2019 jyly ınflıatsııa 5-6 paıyz sheginde bolady - Ulttyq bank

ASTANA. QazAqparat - 2018 jyldyń qorytyndysy boıynsha ınflıatsııa 5-7 paıyz nysanaly dáliz sheginde saqtaldy. Bul týraly Qazaqstan Ulttyq bankiniń tóraǵasy Danııar Aqyshev BAQ ókilderine arnalǵan brıfıngte aıtty, dep habarlaıdy QazAqparat tilshisi.

Onyń atap ótýinshe, ótken jylǵy sońǵy úsh aıda ınflıatsııa 5,3 paıyzdyq deńgeıde bolyp ózgergen joq. 2017 jylmen salystyrǵanda ınflıatsııanyń báseńdeýi tutynýshylyq taýarlar men qyzmet kórsetýlerdiń barlyq toby boıynsha tirkelgen.

«Bazalyq ınflıatsııanyń serpini tutynýshylyq naryqtaǵy ınflıatsııalyq aıanyń saqtalýyn rastaıdy. Onyń neǵurlym qubylmaly baǵalardy jáne retteletin quraýyshtardy qospaı eseptelgen deńgeıi 2018 jyly 6,2 paıyzdan 6,7 paıyzǵa deıin jedeldegenin kórsetti», - dedi D. Aqyshev.

Ol álemdik taýar naryqtarynda baǵalardyń jalpy tómendeýiniń baıqalyp otyrǵandyǵyn atap ótti. FAO ındeksi jyldyq kórsetkishte 4,3% tómendedi. Jeltoqsanda sút ónimderi men qant baǵasyn belgileýdiń tómendeýi tirkeldi. Osyǵan qaramastan, dándi daqyldardyń, et pen maıdyń baǵasy ósti.

«Joǵaryda atalǵan faktorlardy eskere otyryp, aǵymdaǵy jyly Qazaqstan Ulttyq banki ınflıatsııanyń jańa, neǵurlym tómen 4-6 paıyzdyq dáliz ishinde saqtalýyn kútedi. Bul rette, aǵymdaǵy baǵalaýlar, onyń deńgeıiniń jyldyń sońynda 5-6 paıyz sheginde dálizdiń joǵary bóliginde qalyptasatyndyǵyn kórsetedi», - dedi Qazaqstan Ulttyq bankiniń basshysy.