq kólikterdiń qozǵalysy shekteldi. Buǵan deıin tolassyz jaýyn-shashyn jáne aýyr júk kólikteriniń kóp júrýi saldarynan KZ15-08 «Tımırıazevo – Sarykól – oblys shekarasy» avtojolynyń 0-30-shaqyrymynda (Qostanaı oblysy shekarasy – Tımırıazevo aýyly) jol oıylyp ketken.
Sonymen qatar 5 qarashadan bastap tirkemesi bar jáne jartylaı tirkemeli júk kólikteriniń qozǵalysy Osınov asýynda ýaqytsha shekteldi. Shekteý «Óskemen – Altaı – Katonqaraǵaı – Rahman qaınary» avtojolynyń 46-66-shaqyrymyndaǵy (Severnoe aýyly – Serebrıansk qalasy) ýchaskesinde saqtalady. Bul shara taýly jerde jol qaýipsizdigin qamtamasyz etý úshin qabyldanyp, qys maýsymy aıaqtalǵanǵa deıin kúshinde bolady.
Aýa raıy
21 qarashada Qaraǵandy, Shyǵys Qazaqstan, Abaı jáne Pavlodar oblystarynyń keı jerinde qar aralas jańbyr men qar jaýady.
– Sol sebepti júrgizýshilerge jyldamdyq rejımi men qaýipsiz araqashyqtyqty qatań saqtap, joldardaǵy aýa raıynyń qolaısyzdyǵyn eskerýlerińizdi suraımyz, - delingen habarlamada.
Eske salaıyq, buǵan deıin QazAvtoJol tórt oblystyń joldarynda týyndaýy múmkin qaýip týraly eskertkenin jazǵan edik.