2026 jyly Pavlodar áýejaıy jóndeýden keıin ashylady
ASTANA. KAZINFORM — Avıatsııalyq qatynasty damytý maqsatynda ótken jyly Pavlodar áýejaıynyń ushyp-qoný jolaǵyn qaıta qurý bastaldy. Bul týraly Pavlodar oblysynyń ákimi Asaıyn Baıhanov aıtyp berdi.
Jobany qaıta jańǵyrtýdyń jalpy quny 16,4 mlrd teńgege baǵalanǵan.
— Alǵashqy daıyndyq jumystary 2024 jylǵy qyrkúıekte qolǵa alynsa, 2025 jylǵy sáýirden bastap áýejaı kúrdeli tehnıkalyq jumystarǵa baılanysty jabyldy. Jańǵyrtý jumystaryn 2026 jylǵy shilde-tamyz aılarynda tolyq aıaqtaý josparlanǵan, — dedi Asaıyn Baıhanov elordada Ortalyq kommýnıkatsııalar qyzmetinde.
Sonymen birge, oblysta temirjol ınfraqurylymyn jańartý jumystary da jalǵasyp jatyr. Bıyl «Qazaqstan temir joly» ulttyq kompanııasy esebinen Aqsý temirjol vokzalyna jańǵyrtý jumystary júrgizilip jatyr, sondaı-aq Qalqaman, Shiderti, Qarasor jáne Bozshakól stantsııalarynda da jańartý qolǵa alynǵan.
Atalǵan jumystardy qarjylandyrý 583 mln teńge.
Aqsý qalasyndaǵy vokzaldy jańǵyrtý jumystaryn 2026 jyly aıaqtaý josparlanyp otyr, al stantsııalardaǵy jumystardy bıylǵy jyldyń sońyna deıin támamdaý kózdelgen.
Aıta keteıik, Pavlodarda Ertis ózeni arqyly ótetin jańa kópir 2027 jyly qoldanysqa beriledi.