2025 jyldyń qaharmandary
ASTANA. KAZINFORM – 2025 jyly ózgeniń ómiri úshin óz ómirin aıamaǵan qazaqstandyqtar az bolmady. Olardyń keıbiri kóz jumǵannan keıin marapattalyp jatty.
Almaty áýejaıyndaǵy oqys oqıǵa
2025 jyldyń basynda Almaty halyqaralyq áýejaıynda qarapaıym jolaýshy bir adam ajaldan aman qalyp qalǵany habarlandy.
Vıdeodan 7 naýryz kúni belgisiz er adam aldyn ala tekserý aımaǵyna kelip, áýejaı qyzmetkerin shashynan ustap, pyshaqpen qorqyta bastaǵanyn kórýge bolady. Polıtsııa kelissóz júrgizip jatqan sátte reıske tanysyn shyǵaryp salýǵa kelgen basqa bir er adam qyzdyń ornyna kepilge ózin alýdy usynady. Ol qolaıly sátte pyshaqty jalań qolymen ustap, kúdiktini polıtsııanyń tutqyndaýyna jaǵdaı týǵyzady.
Keıin bul 53 jastaǵy Musa Ábdiraıym esimdi adam ekeni belgili. Oǵan «Erligi úshin» medali tabystaldy.
Al áýejaıdyń shyrqyn buzǵan Mashrapbek Baratov shilde aıynda «Kepilge alý», «Qarýmen jasalǵan buzaqylyq» jáne «Terrorızm aktisi týraly jalǵan aqparat taratý» baptary boıynsha 10,5 jylǵa bas bostandyǵynan aıyryldy.
Qos aqqýdy qutqarǵan
Pavlodar oblysynda Baıanaýyl aýdanynda jyly jaqqa usha almaı, Sýlysor kólinde qalyp qoıǵan eki aqqýdyń taǵdyry qazaqstandyqtardy beıjaı qaldyrǵan joq. Birlik aýyldyq okrýginiń turǵyny Baýyrjan Jaqypov sharasyz qustardy qutqaryp, osy erligi úshin biraz marapattarǵa ıe boldy.
Qos aqqý oblys ortalyǵyndaǵy veterınarlyq klınıkada qystaıtyn boldy.
Aty-jónin jasyrǵan qutqarýshy
16 qarashada 42 jastaǵy Kókshetaý turǵyny Sergeı Tsýpkın muzda oınap júrip Qylshaqty ózenine túsip ketken 7, 8 jáne 9 jastaǵy úsh balany qutqaryp qaldy.
Birneshe kún boıy balalar da, qutqarýshylar da belgisiz batyrdyń kim ekenin bile almaǵan.
Aqyry áleýmettik jeli arqyly batyr jumbaq qutqarýshynyń kim ekeni anyqtalyp, oblystyq tótenshe jaǵdaılar departamenti Sergeı Tsýakınke alǵys hat pen baǵaly syılyq tabystady.
Shaqyrýdan oralmaǵan feldsher
Astanalyq feldsher Uldana Myrzýannyń qazasy óz mamandyǵyna adaldyqtyń mysaly bolyp tarıhqa endi.
8 qarasha kúni Astanada ǵımarat qaptamasynyń opyrylýynan zardap shekkenderdi qutqarýǵa kelgen Uldananyń ústine de aýyr zat qulap, aýyr jaraqattan kóz asha almaı ketti.
Eki aı buryn ǵana turmys qurǵan feldsherge «Erligi úshin» medali tabystaldy.
Úsh balany ajaldan qutqarǵan er adam
23 qazanda Semeıde eki er adam jer úıdegi órtten 74 jastaǵy er adam men 73 jastaǵy áıeldi aman alyp shyqty. Órt sóndirýshiler kelgenshe úıdegi gaz ballonyn shyǵaryp, jarylystyń aldyn alǵan. Isaı Qydyrhanov pen Tımýr Kákimov Tótenshe jaǵdaılar mınısrliginiń «Órtte kórsetken qaısarlyǵy úshin» medalimen marapattaldy.
Eriksiz qutqarýshy
Shyǵys Qazaqstan oblysynyń bir aýylynda da jer úı órtenip, 4 bala qutqaryldy. Órt balalardyń anasy jumysta júrgen kezde shyqqan. Kómekke shaqyrǵan aıǵaıdy birinshi estigen Dmıtrıı Nedozrelov kómekke umtylady.
Ol jetken kezde 6 jáne 13 jastaǵy eki bala, ishte 2 jáne 4 jastaǵy eki bala qalǵanyn aıtady.
Dmıtrıı eki balany úıden aman shyǵaryp, dárigerlerge tapsyrady.
Almatylyq «Órmekshi adam»
Almatydaǵy turǵyn úılerdiń birinde balkon órtenip jatqanyn kórgen turǵyn oılanbastan kómekke júgiredi. Balkonnan balkonǵa órmeleý arqyly 2 mınýtqa jetpeıtin ýaqyttyń ishinde órt oshaǵyna jetken 33 jastaǵy Asyl Ahmetov tútindep jatqan qoqysty tómenge tastap, alapat órttiń aldyn alǵan. Jergilikti ákimdik onyń bul erligin eleýsiz qaldyrǵan joq.
10 myń metr bıiktiktegi reanımatsııa
Qańtar aıynda Qyzylorda-Astana baǵytyndaǵy áýe reısinde jolaýshynyń júregi toqtap, elordadaǵy medıtsına ýnıversıtetiniń stýdenti Dinmuhammed Bekturǵannyń arqasynda aman qaldy. Ol dereý reanımatsııa jasap, jolaýshyǵa der kezinde kómek bergen. Keıin onyń buǵan deıin de dál osyndaı saparlasyna alǵashqy medıtsınalyq kómek kórsetkeni belgili boldy.
Ózi ólgenmen ózgege ómir syılaǵandar
2025 jyly Qazaqstanda máıit donory bolǵan 14 adam k adamǵa ómir syılady.
• 63 jastaǵy áıeldiń aǵzasy alty naýqastyń ómirin uzartty. Olardyń ishinde 2017 jyldan beri kútý paraǵynda turǵan adam da bar.
• Al 58 jastaǵy almatylyq er adam tórt adamǵa ómir úshin kúresýge múmkindik syılady.
• 50 jastaǵy áıeldiń júregi 34 jastaǵy er adamǵa salyndy. Onyń qasań qabyǵy taǵy bir adamnyń kórý qabiletin qalpyna keltirdi.
• Jeltoqsanda Mańǵystaý oblysynda 45 jastaǵy adamnyń júregi muqtaj patsıentke salyndy.