2026 jyly elimizde qandaı óndiris oshaqtary iske qosylady
ASTANA. KAZINFORM — Qazaqstanda bıyl jalpy somasy 1,3 trln teńge bolatyn 173 ındýstrııalyq joba júzege asyryldy, bul shamamen 22 myń turaqty jumys ornyn qurýǵa múmkindik berdi. Úkimettiń jyl qorytyndysyna arnalǵan baspasóz máslıhatynda Prezıdenttiń saılaýaldy baǵdarlamasyn oryndaý jónindegi vedomstvo jumysynyń qorytyndysy jóninde ónerkásip jáne qurylys vıtse-mınıstri Oljas Saparbekov baıandady.
Onyń aıtýynsha, bıylǵy jylǵa 190 joba josparlanǵan, olardyń kópshiligi paıdalanýǵa berildi.
Іri jobalar qatarynda KIA, Chery, Changan, Haval, Tank brendteriniń jeńil avtokólikterin, júk vagondaryn, turmystyq tehnıkany, sondaı-aq tamaq ónerkásibine arnalǵan alıýmınıı (qalbyr) jáne qaǵaz (Pure-Pak) qaptamalardy óndirý jobalaryn atap ótýge bolady.
— Bul jobalardyń tolyq qýaty iske qosylsa, óńdeý ónerkásibiniń kólemi jyl saıyn qosymsha 2,3 trln teńgege deıin ulǵaıýy múmkin. Keler jyly mıneraldy tyńaıtqyshtar óndirý, HOWO (CKD) jáne XCMG júk avtokólikterin shyǵarý, jylý oqshaýlaǵysh materıaldar, toqyma buıymdary, DSP jáne LDSP taqtaı materıaldary, lak-boıaý ónimderi men azyq-túlik óndirý sııaqty iri jobalardy iske asyrý josparlanyp otyr, — dedi Oljas Saparbekov Kongress ortalyqta.
2025 jyldyń 11 aıynda óńdeý sektoryndaǵy óndiris kólemi 5,9%-ǵa ósip, 27 trln teńgeden asqan. Ósim metallýrgııa, mashına jasaý, hımııa jáne qurylys materıaldaryn óndirý syndy negizgi sektorlarda oń dınamıka kórsetip otyr.
Aıta keteıik, Qazaqstanda 103 paıdaly qazba men 10 myń ken orny memlekettik esepke alyndy. Paıdaly qazbalar qory 98 tonna altyn, 36 myń tonna mys, 11 mln tonna marganets jáne 1,3 mln tonnadan asa fosforıt kóleminde tolyqty.
Sondaı-aq, jer qoınaýyn paıdalaný tolyq tsıfrlandyryldy: 22 memlekettik qyzmet onlaın kórsetile bastady.