2024 jyly Qazaqstanda ınflıatsııa 8,0% bolady – Ulttyq bank
ASTANA. KAZINFORM – Qazaqstan Ulttyq Banki sarapshylar qaýymdastyǵy arasynda júrgizilgen kezekti makroekonomıkalyq saýalnamanyń nátıjesin jarııalady.
Málim bolǵandaı, saýalnama júrgizgende Brent markaly munaıdyń baǵasy, Qazaqstan ekonomıkasynyń ósimi, ınflıatsııa, bazalyq mólsherleme, taýarlar men qyzmetterdiń eksporty men ımporty, sondaı-aq ulttyq valıýta baǵamy syndy negizgi parametrler eskerilgen.
«Osy jyldyń tamyz aıynda munaı baǵasyna qatysty stsenarıı sharttary aıtarlyqtaı ózgeriske ushyramady. Respondentterdiń medıanalyq kútýleri boıynsha, 2024 jyly Brent markaly munaıdyń baǵasy ortasha eseppen barreline 83,5 AQSh doll. deńgeıinde qalyptasady (buǵan deıin — 83,7 AQSh doll.). 2025 jáne 2026 jylǵy kútýler 80,0 AQSh doll. deńgeıinde saqtalyp otyr», - dep habarlady banktiń baspasóz qyzmeti.
Al 2024 jáne 2026 jyldarǵa arnalǵan Qazaqstan ekonomıkasyna qatysty boljam 4,0% (budan buryn — 4,1%) jáne 4,4%-ǵa (budan buryn — 4,5%) deıin azdap qaıta qaralǵan. 2025 jyly, burynǵydaı 5,0% deńgeıinde ósim kútilip otyr.
2024 jáne 2026 jyldary ınflıatsııa 8,0% jáne 6,0% deńgeıinde kútiledi. 2025 jylǵa arnalǵan boljam 6,8%-dan 6,9%-ǵa deıin azdap nasharlady.
«Sarapshylardyń 2025 jylǵa arnalǵan bazalyq mólsherleme deńgeıi boıynsha kútýleri 11,0%-dan 11,9%-ǵa deıin qaıta qaralǵan. 2024 jylǵa arnalǵan bazalyq mólsherleme boljamdarynyń medıanalyq mánderi 14,4%-dan 14,5%-ǵa deıin birshama joǵarylady. 2026 jylǵa arnalǵan baǵalaýlar ózgergen joq», - delingen habarlamada.
Saýalnamaǵa Qazaqstan aýmaǵynda makroekonomıkalyq kórsetkishterdi taldaýmen jáne boljaýmen aınalysatyn 14 uıym qatysqan. Respondentterdiń qataryna naryqtyń kásibı qatysýshylary, zertteý ınstıtýttary jáne halyqaralyq uıymdar men reıtıngtik agenttikter kiredi.
Belgili bolǵandaı makroekonomıkalyq saýalnamaǵa Ulttyq Bank boljamdary kirmeıdi. Onda ishki jáne álemdik naryqtardaǵy ahýaldyń damýyna qatysty naryqtyń kásibı qatysýshylarynyń derbes pikirine, baǵalaýlary men kútýlerine sholý jasalyp otyr.
