2030 jyly eldegi iri qara mal sany 12 mln-ǵa jetkiziledi — AShM

ASTANA. KAZINFORM — 2030 jylǵa qaraı elde iri qara mal sany 12 mln-ǵa, usaq mal basy 30 mln-ǵa jetkiziledi. Bul týraly QR Aýyl sharýashylyǵy mınıstri Aıdarbek Saparov aıtty.

— Mal sharýashylyǵy salasyn turaqty damytý úshin jeke Keshendi jospar ázirlenetin bolady. Búgingi kúni mal sharýashylyǵynda tek bordaqylaý alańdary úshin aınalym qarajatyn tolyqtyrýǵa jeńildetilgen kredıt berý ǵana qarastyrylǵan. Alaıda ol shekteýli bolyp tabylady jáne salanyń qajettiligin tolyq qamtamasyz etpeıdi. Jańa baǵdarlamada naqty sharalar men olardy qarjylandyrý kózderi aıqyndalady, sonyń ishinde ekinshi deńgeıli bankterdiń ınvestıtsııalaryn tartý esebinen júzege asyrylatyn kelesi baǵyttar qarastyrylǵan, — dedi mınıstr Úkimet otyrysynda.

Onyń aıtýynsha, bankterden myna baǵyttarda qarjy tartylady:

1. 5%-dyq jeńildetilgen kredıt berýdi taýarlyq sharýashylyqtarǵa, qus fabrıkalaryna jáne ózge de baǵyttarǵa keńeıtý;
2. Aýyl sharýashylyǵy janýarlarynyń asyl tuqymdy mal basyn satyp alýǵa arnalǵan «uzaq merzimdi» jeńildetilgen qarjylandyrýdy engizý;
3. «Damý» ınstıtýty arqyly qamtý deńgeıin 80%-ǵa deıin kepildik berý tetigin engizý.

— Qarjylyq qoldaýdan bólek, sala qyzmetkerleriniń otbasylary úshin qosymsha áleýmettik jeńildikter usyný kózdeledi. Osy sharalardyń iske asyrylýy nátıjesinde 2030 jylǵa qaraı iri qara mal basyn 12 mln basqa deıin, usaq mal basyn 30 mln-ǵa deıin ulǵaıtýǵa, ishki naryqty qamtamasyz etýge jáne et eksportyn
2 esege arttyrýǵa múmkindik beredi, — dedi Aıdarbek Saparov.

Aıta keteıik, keshe Memleket basshysy Joldaýda mal sharýashylyǵy salasyndaǵy agrobıznesti qoldaý josparyn ázirlep, naqty qarjylandyrý sharalaryn bastaýdy tapsyrǵan bolatyn.