2030 jylǵa deıingi tujyrymdama: Zeınetaqy júıesin qandaı ózgerister kútip tur
Aıta ketsek buǵan deıin senatorlar Úkimet basshysyna depýtattyq saýal joldap, 2030 jylǵa deıin zeınetaqy júıesin jańǵyrtý tujyrymdasynyń jobasyn synǵa alǵan edi. Olardyń aıtýynsha aty dardaı bolsa da, bul tujyrymdamada eshqandaı jańalyq joq. Esesine, buǵan deıin berilip kelgen bazalyq zeınetaqy tólemin, eń tómengi zeınetaqy men jınaqtalǵan zeınetaqynyń saqtalýyn qamtamasyz etetin memlekettik kepildemeni biriktirip, bir ǵana kepildendirilgen tómengi zeınetaqy degen uǵym engizilgeli otyr. Bul jerde de aýyldaǵy zeınetkerler sol eń tómengi zeınetaqyǵa táýeldi bolaıyn dep tur.
Bul saýalǵa jaýap bergen Úkimet basshysy búgingi tańda jınaqtaýshy zeınetaqy júıesine qatysýshylardyń sany 11,2 mln adam ekenin, onyń ishinde aýyl azamattary 4,7 mln adam ekenin habarlaıdy. Biryńǵaı jınaqtaýshy zeınetaqy qoryndaǵy zeınetaqy jınaqtarynyń somasy 12,2 tlrn teńgege jetken. Onyń 3,6 trln teńgesi aýyldaǵy halyqqa tıesili. Zeınetaqy tóleminiń ortasha mólsheri respýblıka boıynsha 121 282 teńgeni (bazalyq – 29 520 teńge, yntymaqty – 64 538 teńge, jınaqtaýshy – 27 224 teńge), al aýyl turǵyndarynyń zeınetaqy tólemderiniń ortasha mólsheri 108 858 teńgeni quraıdy.
«Zańǵa sáıkes azamattarǵa zeınetaqy tólemin taǵaıyndaý kezinde eńbek ótili, eńbek kitapshasyndaǵy, aqparattyq júıedegi málimetter nemese arhıv derekteri negizinde esepke alynady. Mundaı málimetter bolmaǵan jaǵdaıda eńbek ótilin sot sheshimi negizinde rastaýǵa múmkindik bar. Qazirgi tańda zeınetaqy júıesin jańǵyrtýdyń 2030 jylǵa deıingi tujyrymdamasynyń ekinshi kezeńi iske asyrylýda. Onyń aıasynda bazalyq zeınetaqyny 2030 jyldan bastap eń tómengi kepildik berilgen zeınetaqyǵa aınaldyrý qarastyrylǵan», - deıdi Asqar Mamın.
Premer-mınıstr atap aıtqanda, bazalyq zeınetaqynyń eń tómengi mólsherin eń tómengi kúnkóris deńgeıi kóleminiń 54 paıyzynan 70 paıyzyna deıin arttyrý, zeınetaqy júıesine qatysý ótiliniń 5 jyldan keıingi árbir jyly úshin tólem mólsherin 2 paıyzǵa ulǵaıtý (bul qazirgi kezdegiden 10 paıyzǵa artyq), sondaı-aq mólsherdiń eń joǵary shekteýin alyp tastaý kózdelip otyrǵanyn aıtady.
«Bul sharalar zeınetaqymen qamsyzdandyrý, onyń ishinde tabysy tómen azamattardyń ómir súrý deńgeıin kóterýge múmkindik beredi», - dep sendiredi Asqar Mamın.