2027 jylǵa deıin 5 myń shaqyrym temirjol salynyp, jańǵyrtylady
ASTANA. KAZINFORM — Ulttyq temirjol operatory rekordtyq kórsetkishterge qol jetkizdi, ınfraqurylymdy jańǵyrtyp, halyqaralyq arenadaǵy pozıtsııasyn nyǵaıtty. Bul týraly «Qazaqstan temir joly» UK» AQ baspasóz qyzmeti málim etti.
Ulttyq tasymaldaýshy kompanııanyń dereginshe, osy jyldar ishinde kompanııa aýqymdy qaıta qurýlardan ótip, jańa belesterge senimdi túrde ilgerilegen. Bul kezeń óndiristik jáne qarjylyq kórsetkishterdiń ósýimen, iri ınfraqurylymdyq jobalardyń iske asyrylýymen jáne salanyń tsıfrlyq transformatsııasymen erekshelendi.
Tasymaldaýdyń turaqty ósýi qarjylyq nátıjelerge áser etti. 2024 jyly kompanııanyń kirisi 2,2 trıllıon teńgege jetti, bul 2020 jylǵy kórsetkishten eki ese kóp. 2025 jyly boljamdy kiris — 2,7 trıllıon teńge. Taza paıda 9 eseden astam — 16 mıllıardtan 158 mıllıard teńgege deıin ósti.
Jalaqy qory 286-dan 662 mıllıard teńgege deıin ósti. Bul rette kompanııa turaqtylyǵyn saqtap, Moody’s, Fitch jáne S& P halyqaralyq agenttikterinen oń reıtıngter aldy.
Paıdalaný júk aınalymy 236 mlrd tonna-km-den 272 mlrd tonna-km-ge deıin ulǵaıdy. Tranzıttik júkter kólemi 33% ósip, 27,5 mln tonnany qurady. Konteınerlik tranzıt eki esege jýyq: 876 myń JFB-dan 1,4 mln JFB-ǵa deıin ósti. QHR — RF — QHR baǵytynda ósim 14 esege — 37,2-den 512,2 myń JFB-ny qurady. Qytaıdan konteınerlik poıyzdardyń THKB boıynsha tasymaly 2023 jylǵa qaraı 33 ese ósti. Qytaımen tasymaldaý kólemi tarıhı eń joǵary deńgeıge — 32 mıllıon tonnaǵa jetti.
Tórt jyl ishinde 424 jańa lokomotıv pen 369 jolaýshylar vagony satyp alyndy. 2030 jylǵa deıin 557 zamanaýı quramdy jetkizý josparymen «Shtadler Qazaqstan» otandyq zaýytynda jańa jolaýshylar vagondarynyń óndirisi iske qosyldy. Bul ulttyq tasymaldaýshynyń vagon parkin 2030 jylǵa deıin tolyq jańartýǵa múmkindik beredi. 125 temirjol vokzalyn jańǵyrtý bastaldy.
Joldardy josparly jóndeý kólemi eki esege ulǵaıtyldy: jyl saıyn 1400 kılometrden astam jol jóndelýde (2023 jyly — 1443 km; 2024 jyly — 1430 km). 2029 jylǵa deıin 11 myń shaqyrym temirjol jańartylady.
2027 jylǵa deıin barlyǵy 5 myń shaqyrym temirjol salynyp, jańǵyrtylady. Búginde Dostyq — Moıynty ýchaskesinde (836 km) ekinshi joldardyń qurylysy aıaqtaldy, bul baǵyttyń ótkizý qabiletin bes esege arttyrady. Sondaı-aq, Almatyny aınalyp ótetin temir jol (75 km), Darbaza — Maqtaaral (152 km), Baqty — Aıagóz (272 km), Moıynty — Qyzyljar (329 km) jelisi salynýda, Altynkól-Jetigen (293 km) ýchaskesi jańǵyrtylýda.
Kompanııa negizgi halyqaralyq marshrýttarǵa qatysýyn kúsheıtti. Qytaıdyń Sıan qurǵaq portynda termınal salyndy. Aqtaý men Almatyda konteınerlik habtar iske qosyldy, Alıat (Ázirbaıjan) porttarynda, Selıatıno (Reseı) stantsııasynda jáne Svısloch qalasynda (Belarýs) termınaldar qurylysy jalǵasýda. Logıstıkalyq jelini keńeıtý tranzıt kólemin ulǵaıtýǵa jáne Qazaqstannyń Azııa men Eýropa arasyndaǵy negizgi kólik dálizi retindegi pozıtsııasyn nyǵaıtýǵa múmkindik berdi.
PSA, Huawei jáne Wabtec sııaqty jahandyq kompanııalarmen seriktestikte protsesterdi tsıfrlandyrý jáne tasymaldaý qaýipsizdigin jaqsartý boıynsha bastamalar bastaý aldy. Bul ІT sheshimderin engizýdi, avtomattandyrýdy jáne tsıfrlyq ınfraqurylymdy damytýdy qamtıdy.
Buǵan deıin habarlanǵandaı, bıyl 1480 km magıstral jóndeýden ótedi.