2028 jylǵa deıin 10 myń shaqyrym jol jóndeledi
ASTANA. KAZINFORM – Kólik mınıstrligi 2028 jylǵa deıingi basymdyqtardy bekitti.
Kólik mınıstrligi 2026–2028 jyldarǵa arnalǵan avtojol salasyn damytý baǵyttaryn aıqyndap, ınfraqurylymdy jańǵyrtýǵa, jol sapasyn arttyrýǵa jáne eldiń tranzıttik áleýetin kúsheıtýge baǵyttalǵan sheshim bekitti.
Basymdyqtar aıasynda jol jabyny túrlerin tańdaý tásilderi qaıta qaralady. Kólik júktemesi joǵary, ásirese halyqaralyq baǵyttarda tsementbeton jabyndaryn qoldaný keńeıtiledi. Al, shaǵyn eldi mekenderge aparatyn joldarda qıyrshyq tas jáne shaǵal jabyndaryna basymdyq beriledi. Bul jabyn túri uzaq merzimdiligimen jáne klımattyq áserlerge tózimdiligimen erekshelenedi.
Qujatta tranzıttik dálizderdi damytýǵa erekshe nazar aýdarylǵan. Negizgi jobalardyń qatarynda «Beıneý - Sekseýil», «Qyzylorda - Sekseýil», «Sekseýil - Ulǵaısyn» jáne «Jańaózen – Kendirli – Temirbaba» baǵyttary bar. Sonymen qatar ortasha jóndeý kólemi ulǵaıtylady: 2028 jylǵa qaraı respýblıkalyq mańyzy bar joldardyń 10 myń shaqyrymy jóndeýmen qamtylady.
Negizgi baǵyttardyń biri retinde ulttyq avtojol operatorynyń qyzmetin damytý kózdelgen. Bul onyń qarjylyq turaqtylyǵyn arttyrýǵa, ınvestıtsııalyq áleýetin keńeıtýge jáne jol aktıvterin basqarýdyń zamanaýı modelderin engizýge múmkindik beredi.
Salanyń tehnologııalyq jańǵyrtylýyna da basymdyq berilip otyr. Atap aıtqanda, otandyq óndiristegi polımermen modıfıkatsııalanǵan bıtýmdarǵa kóshý, sondaı-aq jobalyq sheshimderdi aldyn ala saraptaý jáne jobalardy iske asyrý kezeńinde ǵylymı-tehnıkalyq súıemeldeýdi engizý qarastyrylǵan.
Atalǵan bastamalardy ǵylymı-tehnıkalyq turǵyda qamtamasyz etýde «Qazaqstan jol ǵylymı-zertteý ınstıtýty» (QazjolǴZI) mańyzdy ról atqarady. «QazjolǴZI» tehnıkalyq-ekonomıkalyq negizdemelerdi ázirleýge, tsementbeton jabyndaryn qoldaný boıynsha zertteýler júrgizýge, kólik júktemeleri men klımattyq faktorlardy taldaýǵa, sondaı-aq jańa tehnologııalar men materıaldardy engizýdi súıemeldeýge qatysady.
Sonymen qatar jol ınfraqurylymyn tsıfrlyq sheshimdermen biriktirý josparlanǵan. Negizgi baǵyttar boıynda talshyqty-optıkalyq baılanys jelileri damytylyp, 5G tehnologııalary engiziledi. Bul ıntellektýaldy kólik júıelerin damytýǵa negiz bolady. Budan bólek, kópfýnktsıonaldy servıstik aımaqtar qurý jáne ótkizý beketterindegi ınfraqurylymdy damytý qarastyrylǵan.
Jalpy, qabyldanǵan sharalar jol jelisiniń sapasyn arttyrýǵa, Qazaqstannyń tranzıttik áleýetin kúsheıtýge jáne kólik ınfraqurylymynyń turaqty damýyn qamtamasyz etýge múmkindik beredi.
Aıta ketelik Aqtóbede jol jóndeý jumystaryna bıyl 70 mlrd teńgeden astam qarjy jumsalady.