2024 jyly álemde qandaı tabıǵı apattar boldy
ASTANA. KAZINFORM – Kazinform agenttigi 2024 jyly álemde bolǵan eń iri tabıǵat apattarǵa sholýyn usynady.
Іri tabıǵat apat degende elimizde keıingi 80 jylda tirkelmegen bıylǵy tasqyndy aıtpaı ketý múmkin emes. Saldarynan bir mezgilde birneshe óńirde jalǵyz baspana bolyp eseptelgen 17,6 myńǵa jýyq úı men saıajaı qurylystary sý astynda qalyp, 8447 úı apatty dep tanyldy.
3,5 aıdyń ishinde tıptik jobalar boıynsha 2576 úı salynyp, qaıtalama naryqtan 5767 úı men páter satyp alyndy. Sonymen qatar, 9156 úı jóndeldi.
Bıyl tasqyn ábigerge salǵan memleket tek Qazaqstan ǵana emes. Oman, BAÁ, Iran jáne Iemende nóser jaýyn 32 adamnyń ómirin qıdy.
Al Aýǵanstan men Pákistandaǵy sý tasqyny 1100-den astam adamnyń ómirin qıyp, ondaǵan myń adam jaraqat aldy.
Fılıppınde, Qytaıdyń Haınan provıntsııasy men Vetnamnyń soltústiginde bolǵan ıAgı taıfýny júzdegen adamnyń ómirin jalmap, 16,6 mıllıard dollar shyǵyn ákeldi.
Sondaı-aq Meksıkadaǵy daýyl memleketti 2,5 mıllıard dollar shyǵynǵa ushyratty.
AQSh-taǵy «Mılton» daýyly Florıdany ábigerge salyp, apattyń ekonomıkalyq shyǵyny 85 mıllıard dollarǵa baǵalandy.
Indonezııada Batys Sýmatrany sý basyp, 16 kópirdi qıratyp, joldardy búldirdi, 19 adam kóz jumdy. Al jýyqta ǵana Sýkabýmı aralynda qatty jańbyrdan keıin 200-ge jýyq aýyldy sý basyp qaldy.
Ońtústik Afrıkada qalyń qardan elektr qýaty men sý qubyry buzylyp, eki adam úsip óldi.
Bolıvııada 10 mln gektardan astam jerdi sharpyǵan orman órti 12 myńnan astam otbasyǵa zııanyn tıgizdi.
BUU Bas hatshysy Antonıo Gýterrısh Dúnıejúzilik qorshaǵan ortany qorǵaý kúnine oraı sóılegen sózinde adamzatty tabıǵatty aıalap ustaýǵa úndedi.
- Biz jer sharymen «orys rýletkasyn» oınap júrgendeımiz. Klımat tozaǵyna apara jatqan joldan shyǵýymyz kerek. Bir jubanatyn jaıt, kólik tizgini óz qolymyzda. Osy tizgindi ustap otyrǵan úkimetter, kásiporyndar, jalpy adamzat durys joldy tańdaýǵa tıis, - degen edi BUU basshysy.
Osyǵan deıin «Sońǵy 30 jylda tabıǵı apattan eń qatty zardap shekken aımaq — Azııa» atty taqyrypta materıal jarııalaǵan edik.