2020 jyldyń 11 aıynda Qazaqstanda 430 myń tonnadan astam et óndirildi – QR AShM
Bul málimetter QR Aýyl sharýashylyǵy mınıstrliginiń resmı saıtynda jarııalandy, dep habarlaıdy QazAqparat.
Sondaı-aq, shujyq ónimderin óndirý 12%-ǵa (48-den 53,8 myń tonnaǵa deıin) jáne et konservilerin óndirý 13,8%-ǵa (7,7-den 8,8 myń tonnaǵa deıin) artty.
Sıyr etiniń eksporty ótken jyldyń qańtar-qazan aralyǵynda 26,4 mln AQSh dollaryn qurady.
Otandyq daıyn ónim óndirisiniń ósýi mal sharýashylyǵy jáne et óńdeý salalaryndaǵy memlekettik kómektiń ulǵaıýyna baılanysty. Sonymen qatar, óńdeýshi kásiporyndarynyń qýatynyń artýyna QR AShM ótken jyly iske qosqan tiri mal eksportyna moratorıı jarııalaýy oń áserin tıgizdi. Bul shara janýarlardyń elimizdiń shekarasynan jappaı shyǵarylýyn toqtatyp qana qoımaı, Prezıdenttiń tapsyrmasyna sáıkes daıyn ónim óndirisiniń kólemin ulǵaıtýǵa múmkindik berdi.
Agroónerkásiptik keshendi damytýdyń 2017-2021 jyldarǵa arnalǵan memlekettik baǵdarlamasy aıasynda et óńdeýshiler úshin kelesi memlekettik qoldaý túrleri:
1) jumys istep turǵan zaýyttardy jańǵyrtýǵa jáne jańa zaýyttardy salýǵa ınvestıtsııalyq salymdardyń bir bóligin óteý (25%-ǵa deıin);
2) aınalym jáne negizgi quraldarǵa arnalǵan nesıeler boıynsha syıaqynyń paıyzdyq mólsherlemesin sýbsıdııalaý;
3) «Qarapaıym zattar ekonomıkasy» baǵdarlamasy sheńberinde, onyń ishinde et jáne qus etin óndirýshilerge jeńildikpen nesıe berý qarastyrylǵan.
Sonymen qatar, QR AShM ógizshelerdi et óńdeý kásiporyndaryna tapsyrý kezinde fermerlerdi sýbsıdııalaý sharalaryn engizdi. Mal ósirýshiler memleketten qosymsha bir kılogramm tiri salmaq úshin 200 teńgeden ala alady.
