2024 jyly ekonomıka 4,8 paıyzǵa ósti — Oljas Bektenov
ASTANA. KAZINFORM — Agrarlyq sektor men óńdeýshi salada sońǵy 10 jyl ishindegi eń qarqyndy ósim tirkeldi. Bul týraly Úkimettiń keńeıtilgen otyrysy barysynda Premer-mınıstr Oljas Bektenov aıtty.

— 2024 jyly ekonomıka 4,8 paıyzǵa ósti. Aýyl sharýashylyǵynda 13,7 paıyz, qurylysta — 13,1, saýdada — 9,1, kólik salasynda 8,5 paıyz deńgeıinde ósimge qol jetkizildi. Óńdeý ónerkásibiniń kólemi 5,9 paıyzǵa ulǵaıdy. Agrarlyq sektor men óńdeýshi salada sońǵy 10 jyl ishindegi eń qarqyndy ósim tirkeldi, — dedi Oljas Bektenov.
Onyń aıtýynsha, munaı óndirý kólemi 2 mln 400 myń tonnaǵa tómendep, jalpy ishki ónimniń ósý qarqynyna keri áserin tıgizdi.
— Bul kóbine elimizdiń OPEK+ aıasyndaǵy mindettemelerine jáne iri ken oryndaryndaǵy kúrdeli jóndeý jumystaryna baılanysty boldy, — dedi Úkimet basshysy.
Budan buryn habarlanǵandaı, Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy bastaldy.