2024 jyly qazaqstandyqtar qandaı mańyzdy sporttyq sharalardy tamashalaıdy
Jańa jyldaǵy iri sporttyq jarystar shymyldyǵyn IV qysqy jasóspirimder Olımpıadasy túrip beredi. Bul týraly Kazinform Týrızm jáne sport mınıstrligine silteme jasap jazdy.
2024 jylǵy 19 qańtar men 1 aqpan aralyǵynda Kanvondo qalasynda (Ońtústik Koreıa) ótetin IV qysqy jasóspirimder Olımpıadasyna Qazaqstan sportshylary da qatysady. Qazirgi ýaqytta el quramasynda 5 sport túri (10 dıstsıplına) boıynsha 30 lıtsenzııa bar (42 sportshy).
Bıylǵy jyldyń basty oqıǵasy – Parıjdegi jazǵy Olımpıada oıyndary dep ataýǵa bolady. Bul doda 26 shilde men 11 tamyz aralyǵynda álemniń 205 elinen kelgen 10 myńnan astam sportshynyń qatysýymen ótedi. Tórt jyldyqtyń jarysynda sporttyń 32 túrinen 329 medal jıyntyǵy sarapqa salynady. Qazaqstan ulttyq quramasy sporttyń 20 túrine qatysýdy josparlap otyr. Búgingi tańda jerlesterimizde sporttyń 8 túri boıynsha (sadaq atý, veloshosse, oq atý, qazirgi bessaıys, grek-rım kúresi, erkin kúres, sporttyq gımnastıka jáne boks) 17 lıtsenzııa bar. Alda 90-ǵa jýyq lıtsenzııalyq jarys kútip tur. Sondyqtan joldamalar sanyn áli de kóbeıtý múmkindigi bar.
Elimiz úshin jyldyń mańyzdy tarıhı oqıǵasy – elordada V Dúnıejúzilik kóshpendiler oıyndaryn uıymdastyrý jáne ótkizý (2024 jylǵy 8-14 qyrkúıek aralyǵynda). Qazaqstanǵa álemniń 100-den astam elinen delegatsııalar keledi dep kútilýde. Oıyndardyń biregeıligi – sporttyq, mádenı jáne ǵylymı baǵdarlamalardyń ushtasýynda. Baǵdarlamaǵa 20 jarystyq jáne 10 kórneki sport túri kirip, 110 medal jıyntyǵy oınatylady. Jarys at sporty, ulttyq kúres, sadaq atý, qustarmen ań aýlaýdyń túrleri, dástúrli zııatkerlik oıyndar boıynsha ótedi. Qazirgi ýaqytta ulttyq qurama daıarlyqty bastady, komandalar quramy qalyptasýda, oqý-jattyǵý sharalary ótkizilýde.
Bıyl Astanada áıelder arasyndaǵy bokstan álem chempıonaty ótedi. Bul týraly Tashkentte (Ózbekstan) ótken Halyqaralyq boks qaýymdastyǵynyń (IBA) resmı otyrysynda habarlandy. IBA Federatsııasy prezıdentiniń aıtýynsha, týrnırdiń jalpy júlde qory 4,8 mıllıon AQSh dollaryn quraıdy. Álem chempıony atanǵan boksshy 200 000 AQSh dollaryn alady.
Sondaı-aq 2024 jyldyń qarashasyna Astana qalasynda sambodan álem chempıonaty josparlanǵan. Ótken jyly kúzde Erevanda ótken sambodan 48-shi álem chempıonatyna 65 el qatysyp, jalpy esepte Qazaqstan quramasy 1 altyn, 2 kúmis jáne 5 qolamen úshinshi orynǵa taban tiredi.
