2028 jyldan keıin UEFA Ulttar lıgasynyń formaty ózgeredi
ASTANA. KAZINFORM — UEFA Atqarýshy komıteti Túrkııanyń Ystanbul qalasynda ótken otyrysynda erler arasyndaǵy ulttyq quramalarǵa arnalǵan týrnırlerdiń jańa tujyrymdamasyn maquldady.
Ulttar lıgasy men Eýropa chempıonaty irikteý kezeńiniń jańartylǵan formaty 2028 jylǵy qurlyqtyq dodadan keıin engiziledi.
2028/29 jylǵy maýsymnan bastap Ulttar lıgasy árqaısysynda 18 quramadan turatyn úsh lıga formatyna kóshedi. Ár lıga alty qomandadan quralǵan úsh topqa bólinedi. Buryn quramalar tórt lıgadan turatyn dop dodasynda baq synaıtyn edi.
Endigi kezekte quramalar toptyq kezeń aıasynda bes túrli qarsylaspen alty match ótkizedi. Quramalar ártúrli sebettegi qarsylastarymen óz alańynda nemese qonaqta bir kezdesýden oınaýy tıis. Sondaı-aq óz sebetindegi qarsylaspen óz alańynda jáne qonaqta eki match ótkizedi.
Týrnırge 55 ulttyq qurama qatysady. Sondyqtan S lıgasy jeti quramadan turatyn bir topty qamtıdy. Bul toptyń matchtary halyqaralyq úzilis merziminen bir kezeń erte bastalady. Shırek fınal, tórt qurama qatysatyn fınaldyq týrnır jáne lıgalarda joǵarylaý men tómendeý úshin ótetin pleı-off matchtary saqtalady.
Sondaı-aq ózgerister Eýropa chempıonaty irikteý kezeńinde de júrgiziledi. Jańa format kópdeńgeıli bolady. Aıta ketsek, 1-lıga Ulttar lıgasynyń A jáne V lıgalaryndaǵy 36, 2-lıga qalǵan 18 nemese 19 quramadan turady. 1-lıgada úsh sebetten 12 quramadan turatyn úsh top qurylady. Ár qurama alty túrli qarsylasqa qarsy (ár sebetten eki quramadan) óz alańynda nemese qonaqta alty match ótkizedi.
Bul qaǵıda UEFA-nyń klýbtyq týrnıriniń formatyna uqsas bolady. Fınaldyq kezeńge avtomatty túrde joldama alǵan qojaıyn elderdiń quramalary da irikteýge qatysady.
Bul olardyń Ulttar lıgasynyń kelesi maýsymyndaǵy ornyn anyqtaý úshin qajet. 1-lıganyń ár tobyndaǵy úzdik quramalar fınaldyq kezeńge tikeleı joldama alady.
Qalǵan oryndar pleı-off júıesi arqyly úlestirilip, bul 2-lıga komandalaryna irikteýden ótýge qosymsha múmkindik beredi.
Budan bólek, otyrysta UEFA-nyń birqatar reglamenti bekitildi. Onyń ishinde 2026-28 jyldardaǵy erler arasyndaǵy Eýropa chempıonaty, 2026 jylǵy sýperkýbok, fýtzaldan 2026/27 jylǵy Chempıondar lıgasy, klýbtardy lıtsenzııalaý jáne qarjylyq turaqtylyq, tártiptik jarǵy, uıymdastyrýshylyq reglament jáne basqa da baǵyttar boıynsha qujattar bar.
Taıaý aılarda jańa formattardyń tujyrymdamasy tolyq pysyqtalady. Naqtylanǵan format 2026 jyldyń 15 qyrkúıeginde Salonıkı (Grekııa) qalasynda ótetin ÝEFA Atqarýshy komıtetiniń kelesi otyrysynda birjola bekitýge usynylady.
Eske salsaq, frantsııalyq shabýylshy Kılıan Mbappe ekinshi maýsym qatarynan La Liga-nyń úzdik bombardıri atandy.
