2026 jylǵy Qysqy Olımpıada oıyndary qandaı sport keshenderinde ótedi
ASTANA.KAZINFORM — Italııanyń Mılan jáne Kortına-d’Ampetstso qalalarynda ótetin XXV qysqy Olımpıada oıyndarynyń bastalýyna sanaýly kúnder qaldy. Osy oraıda, Kazinform tilshisi óz tarıhynda úsh ret qysqy Olımpıada oıyndaryn qabyldaıtyn Italııanyń sport keshenderine sholý jasady.
Mılan qysqy Olımpıada oıyndary tarıhtaǵy alǵashqy resmı eki qalada ótetin Olımpıada bolmaq. Dúbirli doda birneshe klasterde ótedi: Mılan qalasynda muz aıdyndaryndaǵy jarystar, al Kortına-d’Ampetstsoda qar men taý sport túrlerinen saıystar uıymdastyrylady.
«San-Sıro» stadıony (Mılan)
«Djýzeppe Meatstsa» stadıony (Stadio Giuseppe Meazza) — Mılan qalasyndaǵy fýtbol stadıony, «San-Sıro» degen atpen de tanymal. Bul stadıon «Mılan» jáne «Inter» klýbtaryna ortaq arena. Áıgili stadıon 1926 jyly paıdalanýǵa berilgen, syıymdylyǵy 82 000 adam.
Stadıon 1934, 1990 jylǵy álem chempıonattarynyń birneshe matchtaryn, ÝEFA Chempıondar Lıgasynyń tórt birdeı (1965, 1970, 2001, 2016) fınaldyq kezdesýin, sondaı-aq 1980 jylǵy Eýropa chempıonatynyń úsh kezdesýin qabyldaǵan.
2026 jylǵy qysqy Olımpıada oıyndarynyń ashylý saltanaty osy tarıhı stadıonda ótedi.
«Santa-Djýlııa» hokkeı arenasy (Mılan)
Mılannyń Santa-Djýlııa aýdanynda ornalasqan bul kópfýnktsııaly, zamanaýı nysan 2026 jylǵy Mılan-Kortına qysqy Olımpıada oıyndary úshin arnaıy salynǵan.
Arena 14 000 kórermenge arnalǵan. Onyń akýstıkasy, trıbýnalary jáne zamanaýı jabdyqtary kórermenderge oıyn qyzyǵyna tolyqtaı enýge múmkindik beretin erekshe atmosfera jasaıdy. Negizgi arenamen qatar, qatysýshy komandalar jattyǵýlaryn ótkizetin qosymsha muz aıdyny da bar.
Mılan muz arenasy (Assago)
Mılan muz aıdyny Olımpıada oıyndarynyń short-trek jáne mánerlep syrǵanaý jarystaryn ótkizedi. Assago aımaǵynda ornalasqan bul arena Eýropanyń jetekshi sport nysandarynyń biri.
11 500-den astam kórermen syıymdylyǵy bar bul nysannyń jabdyqtary ámbebaptyq pen qaýipsizdikti eskere otyryp jasalǵan. Sonymen qatar, arena mánerlep syrǵanaý jáne short-trek jarystaryna qoıylatyn barlyq talaptarǵa saı keledi.
Olımpıada oıyndarynan keıin Mılan muz arenasy jas sportshylarǵa óz sheberlikterin damytýǵa múmkindik beretin muz sportynyń iri ortalyǵy bolyp qala beredi.
Mılan konkımen júgirý stadıony
Nysan Mılandaǵy muz saıabaǵynda ornalasqan. Álemniń túkpir-túkpirinen kelgen sportshylar osy stadıonda konkımen júgirý jarystarynda baq synaıdy.
Qysqy Olımpıada oıyndaryn qabyldaý maqsatynda Rosheldegi áıgili Mılan halyqaralyq kórme ortalyǵy keshendi jańartý jáne jóndeýden ótti. Qaıta jańǵyrtý nátıjesinde kórme alańy zamanaýı sport nysanyna aınaldy.
«Ro» hokkeı arenasy
Mılandaǵy muz aıdyny saıabaǵynyń ortalyǵynda ornalasqan «Ro» hokkeı arenasy 2026 jylǵy qysqy Olımpıada oıyndarynyń eń tanymal oryndarynyń biri bolady. Arenada Olımpıada baǵdarlamasyndaǵy eń tanymal jáne tamasha sport túrleriniń biri — hokkeı týrnıriniń qyzyqty matchtary ótedi.
«Ro» hokkeı arenasy Mılan halyqaralyq kórme ortalyǵyn keshendi jańartý nátıjesinde salynǵan.
Anterselva bıatlon stadıony
Avstrııa shekarasyna jaqyn, 1600 metr bıiktikte, Alpi shyńdarynyń ortasynda ornalasqan bul stadıon Olımpıada oıyndaryn alǵash ret qabyldaıdy.
Degenmen, Anterselva bıatlon jarystaryn ótkizýdiń uzaq dástúrine ıe. 1971 jyldan bastap 50 jyldan astam ýaqyt boıy álem kýbogynyń kezeńderi men álem chempıonattaryn (alty ret) qosa alǵanda, halyqaralyq jarystardy ótkizip keledi.
Trıbýnalar 19 myń kórermenge arnalǵan.
Olımpıadalyq kerlıng stadıony
Kortına-d’Ampetstso qalasynda ornalasqan bul nysan 1955 jyly salynyp, 1956 jylǵy qysqy Olımpıada oıyndaryn qabyldaǵan. Onda ashylý saltanaty men mánerlep syrǵanaý jarystary ótti.
2026 jyly arenada álemniń eń úzdik sportshylary Olımpıada jáne Paralımpıada kerlıng medaldary úshin baq synasady. Stadıon 3 700 kórermenge arnalǵan.
Kortına syrǵanaý ortalyǵy
Tolyǵymen jańǵyrtýdan ótken ortalyqta 2026 jylǵy Olımpıada oıyndarynyń bobsleı, skeleton jáne shana sporttarynan jarystar ótkiziledi.
Nysan 1956 jylǵy qysqy Olımpıada oıyndaryn qabyldap, kóptegen tarıhı oqıǵalarmen el esinde qalyp, ıtalıandyq sportshylardyń keremet óner kórsetýleri men umytylmas sátterine kýá boldy.
Lıvıno shańǵy akrobatıkasy men mogýl saıabaǵy
Lıvıno alqabynyń ońtústik-batys betkeıinde ornalasqan bul shańǵy kýrorty frıstaıl sportynyń halyqaralyq ortalyǵy bolyp tabylady. 2025 jyly osynda frıstaıldan álem kýbogynyń fınaly men synaq jarystary ótti.
Shamamen 3 000 kórermenge arnalǵan panoramalyq terrasa máre alańynan birneshe metr qashyqtyqta ornalasqan, bul kórermenderdi jarysty jaqyn qashyqtyqtan tamashalaýǵa múmkindik beredi.
Lıvıno qar saıabaǵy
Keshende snoýbord jáne shańǵy tebýdiń tórt túri — shańǵy krossy, hafpaıp, sloýpstaıl jáne bıg-eır boıynsha jarystar ótedi.
Sońǵy jyldary nysan snoýbordta Burton European Open, River Jump jáne World Rookie Fest sııaqty bedeldi halyqaralyq is-sharalardy qabyldap, álemniń eń úzdik snoýbordshylary men frıstaılshylary óner kórsetti.
Predatstso shańǵymen tuǵyrdan sekirý stadıony
Trento provıntsııasyndaǵy bul kommýnada shańǵymen sekirý jarystarynyń uzaq dástúri bar, al stadıonda kóptegen shańǵymen sekirý týrnırleri ótkizilgen. 1989 jyly ashylǵan bul stadıon alǵash ret 1990 jyly álem chempıonatyn qabyldady jáne sodan beri qysqy sport túrleriniń jetekshi ornyna aınaldy.
Olımpıada aldynda nysan tolyq jańǵyrtylyp, eki negizgi jáne úsh jattyǵý tuǵyrymen jabdyqtalǵan. Munda tuǵyrdan sekirý men shańǵy qossaıysy jarystary ótedi.
«Stelvıo» taý shańǵy ortalyǵy
Stelvıo betkeıi — Bormıo shańǵy ortalyǵynyń júregi jáne Valtellına alqabynyń sporttyq murasynyń mańyzdy bóligi. Onda 2026 jylǵy qysqy Olımpıada oıyndarynyń erler arasyndaǵy taý shańǵysy jarystary ótedi. Sonymen qatar, Olımpıada baǵdarlamasynda alǵash ret skı-alpınızm osy jerde tanystyrylady.
Bul keshen óte kúrdeli jarys jolymen tanymal. Uzyndyǵy — 3 442 metr, bıiktik aıyrmashylyǵy — 1 023 metr jáne eń joǵary eńistigi 63 paıyz.
Tezero shańǵy stadıony
Tezero shańǵy stadıony 2026 jylǵy qysqy Olımpıada oıyndarynyń shańǵy jarysy men skandınavııalyq aralas jarystaryn, sondaı-aq Paralımpıada bıatlony men Paralımpıada shańǵy jarystaryn qabyldaıdy.
Val-dı-Femmeniń ortalyǵynda ornalasqan bul stadıon teńiz deńgeıinen 850 metr bıiktikte ornalasqan. 1991 jyly alǵashqy álem chempıonatyn ótkizgennen beri bul jer shańǵy sporty jankúıerleriniń súıikti orny bolyp keledi.
«Tofana» shańǵy ortalyǵy
Kortına-d’Ampetstsodaǵy bul áıgili sport nysany Shyǵys Dolomıttegi eń mańyzdy taý jotalarynyń biri Le Tofananyń esimimen atalǵan.
Ortalyq 1956 jylǵy Olımpıada oıyndary taý shańǵy jarystaryn ótkizgen. 1993 jyldan bastap áıelder arasyndaǵy taý shańǵy jarystary men sýper-G álem kýbogynyń turaqty ornyna aınaldy. 2021 jylǵy taý shańǵy álem chempıonaty da osynda ótti.
2026 jyly osynda áıelder arasynda Olımpıada jáne Paralımpıadalyq taý shańǵy jarystary ótedi dep kútilip otyr.
Verona Olımpıadalyq arenasy
Arena di Verona — b. z. 30 jyly salynǵan kóne rım amfıteatry. Bul — ıÝNESKO-nyń Búkilálemdik muralar tizimine engen jerde uıymdastyrylatyn sırek olımpıadalyq rásimderdiń biri.
Dál osy tarıhı nysanda 12 myńǵa jýyq kórermen 2026 jylǵy qysqy Olımpıada oıyndarynyń jabylý saltanaty jáne Paralımpıada oıyndarynyń ashylý saltanatyn tamashalaıdy.
Eske salaıyq, 2026 jylǵy Olımpıada oıyndary 6-22 aqpan aralyǵynda Italııanyń Mılan jáne Kortına-d’Ampetstso qalalarynda ótedi.
Baıraqty básekege Qazaqstan quramasynyń sapynda 36 sportshy qatysady.