2025 jylǵy Býker syılyǵynyń jeńimpazy jarııalandy

ASTANA.KAZINFORM — Kanadalyq-vengrııalyq-brıtandyq jazýshy Devıd Saleıge «Tán» romany úshin Býker syılyǵy berildi, dep habarlaıdy syılyqtyń veb-saıty.

Vengrııalyq-brıtandyq jazýshy Devıd Saleı «Tán» romany úshin 2025 jylǵy Býker ádebıet syılyǵynyń jeńimpazy atandy. Syılyqtyń veb-saıtyndaǵy aqparatqa sáıkes, bul týraly Londondaǵy rásimde qazylar alqasynyń tóraǵasy, ırlandııalyq jazýshy Roddı Doıl habarlady.

Qazylar alqasy irikteýden ótken alty kitapty bes saǵattan astam ýaqyt boıy talqylaǵan.

— Biz qaıta-qaıta orala bergen, basqa keremet romandardyń arasynda erekshelengeni «Tán» romany boldy. Biz mundaı kitapty eshqashan oqyǵan emespiz. Kóp jeri bulyńǵyrlaý, biraq oqyp rahattanasyń, — dedi Roddı Doıl.

Saleıge 50 myń fýnt sterlıng jáne ótken jylǵy jeńimpaz Samanta Harvı syıǵa tartqan kýbok berildi.

Devıd Saleı, basylymda aıtylǵandaı, qazylar alqasynyń nazaryn taqyrybynyń ereksheligimen jáne onyń usynylýymen aýdardy. Kitapta Halyqaralyq ǵarysh stantsııasynda alty ǵaryshkerdiń, onyń ishinde eki reseılik ǵaryshkerdiń bir kúni sıpattalady.

Roman erkektik, taptyq jáne bılik taqyryptaryn zertteıdi. Saleıdiń ózi kitapty «qazirgi Eýropa jáne ony sıpattaıtyn mádenı jáne ekonomıkalyq aıyrmashylyqtar týraly» dep sıpattaıdy.