2020 jyly metallýrgııa salasyndaǵy óndiris kólemi 2,6% artty - mınıstrlik

NUR-SULTAN. QazAqparat - 2020 jyldyń 12 aıynyń qorytyndysy boıynsha óńdeý ónerkásibiniń barlyq baǵyttary boıynsha ósim baıqalady. Metallýrgııada óndiris kólemi 2,6% - ǵa artty.

Bul málimetterdi QR Indýstrııa jáne ınfraqurylymdyq damý mınıstrliginiń baspasóz qyzmeti málim etti, dep habarlaıdy QazAqparat.

Mysaly, tústi metallýrgııada óndiris kólemi 2,8% - ǵa ósti. Qazaqstandaǵy eń iri mys óndirýshi «Qazaqmys korporatsııasy» tazartylǵan mys óndirý kólemin 5% - ǵa, quıma altyndy 35% - ǵa, sondaı-aq túıirshikti kúmisti 17% - ǵa ulǵaıtty.

Sonymen qatar, «Qazaqstan elektrolız zaýyty» bastapqy alıýmınıı óndirisiniń kólemin ulǵaıtty. «Taý-Ken Altyn» kásiporny da oń kórsetkishterge qol jetkizdi. Óndiris oshaǵy tazartylǵan altyn óndirý kólemin 4% - ǵa, kúmis óndirý kólemin 46,7% - ǵa ulǵaıtty.

«Esterińizge sala keteıik, kásiporyn óz ónimderiniń joǵary sapasyn taǵy bir márte dáleldep, senimdi jetkizýshi retinde álemdik moıyndaýǵa ıe boldy. Tazalyǵy 99,99% - dan kem emes altyn óndiretin affınaj zaýyty London baǵaly metaldar naryǵy qaýymdastyǵynyń «GoodDelivery» sertıfıkatyn aldy. Osy sertıfıkaty bar baǵaly metaldar shekteýsiz barlyq álemdik bırjalarda saýdaǵa qabyldanady»,-delingen habarlamada.

12 aıdyń qorytyndysy boıynsha qara metallýrgııada ósim 4,1% - dy qurady. Qostanaıdaǵy «Evraz Kaspıan Stal» zaýyty armatýralyq jaıma óndirisiniń kólemin 7% - ǵa ulǵaıtty. Armatýralyq jaıma memlekettik standarttarǵa sáıkes shyǵarylady. Ónimniń sapasy zaýyttyń synaq zerthanasynda jańa tehnologııalyq jabdyqtarmen jáne baqylaýmen qamtamasyz etiledi.

Sondaı-aq, «Taraz metallýrgııa zaýyty» ferrosılıkomarganets óndirisiniń kólemin 27% - ǵa, «Kastıng» JShS armatýralardy, sharlardy jáne domalaq shybyqtardy taýarlyq shyǵarýdy 4,2% - ǵa ulǵaıtty.