2026 jyly úsh birdeı toptyq sý qubyry qoldanysqa beriledi
ASTANA. KAZINFORM – Premer-mınıstr Oljas Bektenov Úkimet otyrysynda bıyl úsh birdeı toptyq sý qubyry qoldanysqa beriletinin málim etti.
– Sý resýrstary mınıstrligi jyl sońyna deıin 142 aýyldy aýyzsýmen qamtamasyz etý deńgeıin jaqsartýǵa arnalǵan 12 jobany iske asyrsyn. Osy jyldyń 30-shy shildesine deıin Túrkistan oblysyndaǵy Shardara toptyq sý qubyryn paıdalanýǵa berý qajet. 15-shi qarashaǵa deıin Soltústik Qazaqstan oblysyndaǵy Presnov jáne Sokolov toptyq sý qubyrlaryn jańǵyrtý jumystaryn aıaqtaý kerek, - dedi Premer-mınıstr.
Oljas Bektenov Qarjy mınıstrligine respýblıkalyq bıýdjet esebinen iske asatyn sýmen jabdyqtaý jobalaryn ýaqtyly qarjylandyrýdy tapsyrdy.
– Káriz-tazartý nysandaryn jańǵyrtý úshin nesıe tartý máselesinde ákimdikterge ádisnamalyq kómek kórsetilýge tıis, - dedi ol.
Sondaı-aq búgingi Úkimet otyrysynda Sý resýrstary jáne ırrıgatsııa mınıstri Nurjan Nurjigitov Syrdarııadan keletin sýdyń azaıyp jatqanyn «obektıvti shyndyq» dep sıpattady.