2020 jyly jańa kólikter arasynda eń kóp satylǵan brendter belgili boldy

NUR-SULTAN. QazAqparat – 2020 jyly Qazaqstanda resmı dılerler 89 myńnan astam jańa kólik satty. Bul týraly QazAqparat «QazAvtoÓnerkásip» avtokólik salasyndaǵy kásiporyndar odaǵyna silteme jasap habarlaıdy.

«Ótken jyly resmı dılerler 89 097 kólikti satty. Bul bir jyl burynǵy kórsetkishten 24,8 paıyzǵa joǵary. 2020 jyly qazaqstandyqtar jańa jeńil kólikterdi alýǵa 808,6 mlrd teńge (1,9 mlrd AQSh dollary) jumsap, 2019 jylǵy deńgeıden 23,6 paıyzǵa artyq boldy», - delingen taratylǵan málimette.

Kólik satyp alýshy 63 541 adam (71,3 paıyzy) otandyq zaýyttardyń ónimine óz tańdaýyn jasaǵan. Sonymen qatar, byltyr satylǵan 25 556 avtomobıl (28,7 paıyzy) ımportqa tıesili bolyp otyr.

Atalǵan merzimde elimizde suranysy joǵary jeńil kólik brendteriniń arasyndaǵy úzdik bestikte Hyundai (17 928 kólik), Lada (17 453), Toyota (10 081), Chevrolet (10 029) jáne Ravon (7 137) kósh bastady.

Munymen qosa, satylymy joǵary bolǵan TOR-ondyqta – KIA (6 004 kólik), GAZ (3 241), Renault (2 643), Volkswagen (2 552 ) jáne JAC (2 450) bar.