2025 jyly Qytaıdyń Qazaqstandaǵy týrızm jyly ótedi
ASTANA. KAZINFORM – 2025 jyly Qytaıdyń Qazaqstandaǵy týrızm jyly ótedi. Bul týraly Qytaı Halyq Respýblıkasynyń Tóraǵasy Sı Tszınpınmen kelissózderden keıingi baspasózge arnalǵan málimdeme barysynda Memleket basshysy Qasym-Jomart Toqaev aıtty.
«Kelissózder barysynda mádenı-gýmanıtarlyq baılanysty jáne týrızm salasyndaǵy yqpaldastyqty kúsheıtýge basa nazar aýdaryldy. Osy sapar aıasynda Beıjińde Qazaqstannyń jáne Astanada Qytaıdyń Mádenı ortalyqtary ashyldy. Muny ekijaqty baılanysty bekemdeý úshin jasalǵan óte mańyzdy qadam dep aıtýǵa bolady. Bul bastamalar halyqtarymyzdy mádenı turǵydan jaqyndatyp, ózara dostyq pen tatý kórshilik qatynastardy nyǵaıtýǵa yqpal etedi dep senemin. Munan bólek, eki el aýmaǵynda turaqty túrde mádenı is-sharalar ótkizýge ýaǵdalastyq», - dedi Prezıdent.
Memleket basshysy Qazaqstan men Qytaı azamattary úshin eki el arasynda vızasyz rejım qoldanyla bastaǵanyn erekshe atap ótti.
«Qazir onyń ıgiligin azamattarymyz kórip otyr. Ásirese, eki eldiń kórshiles aımaqtarynyń halqyna, kásipkerler men týrısterge, jastar men sheteldik áriptesterge tıim boldy. Bıyl naýryzda Beıjińde Qazaqstannyń Qytaıdaǵy Týrızm jyly saltanatty túrde ashyldy. Kelesi jyly osy sharanyń jalǵasy retinde Qytaıdyń Qazaqstandaǵy týrızm jyly ótedi. Búgin qol jetkizilgen kelisimder elderimiz arasyndaǵy baılanystardy nyǵaıtyp, halqymyzdyń ıgiligine qyzmet etedi dep senemin», - dedi Qasym-Jomart Toqaev.
