2022 jyly Qazaqstannan 80 sheteldik qylmysker shyǵaryldy - Bas prokýratýra
Qazaqstan Respýblıkasynyń Bas prokýratýrasy qylmysqa qarsy is-qımyl jáne jazanyń bultartpastyǵyn qamtamasyz etý salasynda shet memlekettermen halyqaralyq yntymaqtastyqty belsendi damytyp keledi. Bul rette, jumystyń edáýir kólemi ekstradıtsııa sııaqty mańyzdy baǵytta júzege asyrylady, bul quqyqtyq ınstıtýt retinde azamattardyń konstıtýtsııalyq quqyqtaryna aıtarlyqtaı áser etedi.
Qazaqstan Respýblıkasynyń zańnamasyna sáıkes ekstradıtsııalaý rásimi izdeýdegi adamdy ustaýdy, oǵan qatysty sottyń sanktsııasymen 40 táýlikke ýaqytsha kúzetpen ustaýdy, sodan keıin 12 aı merzimge ekstradıtsııalyq qamaqqa alýdy qamtıdy. Osy ýaqyt ishinde kúzetpen ustaýdaǵy adamǵa qatysty ekstradıtsııalyq tekseris júrgiziledi jáne ony shet memleketke berý múmkindigi týraly sheshim qabyldanady. Bul rette, Bas prokýratýranyń quzyretine izdeýdegi adamdardy ekstradıtsııalaý týraly sheshimder qabyldaý máseleleri kiredi.
Bas prokýratýra 2022 jyly shet memleketterdiń ustap berý týraly 90-nan astam suraý salýyn qarap, onyń 80-i qanaǵattandyrylǵan. Qazaqstannyń negizgi áriptesteri – Reseı, Ózbekstan jáne Qyrǵyzstan. Bul memleketterdiń quqyqtyq júıeleriniń uqsastyǵyna, olardyń geografııalyq ornalasýynyń jaqyndyǵyna jáne kóshi-qon aǵyndarynyń qarqyndylyǵyna baılanysty.
Qylmys sanattary boıynsha adamdar negizinen alaıaqtyq, urlyq, adam óltirý, esirtkiniń zańsyz aınalymy úshin beriledi. Mysaly, Reseı Bas prokýratýrasynyń suraý salýy boıynsha 2022 jyly osy eldiń azamaty A.J. Ýrzagýlov memleketaralyq izdeýde bolǵan jáne Aqtóbe oblysynyń aýmaǵynda ustalǵan. Reseıdiń quqyq qorǵaý organdary ony adamdarmen toptasyp, N.M. Jýmagazıevti atys qarýymen óltirdi dep aıyptady. Orynbor oblystyq sotynyń úkimimen A.J. Ýrzagýlov qylmysy úshin 15 jylǵa bas bostandyǵynan aıyrýǵa sottaldy. 75 000 AQSh dollary somasyna alaıaqtyq jasaǵany úshin Ózbekstanǵa berilgen G.T. Nábıev Samarqand qalalyq qylmystyq sotynyń úkimimen 9 jylǵa bas bostandyǵynan aıyrýǵa sottaldy. Sondaı-aq, ótken jyly reseılik quqyq qorǵaý organdaryna S.T. Davlatov, S.V. Avdeev, R.H. Alıev jáne E.V. Tranda aýyrlatatyn mán-jaılarda adam óltirgeni úshin, R.S. Hatov, A.A. Sokolov, H.M. Gadamaýrı esirtki satqany úshin berildi. Grýzııa Bas prokýratýrasynyń suraý salýy boıynsha R.M. Chhıkvadze densaýlyqqa aýyr zııan keltirgeni úshin, Qyrǵyz áriptesteriniń suraý salýy boıynsha qaraqshylyq jasaǵany úshin N.K. Qurmanbekov berildi.
Sonymen qatar, Qazaqstannyń álemdik qoǵamdastyqqa birigýi alys shet elderdegi áriptestermen tıimdi ózara is-qımyl jasaýǵa múmkindik beredi. Mundaı yntymaqtastyqtyń quqyqtyq negizi – memleketimiz qatysatyn ekijaqty jáne kópjaqty sharttar. Ekstradıtsııalaý týraly sharttary joq eldermen adamdardy ustap berý týraly máseleler halyqaralyq quqyqta qoldanylatyn ózara is-qımyl qaǵıdaty negizinde qaralady. Bul rette, áreketti qylmys retinde ózara taný talaby basshylyqqa alynady. Atap aıtqanda, sońǵy jyldary AQSh, Túrkııa, Lıtva quzyretti organdarynyń suranysy boıynsha izdeýde júrgen adamdar berilgen.
Aıta ketsek, 15 aqpan kúni Memleket basshysy «Qazaqstan Respýblıkasy men Ózbekstan Respýblıkasy arasyndaǵy bas bostandyǵynan aıyrýǵa sottalǵan adamdardy jazasyn odan ápi óteý úshin berý týraly shartty ratıfıkatsııalaý týraly» Qazaqstan Respýblıkasynyń Zańyna qol qoıdy.