2028 jylǵa deıin Astana aglomeratsııasy qalaı damıdy
ASTANA. KAZINFORM — Astana aglomeratsııasyna kiretin elorda men Aqmola oblysynyń eldi mekenderi arasyndaǵy ózara is-qımyl máseleleri Qosshy qalasynda ótken jıynda talqylandy.
Astana qalasy ákimdigi baspasóz qyzmetiniń aqparatyna sáıkes is-sharaǵa Astana jáne Aqmola oblysynyń ákimderi, óńirlik basqarmalar men aýmaqtyq departamentterdiń basshylary qatysty.
Eske sala keteıik, aglomeratsııa quramyna Astana jáne Qosshy qalalary, sondaı-aq Tselınograd, Arshaly jáne Shortandy aýdandarynyń 45 eldi mekeni kiredi. 2024–2028 jyldarǵa arnalǵan Astana aglomeratsııasyn damytý jónindegi keshendi jospar aıasynda Aqmola oblysynda 245 is-sharany júzege asyrý kózdelgen.
Jıyndy Aqmola oblysynyń ákimi Marat Ahmetjanov ashty.
Óz sózinde óńir basshysy aglomeratsııany damytý Astana men Aqmola oblysy arasyndaǵy berik geografııalyq, ekonomıkalyq jáne áleýmettik baılanystarǵa negizdeletinin atap ótti.
— Búgingi tańda Astana aglomeratsııasyn damytýǵa baǵyttalǵan iri jobalar iske asyryla bastady. 2024 jyly 8 mektep salyndy, 26,5 myń adamǵa gaz jetkizildi, mańyzdy qosalqy stantsııa qaıta jańǵyrtylyp, ondaǵan shaqyrym joldar men sýmen jabdyqtaý nysandary salyndy. Aýyldyq densaýlyq saqtaýdy jańǵyrtý jónindegi ulttyq joba aıasynda jańa nysandar paıdalanýǵa berildi. Aqmola oblysy úshin basym baǵyttardyń biri — elordanyń azyq-túlik beldeýin qalyptastyrý bolyp qala beredi. Ónim jetkizý kólemin ulǵaıtyp, ony tómendetilgen baǵamen satatyn saýda núktelerin kóbeıtý josparlanýda. Týrızmdi damytýǵa da erekshe nazar aýdarylyp otyr. Aqmola Invest ınvestıtsııalardy damytý ortalyǵy quryldy. Qazirgi tańda tereń óńdeýge baǵyttalǵan, kólik-logıstıka ortalyǵyn qurý jáne basqa da iri jobalar júzege asyrylýda. Bul qosymsha jumys oryndaryn ashyp, elordaǵa kóshý qarqynyn tómendetýge múmkindik beredi, — dedi Marat Ahmetjanov.
Astana qalasynyń ákimi Jeńis Qasymbek óz sózinde ortaq máselelerdi sheshýde júıeli tásildiń mańyzdylyǵyn alǵa tartty.
— Ekinshi jyl qatarynan 2024–2028 jyldarǵa arnalǵan Astana aglomeratsııasyn damytý jónindegi keshendi jospar júıeli túrde júzege asyrylýda. Ótken jyly qalada saýda-ónerkásip salasynda 8 joba iske asyryldy. Bıyl ınjenerlik ınfraqurylym, kólik, qala qurylysy, adamı kapıtaldy damytý, ekologııa jáne qaýipsizdik salalarynda 40-qa jýyq jobany iske asyrýdy josparlap otyrmyz. Qala mańyndaǵy kóshi-qonnyń belsendi oshaǵy bolyp sanalatyn Qosshy qalasymen ózara is-qımyldyń mańyzdylyǵyn erekshe atap ótkim keledi. Qosshymen birtutas kólik júıesi qalyptastyrylyp, qala qurylysy josparlary kelisilip jatyr, ınjenerlik ınfraqurylymdy, sonyń ishinde elektrmen jabdyqtaý men gazdandyrý jelilerin úılestirý jumystary jalǵasyp keledi, — dedi Astana ákimi.
Jıynda Aqmola oblysy ákiminiń orynbasary Ernar Jarkeshov ınfraqurylymdy damytý jáne basym jobalardy júzege asyrý týraly baıandama jasady. «Astana bas jospary» mekemesi dırektorynyń orynbasary Azamat Hamıtov aglomeratsııany damytý barysy jóninde baıandady.
Taraptar ınjenerlik jáne kólik ınfraqurylymyn damytý, azyq-túlik beldeýin keńeıtý jónindegi birlesken jobalardy talqylady. Sondaı-aq týrızm áleýetin damytý, ınvestıtsııalyq ahýaldy jaqsartý jáne jańa óndiristerdi iske qosý máselelerine basa nazar aýdaryldy.
Kezdesý sońynda taraptar Astana aglomeratsııasyn damytýdyń kezek kúttirmeıtin máselelerin sheshý boıynsha birlesken is-qımyl josparyn ázirleýge kelisti.
Osydan buryn elordadalyq alty ardagerge 5 mıllıon teńgeden áleýmettik tólem berilgeni habarlandy.