2025 jyly Otbasy bankiniń árbir úshinshi klıenti ómirinde alǵash ret óz baspanasyna ıe boldy
ASTANA. KAZINFORM - Kóptegen qazaqstandyqtar úshin alǵashqy páter nemese úı satyp alý – ómirdegi eń mańyzdy ári qýanyshty oqıǵalardyń biri. Bul armanǵa qol jetkizýge azamattarǵa Otbasy bank (Báıterek holdıngine qarasty) kómektesedi.
Jyl basynan beri banktiń árbir úshinshi salymshysy alǵash ret óz baspanasyn satyp alyp, jańa qonys ıesine aınaldy.
Qazaqstandyqtar tıimdi jınaq júrgizip, qoljetimdi nesıe alýǵa turǵyn úı qurylys jınaqtary júıesi jáne onyń negizinde iske qosylǵan baǵdarlamalardyń arqasynda jetti. Bul baǵdarlamalar ártúrli halyq toptaryna baǵyttalǵan – jas mamandardan bastap, turǵyn úı kezeginde turǵan otbasylarǵa deıin. Olar jınaqtaý merzimin qysqartyp, tıimdi sharttarmen jyljymaıtyn múlik satyp alýǵa múmkindik beredi.
Bıyldan beri alǵashqy baspanasyn satyp alǵan qazaqstandyqtar sany mynadaı:
Ǵalymdardan – 191 adam. Olarǵa nesıe jyldyq 5% mólsherlememen berilip, bastapqy jarna 10% boldy.
Memlekettik baǵdarlamalar arqyly turǵyn úı kezeginde turǵan 4 935 adam baspanaly boldy. Nesıe mólsherlemesi 2% nemese 5%, bastapqy jarna 10% bolyp belgilengen.
«Naýryz» jáne «Naýryz jýmysker» baǵdarlamalary boıynsha 7 038 qazaqstandyq úıli boldy. Áleýmettik osal sanattaǵy azamattarǵa nesıe mólsherlemesi 7%, qalǵandaryna – 9%. Aıta keterligi, bul baǵdarlama arqyly úı máselesin negizinen 35 jasqa deıingi jastar sheshe aldy – berilgen nesıelerdiń shamamen 60%-y olarǵa tıesili.
Oblystardaǵy 4 656 turǵyn óńirlik baǵdarlamalar aıasynda jańa baspanasyna ıe boldy. Bul baǵdarlamalar ákimdiktermen birlese júzege asyrylady, sondyqtan sharttary ár óńirde ártúrli bolýy múmkin.
Turǵyn úı qurylys jınaq júıesiniń qatysýshylary baǵdarlamalardan tys.
-Bıyldan beri Otbasy bankiniń qoldaýymen 60 myń qazaqstandyq otbasy óz baspanasyna ıe boldy. Olar jalpy 1,250 trln teńge nesıe aldy. Ótken jyldyń osy kezeńimen salystyrǵanda jańa turǵyn úıge qonys aýdarǵandar sany 15%-ǵa, berilgen nesıeler kólemi 37%-ǵa ósken. Biz úshin erekshe mańyzdysy – bıyl árbir úshinshi Otbasy bank klıenti alǵash ret óz páteriniń esigin ashty. Bul degenimiz bank shynymen de adamdarǵa ómirindegi eń basty máselelerdiń biri – óz úıin satyp alý máselesin sheshýge kómektesip otyrǵanyn kórsetedi, – dedi Otbasy bank basqarma tóraǵasy Lázzat Ibragımova.
Qazirgi tańda Otbasy bankinde 3 195 535 qazaqstandyq óz baspanasyna jınaq jasaýda. Kún saıyn shamamen 2 500 jańa depozıt ashylyp, 200-deı nesıe beriledi. Banktiń qoldaýymen bıyldyń sońyna deıin taǵy 7 000–10 000 qazaqstandyq alǵashqy baspanasyn satyp ala alady dep kútilýde.
2025 jylǵy JSS júıesiniń negizgi kórsetkishteri:
694 094 jańa depozıt ashyldy;
Uzaq merzimdi teńgedegi salymdardaǵy bank úlesi – 32%;
60 myń otbasy qoljetimdi nesıe aldy;
Eldegi ıpotekalyq portfeldegi bank úlesi – 51% (01.09.2025 málimeti boıynsha);
Problemalyq nesıeler deńgeıi (NPL 90+) – tek 0,12%, naryqtaǵy ortasha kórsetkish – 3,51%.
Qazirgi tańda Otbasy bank Áskerı baspana baǵdarlamasynyń jańa sharttaryn Qorǵanys mınıstrligi jáne basqa da vedomstvolarmen talqylap jatyr. Baǵdarlamaǵa áskerı qyzmetkerler, Qaýipsizdik qyzmeti, ІІM, TJK, memlekettik kúzet qyzmeti, áskerı prokýratýra jáne taǵy basqa qyzmetkerler qatysa alady.
Otbasy bank «Áskerı baspana» baǵdarlamasy boıynsha ótinim qabyldaý bastalatyny jáne «Naýryz» baǵdarlamasyna qosymsha qabyldaý týraly qosymsha habarlaıdy.