2025 jylǵa deıin memlekettiń qatysy bar avtobýs parkteri jekeshelendiriledi
«Munda qoljetimdi bolý jaǵdaıy óte mańyzdy. Konkýrs ótkizý kezinde jolaýshylar men júkti avtomobıl kóligimen tasymaldaý erejeleri týraly baldyq baǵalaý shkalasy bar – bul memlekettik avtoparkterge artyqshylyq beretin konkýrstyq usynys. Merzimi neǵurlym tómen bolsa, soǵurlym kóp upaı beriledi. Árıne, jańartýdy eskersek, memlekettik avtoparkterdiń artyqshylyǵy bar», - dedi S. Jumanǵarın «Kazinform» alańynda «Qoǵamdyq kólikpen jolaýshylar tasymaldaýdaǵy básekelestik» atty jıynda.
Óndiristik, tehnıkalyq bazanyń bolýy jóninde spıker jolaýshylardy tasymaldaý jaǵdaıyn jaqsartatyn qosymsha jaǵdaılardyń óte mańyzdy ekenin jetkizdi.
«Otandyq óndiristen shyqqan mıkroavtobýstar bolsa – árbir danasy úshin 5 ball, jeke menshiktegi mıkroavtobýstar bolsa – árqaısysyna 5 ball. Lızıng úshin – ár danasyna 1 ball. Bul kelisim kem degende úsh jylǵa jasalady. Park jańartylǵan jaǵdaıda 10 jylǵa deıin uzartylady. Jaǵdaıdyń túzelip kele jatqany túsinikti. Memlekettiń tasymaldaý ekonomıkasyna qatysýy jyldan-jylǵa artyp keledi», - dedi Agenttik tóraǵasy.
Onyń aıtýynsha, Básekelestikti qorǵaý jáne damytý agenttigi «Open Space» jáne «Kedergi boıynsha keńester» atty ashyq alańdar qurǵan. Kedergiler jónindegi keńesterde bul máselelerge erekshe nazar aýdarylady.
«Tasymaldaý marshrýtyna qyzmet kórsetý quqyǵyna konkýrs ótkizý merzimderi reglamenttelmegen. Eger bireý marshrýttan bas tartsa, ketip qalsa, árıne, konkýrs ótkizý merzimderin belgileý qajet. Konkýrs kóbinese tıimdi jáne tıimsiz marshrýttar qosylǵan birneshe marshrýttardan turatyn bir lotqa ótkiziledi. Erejege sáıkes, tıimdi marshrýt tıimsizben birikse de, olar áleýmettik mańyzdy bolýy kerek. Taǵy bir másele – birqatar óńirlerde sýbsıdııalardyń bolmaýy. Buǵan deıin aıtqanymdaı, ne bıýdjettik ótinimderdi sapaly daıyndaý kerek nemese tasymaldaýǵa ádiletti bolatyn tarıf berý qajet. Bekitilgen tarıfke baılanysty bıznes shyǵynǵa ushyrap otyr. Kóptegen adamdar keıbir qashyqtyqta jolaýshylar aǵyny tómendegenin, sol úshin QQS alyp tastaýdy, avtobýs satyp alý kezindegi ýtılızatsııa aqysyn alyp tastaý keregin aıtyp júr. Infraqurylymnyń bolmaýy: janarmaı quıý, gaz, elektrlik qýattaý, avtobýs turaǵy, avtobýstyń kirýine arnalǵan arnaıy oryndardyń bolmaýy da – mańyzdy másele. Eń bastysy – memleket qatysatyn avtobýstardyń úlesi joǵary bolyp otyr. Biz osy baǵytta jumys júrgizemiz jáne 2025 jylǵa deıin básekelestikti damytý jónindegi ulttyq jobada memleket qatysatyn barlyq avtobýs parkteri jekeshelendiriledi dep josparlap otyrmyz. Tıisinshe, memlekettik jáne kvazımemlekettik parkterge arnalǵan qyzmet túri bolmaıdy. Árıne, bul básekelestikti damytý dárejesin eskere otyryp jasalady. Básekelestik áli damymaǵan aýdandyq nemese aýyldyq deńgeıde áli júrgizilmeýi múmkin», - deıdi S. Jumanǵarın.
