2020 jylǵa qaraı elimizdiń azyq-túlik qaýipsizdigi 80 paıyzǵa ishki naryq esebinen qamtamasyz etiledi
Buryn qabyldanǵan baǵdarlamaǵa qaraǵanda jańa baǵdarlamada AÓK sýbektileriniń básekege qabilettiligin arttyrý úshin jaǵdaılar jasaýǵa basa nazar aýdarylǵandyǵyn basa aıtqan Aýyl sharýashylyǵy mınıstri Asyljan Mamytbekov: «Osylaısha, otandyq óndirýshiler Keden odaǵy jáne aldaǵy DSU-ǵa kirý sheńberindegi básekelestik kúreste qajetti memlekettik qoldaýmen qamtamasyz etiledi», - deıdi.
Onyń atap ótýinshe, baǵdarlamanyń maqsattaryna qol jetkizý úshin qarjylyq saýyqtyrý, AÓK sýbektileri úshin taýarlardyń, jumystardyń jáne qyzmetterdiń qoljetimdiligin arttyrý, AÓK sýbektilerin memlekettik qamtamasyz etý júıelerin damytý, AÓK-ni memlekettik retteý júıeleriniń tıimdiligin arttyrý syndy tórt baǵyt boıynsha jumystar júrgiziletin bolady.
Baǵdarlamaǵa sáıkes qarjylyq saýyqtyrý AÓK sýbektilerin memlekettik qoldaýdyń jańa baǵyty bolyp tabylady. Ol kredıtter men jobalardy qaıta qurylymdaý, qaıta qarjylandyrý, sondaı-aq, bar boryshtaryn óteý úshin aýyl sharýashylyǵy óndirýshilerin qarjylandyrý arqyly júzege asyrylady. Osylaısha, memleket kredıttik júktemeni jeńildetedi jáne kóptegen aýyl sharýashylyǵy taýaryn óndirýshilerdiń qarjylyq turaqsyzdyǵyn boldyrmaıdy. Sonymen qatar, AÓK sýbektilerin qarjylyq saýyqtyrý aıasynda qaryzdar boıynsha paıyzdyq stavkany sýbsıdııalaý júzege asyrylady. Jalpy qarjylandyrý somasy 375,6 mlrd. teńgeni quraıdy.
AÓK sýbektileri úshin taýarlardyń, jumystardyń jáne qyzmetterdiń qoljetimdiligin arttyrý baǵyty aýqymynda birqatar mindetterdi sheshý qajet. Al olardy sheshý úshin Aýyl sharýashylyǵy mınıstrligi ınvestıtsııalyq sýbsıdııalar, qarjy ınstıtýttary aldyndaǵy AÓK sýbektileriniń qaryzdaryn saqtandyrý jáne kepildik berý, ekinshi deńgeıli bankterdi qorlandyrý syndy jańa tetikterdi usynyp otyr. Bul rette aıta keterligi syıaqy stavkasyn sýbsıdııalaý aýyl sharýashylyǵy tehnıkasynyń lızıngine jáne aýyl sharýashylyǵy úshin kredıt berýge deıin keńeıetin bolady.
Mınıstrdiń atap ótýinshe, jańa baǵdarlamaǵa sáıkes, ósimdik sharýashylyǵynda tamshylatyp sýarý júıesin qoldana otyryp, aýyl sharýashylyǵy daqyldaryn ósirgen kezde bazalyq sýbsıdııalaýdan joǵary norma boıynsha sýbsıdııalaý normatıvterin saralaý, tamshylatyp sýarý júıesin qoldanýmen sharttasqan baqshalar men júzimdikter otyrǵyzýǵa ketken shyǵyndardy sýbsıdııalaý, jaı sýarý tásilin qoldanǵanda tólenetin 25 paıyzǵa qaraǵanda tamshylatyp sýarýdy qoldanǵan kezde sýdyń 1 tekshe metrin jetkizý tarıfiniń 80 paıyzyn sýbsıdııalaý júzege asyrylady. Mal sharýashylyǵynda analyq maldyń 1 basyna 4500 teńge sýbsıdııa tóleý jalǵasady. «Baǵdarlamanyń áreket etýiniń barlyq ýaqytynda júzege asyrylatyn osy baǵytty iske asyrý jónindegi is-sharalarǵa 2 245,9 mlrd. teńge kózdeldi. Bul baǵdarlamany qarjylandyrýdyń barlyq somasynyń 68 paıyzyn quraıdy. Onyń ishinde 95,8 paıyzy jergilikti atqarýshy organdar, al 4,2 paıyzy Aýyl sharýashylyǵy mınıstrligi arqyly beriletin bolady»,- dedi A.Mamytbekov.
Onyń aıtýynsha, baǵdarlamanyń «AÓK sýbektilerin memlekettik qamtamasyz etý júıelerin damytý» baǵyty aıasynda fıtosanıtarııalyq qaýipsizdik júıesin, veterınarlyq qaýipsizdik júıesin jáne jaıylymdardy sýmen qamtamasyz etý ınfraqurylymyn damytý kózdeledi. Bul baǵytty 2013-2020 jyldary júzege asyrý úshin jalpy somasy 409 mlrd. teńge qajet. Fıtosanıtarııalyq qaýipsizdikti qamtamasyz etý jáne asa qaýipti zııandy organızmderge qarsy kúresýdiń qaýipsiz ádisterin engizý sheńberinde maqtanyń, kókónisterdiń, jemis daqyldarynyń, júzimniń jáne basqa da daqyldardyń negizgi zııankesterine qarsy kúresýdiń bıologııalyq ádisterin engizý úshin normatıvter ázirlenedi. 2014 jyldan bastap aýyl sharýashylyǵy taýarlaryn óndirýshilerge maqtany óńdeýge arnalǵan bıoagentterdiń (entomofagtardyń) jáne bıopreparattardyń qunyn, 2016 jyldan bastap ashyq jáne jabyq topyraqta ósiriletin kókónis daqyldaryn, baqsha jáne jemis daqyldaryn óńdeýge arnalǵan bıoagentterdiń (entomofagtardyń) jáne bıopreparattardyń qunyn arzandatý josparlanýda.
Baǵdarlamany iske asyrýǵa 8 jyl ishinde barlyǵy 3 122,2 mlrd. teńge qajet bolatyndyǵyn atap ótken mınıstr: «Ony iske asyrýdyń nátıjesinde Aýyl sharýashylyǵy ónimderin jeke óndirý kólemderin 1,5 ese arttyrý, aýyl sharýashylyǵynda jumys isteıtin adamǵa eńbek óndirgishtigin 3 ese joǵarylatý, agroónerkásip kesheniniń ónimin ótkizýden eksporttyq tabysty 20 paıyzǵa arttyrý, negizgi tamaq ónimderi boıynsha azyq-túlik qaýipsizdigin ishki naryqtyń 80 paıyzy deńgeıinde qamtamasyz etý, salaǵa 10 trln. teńgeden astam jeke aqshalaı qarajat tartý syndy makroekonomıkalyq tıimdilikter kútilýde», - deıdi.
Mınıstrler kabıneti jańa baǵdarlamany biraýyzdan maquldaǵannan keıin sóz alǵan Úkimet basshysy Serik Ahmetov múddeli memlekettik organdarǵa tıisti tapsyrma berdi. «Mańyzdy baǵdarlama qabyldandy. Memleket basshysy elimizdiń aýyl sharýashylyǵyn keń kólemde jańǵyrtý qajettigin aıtty. Onyń birinshi qadamy agroónerkásiptik keshendi damytýdyń jańa baǵdarlamasyn qabyldaý bolýy tıis edi. Búgin biz osy mańyzdy tapsyrmany oryndadyq. Endi bul baǵdarlamany birtindep ári naqty júzege asyrý qajet», - dedi S.Ahmetov. Osy oraıda Premer-Mınıstr aýyl sharýashylyǵy mınıstrligine múddeli memlekettik organdarmen birlesip, bir aıdyń ishinde baǵdarlamanyń árbir baǵyty boıynsha naqty maqsatty ındıkatorlar jetistikteri men jyldyq kórsetkishteri kórsetilgen sheberlik josparyn ázirleýdi tapsyrdy.
