2020 jyldan beri jábirlenýshilerge memleketten 312 mln teńge tólengen

ASTANA. QazAqparat - Jábirlenýshilerge ótemaqy qorynan 312 mln teńge kóleminde qarjy tólendi. Bul týraly QazAqparat Bas prokýratýranyń baspasóz qyzmetine silteme jasap habarlaıdy.

«Jábirlenýshilerge ótemaqy qory týraly» Zań 2018 jyldyń 1 shildesinen qoldanysta. 2020 jylǵy 1 shildeden bastap Qarjy mınıstrligi jábirlenýshilerge ótemaqy tóleýdi bastady. Ótemaqy – QPK-ne sáıkes jábirlenýshi dep tanylǵan adamǵa Zańda belgilengen tártippen birjolǵy aqsha tólemi. Qor barlyq sottalǵan adamdardan sot úkimimen óndirip alynatyn májbúrli tólemder esebinen qalyptastyrylady. Qordyń maqsaty-qylmystan materıaldyq zardap shekken, biraq qylmys ashylmaǵandyqtan nemese kináli sot tóreliginen jasyrynǵandyqtan ótemaqy almaǵan azamattardy qoldaý. Búgingi tańda Qarjy mınıstrligimen 312 mln teńgeden astam qarjy tólendi», - delingen habarlamada.

Memleketten kómek alýshylar:

- jynystyq zorlyq-zombylyqqa baılanysty qylmystar boıynsha jábirlenýshi bolyp tabylatyn kámeletke tolmaǵandar, adam saýdasy men azaptaýǵa baılanysty qylmystar boıynsha jábirlenýshi dep tanylǵan adamdar;

- densaýlyǵyna aýyr zııan keltirilgen ne adamnyń ımmýn tapshylyǵy vırýsyn (AITV/JITS) juqtyrǵan adamdar;

- jábirlenýshi qaıtys bolǵan jaǵdaıda jábirlenýshiniń quqyqtary berilgen adamdar kiredi. Qylmystar quramynyń aıryqsha tizimi joǵaryda atalǵan bapta kórsetilgen. Zańǵa sáıkes ony alýshylardyń biri azaptaýǵa baılanysty qylmystar boıynsha jábirlenýshi dep tanylǵan adamdar bolyp tabylady.

Azaptaý qurbandaryna ótemaqy 30 AEK nemese 40 AEK mólsherinde taǵaıyndalady.

Ótemaqy alý úshin jábirlenýshi tergeý organyna tıisti qujattardy usynýy qajet.