2020 jyly Qazaqstanda 77 myń kólik shyǵaryldy

NUR-SULTAN. QazAqparat – 2020 jyly Qazaqstanda 77 431 avtokólik qurastyryldy. Olardyń arasynda jeńil jáne júk kólikteri, avtobýs tehnıkasy men arnaıy mashınalar da bar. Bul týraly QazAqparat «QazAvtoÓnerkásip» avtokólik salasyndaǵy kásiporyndar odaǵyna silteme jasap habarlaıdy.

Esepti kezeńde Qazaqstanda shyǵarylǵan kólikterdiń jalpy quny 612,8 mlrd teńgege baǵalanyp otyr. Onyń ishinde jeńil avtomobıl qurastyrý 47 paıyzǵa ósip, 64 790-ǵa jetti. Avtobýs tehnıkasyn shyǵarý (1 801 kólik) 66 paıyzǵa joǵarylady.

Sonymen qatar, júk kólikterin qurastyrý (8 240 kólik) 2 esege ósken.

Al el turǵyndary jergilikti óndiristen shyqqan kólikterdi satyp alýǵa 538,6 mlrd teńge jumsaǵan. Bul kórsetkish bir jyl burynǵydan 71,6 paıyzǵa artyq.

Esepti kezeńde Qazaqstanda qurastyrylǵan jeńil kólikterdiń arasynda suranysqa ıe brendterdiń bestigine Hyundai (17 927 kólik), Lada (16 680), Chevrolet (9 990), Ravon (5 945) jáne KIA (5 201) endi.

Otandyq kásiporyndar usynatyn markalardyń tiziminde JAC (2 066 kólik), UAZ (643) ári Skoda (267) bar ekenin atap ótken jón.