2024 jyly el ekonomıkasy keminde 5,3% deńgeıinde ósedi - Úkimet
ASTANA. KAZINFORM - Úkimet 2024 jyly el ekonomıkasy keminde 5,3% deńgeıinde ósedi dep boljap otyr.
Ótken jyldyń qorytyndysyna sáıkes el ekonomıkasy jańa jaǵdaılarǵa beıimdelip, ornyqty damý jolyna tústi. Qabyldanǵan sharalar nátıjesinde ekonomıkanyń ósimi 5,1%-dy qurady.
Negizgi salalardyń barlyǵy oń dınamıka kórsetti: qurylysta – 13,3%, saýdada – 11,3%, aqparat jáne baılanys qyzmetteri – 7,1%, kólik qyzmeti – 6,9%, ónerkásip – 4,3%.
Negizgi kapıtalǵa salynǵan ınvestıtsııa 13,7%-ǵa ósti. Bul rette 2023 jyldyń 9 aıynda tikeleı sheteldik ınvestıtsııa (TShI) kólemi $19,7 mlrd-ty qurady. Onyń ishinde $11 mlrd-tan astamy shıkizattyq emes sektorlarǵa baǵyttalǵan. Jalpy 2 jyl qatarynan TShI kórsetkishteri sońǵy onjyldyqtaǵy eń joǵary kórsetkishterdiń birine aınaldy – olardyń jyldyq kólemi $26-28 mlrd deńgeıinde. Qazaqstan TMD elderi arasynda sheteldik ınvestıtsııalardyń jalpy aǵyny boıynsha kósh bastap tur.
2023 jyldyń 11 aıynda syrtqy saýda aınalymy 2,2%-ǵa ósip, $126 mlrd-ty qurady. Oń saýda balansy $16 mlrd-tan asty. Shıkizattyq emes eksport nomenklatýrasy 141 pozıtsııaǵa ósti.
Elimizdiń halyqaralyq rezervteri $96 mlrd-ty qurady, onyń ishinde Ulttyq qordyń aktıvteri $4 mlrd-qa ósip, $60 mlrd-tan asty. Halyqaralyq reıtıngtik agenttikter Qazaqstan ekonomıkasynyń táýelsiz reıtıngi men ınvestıtsııalyq senimdiligin rastady.
Úkimet Ulttyq bankpen jáne jergilikti atqarýshy organdarmen birlesip ınflıatsııany baqylaý jáne tómendetý jónindegi keshendi sharalardy iske asyrýda. Nátıjesinde ótken jyly ol 2 eseden astam tómendep, 9,8%-dy qurady. 2024 jyly ınflıatsııany 6-8% deńgeıinde ustaý mindeti qoıyldy.
2024 jyldyń qorytyndysy boıynsha ekonomıkanyń ósýi 5,3%-dan kem bolmaýy tıis.
Úkimet Memleket basshysynyń Saılaýaldy baǵdarlamasy men Qazaqstan halqyna joldaýlarynda belgilengen mindetterdi iske asyrýdy jalǵastyrýda. Atalǵan jumys ekonomıkany belsendi ártaraptandyrýǵa, kásipkerlikti damytýǵa, ınvestıtsııa tartýǵa jáne azamattardyń ál-aýqatyn edáýir jaqsartýǵa baǵyttalǵan. Munyń bári 2029 jylǵa qaraı JІÓ-ni eki esege arttyrýǵa berik negiz bolady.
