Toqaev: 2024 — aıryqsha mańyzdy jyl, óıtkeni osy kezeń elimizdiń aldaǵy bes jyldaǵy damýyna negiz bolady

Qasym-Jomart Toqaev 2024 jyldyń erekshe mańyzdy jyl bolatynyn atap ótti, dep habarlaıdy Kazinform.

— 2023 jyl elimiz úshin mańyzdy oqıǵalarǵa toly jyl boldy. Biz negizgi saıası reformalardy aıaqtap qaldyq. Konstıtýtsııalyq Sot jumysyn bastady. Májilis jáne barlyq deńgeıdegi máslıhat depýtattary jańa ereje boıynsha saılandy. Alǵash ret aýdan jáne oblystyq mańyzy bar qala ákimderin saıladyq. Aýyl jáne aýdandyq mańyzy bar qala ákimderin saılaý jalǵasty. Byltyr 700-ge jýyq aýyl ákimi saılandy. Biz ádil jáne básekeli ekonomıka júıesin qurýǵa kiristik. Ekonomıkany ártaraptandyrý jáne monopolııadan aryltý, ınfraqurylymdy jańǵyrtý, bıznesti qoldaý, ınvestıtsııa tartý jumystarymen myqtap aınalystyq, — dedi Memleket basshysy Egemen Qazaqstan gazetine bergen suhbatynda. 

Onyń aıtýynsha, áleýmettik salada qordalanyp qalǵan máseleler birtindep sheshile bastady.

Elimizdiń túkpir-túkpirinde bilim oshaqtary, onyń ishinde, «jaıly mektepter» boı kóterýde.

Aýyldarda densaýlyq saqtaý nysandary salynyp jatyr. Áleýmettik turǵydan osal toptaǵy azamattarǵa keshendi túrde qol­daý kórsetý úshin Áleýmettik kodeks qabyldandy.

Zııandy eńbek jaǵ­daıynda jumys isteıtin azamat­tar úshin arnaıy tólemaqy engi­zil­di.

Tabıǵatty qorǵaýǵa jaýapty me­ke­melerdiń qyzmetkerlerine olar­dyń ómiri men densaýlyǵyna tóne­tin qaýip-qaterge qatysty ústeme­aqy tólenetin boldy.

Medıtsına qyz­met­kerleriniń, mektepte, kolledj­de jáne balabaqshada jumys isteıtin pedagogterdiń jalaqysy ósti.

Ulttyq qordan balalarǵa qarjy berý máselesin retteıtin zań kúshine endi.

Negizgi ekonomıkalyq kórsetkishterdi, onyń ishinde ınflıatsııa deńgeıin eskere otyryp eń tómengi jalaqyny anyqtaıtyn ádisteme qabyldandy.

— Osy jumystyń bári 2024 jyly da jalǵasady. Biz tııanaqty jáne josparly áreket jasaımyz, maqsatqa jetý úshin úzdiksiz alǵa umtylamyz. Bul — aıryqsha mańyzdy jyl bolmaq. Óıtkeni osy kezeń elimizdiń aldaǵy bes jyldaǵy damýyna negiz bolady, — deıdi Prezıdent. 

Al jańa jylda eli­mizdiń aldynda qandaı mindetter turǵany jaıly saýalǵa Qaym-Jomart Toqaev jańa ekonomıkalyq úlgige kósheti­ni­mizdi jetkizdi.

— 2029 jylǵa qaraı jalpy ishki ónimdi qazirgiden eki esege arttyrý máselesin basty stra­te­gııa­lyq maqsat retinde belgiledim. Kóp uzamaı Úkimettiń keńeıtilgen otyry­sy ótedi. Onda elimizdiń byl­tyr­ǵy áleýmettik-ekonomıkalyq damý qo­ry­tyndysy shyǵarylyp, aldaǵy jumystyń amal-tásilderi aıqyndalady. Ulttyq quryltaıdyń otyrystary ıdeologııa salasyndaǵy máselelerdi, ulttyń jańa sapasyn qalyptastyrý isin, qoǵamnyń qundylyqtar júıesin jańǵyrtý jaıyn talqylaıtyn tıimdi pikirtalas ornyna aınaldy. Buǵan deıin jazdygúni shaqyrylyp kele jat­qan Quryltaıdyń otyrysyn bıyl sál erterek, kóktemde ótkizetin shyǵarmyz. Osylaısha, bıyl ekonomıkalyq, qoǵamdyq-saıası jáne gýmanıtarlyq salalarda atqarylatyn jumystyń negiz­gi baǵyt-baǵdary birinshi toq­sanda-aq aıqyndalady, — dedi Memleket basshysy.