2025 jyly Almatyda kimderge páter beriledi
ALMATY. KAZINFORM – Almatyda kelesi jyly 3050 otbasy men jas mamandar baspanamen qamtylady.
— 3050 páterdiń 2 myńy halyqtyń áleýmettik osal toptarynan kezekte turǵandarǵa (ÁQQ) jáne 1050-i jumys isteıtin jastarǵa bólinedi,— dep jaýap berdi Kazinform tilshisine Almaty qalalyq kommýnaldyq ınfraqurylymdy damytý basqarmasynyń bólim basshysy Nurtas Raqymbergen.
2024 jyly Almatyda kommýnaldyq turǵyn úı qorynan kezekte turǵan 2 myń adam baspanaly boldy. Degenmen, másele ózekti kúıinde qalyp otyr.
Qazir qalada 43 688 adam úıge kezekte tur. Kópbalaly analardan 7 822 adam, jetim balalardan — 2334, áleýmettik osal toptardan — 18450, bıýdjettik uıym qyzmetkerlerinen 15 082 adam bar.
«Almaty áleýmettik-kásipkerlik korporatsııasy» ulttyq kompanııasynyń málimetinshe, jyl basynan beri megapolıste tozyǵy jetken úıdiń 400 turǵyny jańa úıge kóshirildi. Bul «2021-2025 jyldarǵa arnalǵan turǵyn úı qoryn jańartý baǵdarlamasy» aıasynda júzege asty. Onyń ishinde 280 páterdi «Almaty qalasy ákimdiginiń kúrdeli qurylys kásiporny» JShS, 120 páterdi jeke ınvestorlar kóshirdi.
Jańartý baǵdarlamasy aıasynda adamdardyń ómirine qaýip tóndiretin jaramsyz ári merzimi ótken tozyǵy jetken úıler buzylady. Baǵdarlamaǵa 1930 jyldan 1980 jylǵa deıin salynǵan eki qabatty kóppáterli úıler, sondaı-aq jeke turǵyn úıler, óndiristik, saýda jáne qoǵamdyq nysandar kirdi.
Baǵdarlamanyń shartyna sáıkes, eski turǵyn úı ıeleri jańa úıden birdeı páter alady. Sonymen qatar, jańa páter orta eseppen 10 sharshy metrge keń. Jańa páter ıelerine qosymsha sharshy metr úshin qosymsha aqy tóleýdiń qajeti joq. Páterler taza árleýmen beriledi. Úılerge ınternet tartyldy, órtke qarsy dabyl ornatyldy, santehnıka men faıans, gaz nemese elektr plıtasy qarastyrylǵan.
Qurylys kezinde turǵyndarǵa tegin ýaqytsha turǵyn úı beriledi. Sondaı-aq, turǵyndardyń kúrdeli qurylys kásipornynyń turǵyn úı qorynan daıyn úıge turaqty turýǵa kóshý múmkindigi bar.
— Búgin 2030 jylǵa deıingi jańǵyrtý baǵdarlamasynyń jobasy ázirlendi. Ol tozyǵy jetken úılerdiń ıeleri, ınvestorlar men ýákiletti uıymdar arasyndaǵy qarym-qatynasty retteý, eski páterdi berý tártibin naqtylaý jáne 2023 jyly qabyldanǵan qalanyń jańa bas josparyn eskere otyryp, jańa tetikterdi qarastyrady, — dep atap ótti Almaty áleýmettik-kásipkerlik korporatsııasynan.
Jalpy, 2030 jylǵa qaraı keminde 676 apatty úıdi buzý josparda. Bul 7500-ge jýyq úı ıesin zamanaýı, jaıly páterlerge kóshirýge múmkindik beredi.
Osyǵan deıin «Almaty jastaryna» ótinim bergen 2 myńǵa jýyq jas baspanaly bolǵany týraly jazǵan edik.
Eske salaıyq, nesıeniń eń joǵary somasy — 18 mln teńgege deıin. Syıaqy mólsherlemesi — 5, bastapqy jarnasy — 10 paıyz.
Qatysýshynyń jańa salynǵan nemese qoldanystaǵy turǵyn úı naryǵynan úı tańdaý múmkindigi bar.