2020 jyly EAEO elderindegi ózara saýda-sattyq kólemi 11 paıyzǵa qysqardy
Bul týraly Eýrazııalyq ekonomıkalyq komıssııanyń ıntegratsııa jáne makroekonomıka jónindegi múshesi (mınıstri) Sergeı Glazev aıtty, dep habarlaıdy QazAqparat tilshisi.
«Búkil álemdegideı bizge de pandemııalyq shekteýler ózara saýda-sattyqqa teris áserin tıgizdi. Bul irkilester, eń aldymen kólik qatynasynyń qıyndaýyna baılanysty boldy. Eger qańtardan qarashaǵa deıingi aralyqty alar bolsaq, ózara saýda-sattyq kólemi 11 paıyzǵa qysqaryp, 44 mlrd dollardy qurady. Ózara saýda-sattyq kólemi syrtqy saýdaǵa qaraǵanda birshama az qysqardy», - dedi ol Ortalyq kommýnıkatsııalar qyzmetiniń kóshpeli baspasóz máslıhaty barysynda.
Onyń atap ótýinshe, strategııalyq sharalardy júzege asyrýdyń arqasynda EAEO elderi saýda-sattyq kólemin tez arada qalpyna keltire aldy.
«Ózara saýda-sattyqqa valıýta baǵamynyń qubylýy da áser etti. Eger, ózara saýda-sattyqtaǵy ártúrli elderdiń salmaǵy jaıynda aıtar bolsaq, bul rette ósim qarqyny, taýar aınalymy dınamıkasy turǵysynda Qazaqstannyń jaǵdaıy birshama tabysty boldy jáne kólik irkilesteri men suranys qurylymyndaǵy qubylmalyq birshama tómen baıqaldy», - dedi ol.
EEK mınıstri EAEO elderinde keıbir salalarda ósim baıqalǵanyn da atap ótti.
«Mundaı birneshe sala bar. Ózderińiz de bilip otyrǵandaı, birinshi orynda farmatsevtıka tur. 11 aıdaǵy málimetterge sáıkes, sala 22-23 paıyzǵa ósti. Aıta keterligi, Qazaqstanda eki ese ósim bar, sala 45 paıyzǵa artyp otyr. Hımııa ónerkásibi shamamen 5 paıyzǵa toqyma ónerkisibi 10-12 paıyzǵa artsa, tamaq ónerkásibinde de aıtarlyqtaı ósim tirkeldi. Aýyl sharýashylyǵynyń jekelegen salalarynda atap aıtqanda sút pen maı, irimshik óndirisinde ósim bar», - dedi Sergeı Glazev.
