2025 jyly balalardy mektepke deıingi tárbıe jáne oqytýmen qamtý 95%-ǵa deıin ulǵaıady
ASTANA. KAZINFORM – Qazaqstan Respýblıkasy Oqý-aǵartý mınıstrliginiń málimetinshe, 2025 jyly balalardy mektepke deıingi tárbıe jáne oqytýmen qamtýdy 95%-ǵa deıin ulǵaıtý josparlanyp otyr.
Bul týraly Úkimettiń resmı saıty habarlady.
Mektepke deıingi uıymdarǵa barmaıtyn balalardyń ata-analaryna ádistemelik qoldaý kórsetý úshin, balalardyń otbasylyq jaǵdaıda tárbıe alýy, damýy jáne kútimi máseleleri boıynsha keńes berý pýnkti sanyn 4 245-ke deıin arttyrý josparlanǵan.
Memlekettik 260 balabaqshada qaıta jóndeý jumystary júrgizilip, qural-jabdyqtar jańartylady. 500 myń bala qazaq tilin tereń oqytý boıynsha «Tilge boılaý» pılottyq jobasyna qatysady. 2025 jyly elimizdiń barlyq óńirinde «Qarajatty balanyń sońynan ilestirý» qaǵıdaty boıynsha mektepke deıingi tárbıe jáne oqytý uıymdaryn vaýcherlik qarjylandyrý júıesin engizý josparlanyp otyr.
Orta bilim berýde 272,8 myń oqýshyǵa arnalǵan oryn engizý; erekshe qajettiligi bar balalardyń 90%yn arnaıy psıhologııalyq-pedagogıkalyq qoldaý jáne erte jastan túzetý sharalarymen qamtý; fızıka, hımııa, bıologııa, robototehnıka, STEM pánderi boıynsha 1 myń zamanaýı kabınet satyp alý; 1,3 myń aýyl mektebin qaıta jańartý jobasyn iske qosý josparlanýda.
Kolledjderde tehnıkalyq jáne kásiptik bilim berý baǵyty boıynsha suranysqa ıe mamandyqtarǵa (9-synyp túlekterin) 100% tegin oqytýmen qamtý; jumysqa ornalastyrý mindettemesimen maqsatty tapsyrysty 10 myń orynǵa ulǵaıtý; jan basyna shaqqandaǵy normatıvtik qarjylandyrý kólemin 2 esege arttyrý; jeke ınvestıtsııa tartý arqyly 80 kolledjdiń materıaldyq-tehnıkalyq bazasyn nyǵaıtý jáne jabdyqtaý; kolledjderde shaǵyn 10 kásiporyn ashý josparlanyp otyr.
Osyǵan deıin úkimettiń baspasóz qyzmeti tutastaı alǵanda, bilim berý júıesi men ǵylym salasy ǵylymı-tehnologııalyq progress suranystarynan týyndaıtyn serpindi damý satysynda turǵanyn málimdedi.